CRICKETSPORTSPORTSTOP STORIES

ପର୍ଥ ଟେଷ୍ଟ, ଅଷ୍ଟ୍ରେଲିଆର ୩୨୬ ରନ୍ ଜବାବରେ ଭାରତ ୧୭୨/୩

ପର୍ଥ, ୧୫ା୧୨ : ଭାରତ ଅଷ୍ଟ୍ରେଲିଆ ବିପକ୍ଷରେ ପର୍ଥଆପ୍ଟସ ଷ୍ଟାଡିୟମରେ ଖେଳାଯାଉଥିବା ଶୃଙ୍ଖଳାର ଦ୍ୱିତୀୟ ଟେଷ୍ଟ ମ୍ୟାଚର ଦ୍ୱିତୀୟ ଦିନରେ ଖେଳ ଶେଷ ସୁଦ୍ଧା ଭାରତ ୩ ୱିକେଟ୍ ହରାଇ ୧୭୨ ରନ୍ କରିଛି । ଦ୍ୱିତୀୟ ଦିନରେ ଚମକିଛନ୍ତି ଭାରତୀୟ ଅଧିନାୟକ ବିରାଟ କୋହଲି ୮୧ ରନ୍ ଏବଂ ଆଜିଙ୍କ୍ୟ ରାହାଣେ ୫୧ ରନ୍ କରି କ୍ରିଜ୍ରେ ଅପରାଜିତ ଅଛନ୍ତି । ଭାରତ ଏବେ ମଧ୍ୟ ଅଷ୍ଟ୍ରେଲିଆଠୁ ପ୍ରଥମ ଇନିଂସ ଆଧାରରେ ୧୫୪ ରନ୍ ପଛରେ ରହିଛି ଏବଂ ହାତରେ ୭ ୱିକେଟ୍ ରହିଛି । ଅଷ୍ଟ୍ରେଲିଆ ପ୍ରଥମ ଇନିଂସରେ ୩୨୬ ରନ୍ରେ ଅଲ୍ଆଉଟ୍ ହେବା ପରେ ଭାରତ ବ୍ୟାଟିଂ ଆରମ୍ଭ କରିଥିଲା । ମାତ୍ର ୮ ରନ୍ ମଧ୍ୟର ଭାରତ ଦୁଇ ଓପନରଙ୍କୁ ହରାଇଥିଲା । ଦଳୀୟ ସ୍କୋର ୬ ଯିବା ବେଳେ ମୁରଲି ବିଜୟ ଖାତା ଖୋଲିବା ପୂର୍ବରୁ ମିଚେଲ ଷ୍ଟାରଙ୍କ ବଲ୍ରେ କ୍ଳିନ୍ ବୋଲ୍ଡ ହୋଇ ପାଭିଲିୟନ ଫେରିଥିଲେ । ଏହାର ଠିକ୍ ପରେ ପରେ ୮ ରନ୍ ସ୍କୋରରେ ଲୋକେଶ ରାହୁଲ (୨) ହେଜେଲଉଡ୍ଙ୍କ ଶିକାର ହୋଇଥିଲେ । ୮ ରନ୍ରେ ଦ୍ୱୟଙ୍କୁ ଅଡୁଆରେ ପଡିଥିବା ଭାରତକୁ ସମ୍ଭାଳିଥିଲେ ଚେତେଶ୍ୱର ପୂଜାରା ଓ ଅଧିନାୟକ ବିରାଟ କୋହଲି । ଏହି ଦୁଇ ବ୍ୟାଟ୍ସମ୍ୟାନ ଧୈର୍ଯ୍ୟର ସହ ଖେଳି ଭାରତର ସ୍କୋରକୁ ଆଗେଇ ନେଇଥିଲେ । ଉଭୟ ତୃତୀୟ ୱିକେଟ୍ରେ ୭୪ ରନ୍ ଯୋଡି ଦଳକୁ ବ୍ୟାଟିଂ ବିପର୍ଯ୍ୟୟରୁ ଉଦ୍ଧାର କରିଥିଲେ । ମାତ୍ର ୮୨ ରନ୍ ସ୍କୋରରେ ଭାରତକୁ ପୂଜାରାଙ୍କ ରୂପେ ତୃତୀୟ ଝଟ୍କା ଲାଗିଥିଲା । ଗତ ମ୍ୟାଚରେ ହିରୋ ପୂଜାରା ୨୪ ରନ୍ କରି ଷ୍ଟାର୍କଙ୍କ ଦ୍ୱିତୀୟ ଶିକାର ହୋଇଥିଲେ । ପୂଜାରା ଆଉଟ୍ ହେବା ପରେ ବିରାଟ କୋହଲି ଓ ଆଜିଙ୍କ୍ୟ ରାହାଣେ ପାଳିକୁ ଆଗକୁ ବଢାଇଥିଲେ । ଉଭୟ ଧୈର୍ଯ୍ୟର ସହ ବ୍ୟାଟିଂ କରି ଇନିଂସକୁ ଆଗକୁ ବଢାଇଥିଲେ । ଦୁଇ ବ୍ୟାଟ୍ସମ୍ୟାନ ଚତୁର୍ଥ ୱିକେଟ୍ରେ ଅପରାଜିତ ୯୦ ରନ୍ ଭାଗିଦାରୀ ବଲ୍ ଦଳକୁ ଆଉ କୌଣସି କ୍ଷତି ହେବାକୁ ଦେଇନଥିଲେ । ଏହି କ୍ରମରେ ବିରାଟ ୧୦୯ ବଲ୍ରେ ନିଜର ଟେଷ୍ଟ କ୍ୟାରିୟରରେ ୨୦ମ ଅର୍ଦ୍ଧଶତକ ପୂରଣ କରିଥିଲେ । ଅନ୍ୟ ପଟେ ରାହାଣେ ୯୨ ବଲରେ ଟେଷ୍ଟ କ୍ୟାରିୟରର ୧୭ମ ଅର୍ଦ୍ଧଶତକ ପୂରଣ କରିଥିଲେ । ଦିନର ଖେଳ ଶେଷ ସୁଦ୍ଧା କୋହଲି ୧୮୧ ବଲ୍ରୁ ୯ ଚୌକା ଜରିଆରେ ୮୧ ରନ୍ ଏବଂ ରାହାଣେ ୧୦୩ ବଲ୍ରୁ ୬ ଚୌକା ଓ ୧ ଛକା ଜରିଆରେ ୫୧ ରନ୍ କରି ଅପରାଜିତ ଅଛନ୍ତି । ଏହା ପୂର୍ବରୁ ଅଷ୍ଟ୍ରେଲିଆ ପ୍ରଥମ ଇନିଂସରେ ୩୨୬ ରନ୍ରେ ଅଲଆଉଟ୍ ହୋଇଥିଲା । ପ୍ରଥମ ଦିନର ଅସମାପ୍ତ ଖେଳ ୨୭୭/୬ରୁ ଅଷ୍ଟ୍ରେଲିଆକୁ ଖେଳ ଆରମ୍ଭ କରି ୩୨୬ରେ ଅଲ୍ଆଉଟ୍ ହୋଇଯାଇଥିଲା ।

Show More

Leave a Reply

Your email address will not be published. Required fields are marked *

Related Articles