CRICKETSPORTSPORTSTOP STORIES

ମୁମ୍ବାଇ ଇଣ୍ଡିଆନ୍ସ ଆଇପିଏଲ୍-୧୨ ଚାମ୍ପିଅନ୍

ହାଇଦ୍ରାବାଦ୍,୧୨ା୫: ଇଣ୍ଡିଆନ୍ ପ୍ରିମିଅର ଲିଗ୍ (ଆଇପିଏଲ୍)ର ଦ୍ୱାଦଶତମ ସଂସ୍କରଣର ଚାମ୍ପିଅନ୍ ହୋଇଛି ରୋହିତ ଶର୍ମାଙ୍କ ନେତୃତ୍ୱାଧିନ ମୁମ୍ବାଇ ଇଣ୍ଡିଆନ୍ସ ଟିମ୍ । ରବିବାର ହାଇଦ୍ରାବାଦ୍ର ରାଜୀବ ଗାନ୍ଧୀ ଇଣ୍ଟର ନ୍ୟାସନାଲ୍ କ୍ରିକେଟ୍ ଷ୍ଟାଡ଼ିୟମ୍ରେ ଖେଳା ଯାଇଥିବା ହାଇଭୋଲଟେଜ୍ ତଥା ସଂଘର୍ଷପୂର୍ଣ୍ଣ ଫାଇନାଲ୍ ମ୍ୟାଚ୍ରେ ଚେନ୍ନାଇ ସୁପରକିଙ୍ଗସ୍ ଟିମ୍କୁ ରୋହିତ ଶର୍ମାଙ୍କ ନେତୃତ୍ୱାଧିନ ମୁମ୍ବାଇ ଇଣ୍ଡିଆନ୍ସ ଟିମ୍ ପରାସ୍ତ କରି ଏହି ଆଇପିଏଲ୍ ଟାଇଟଲ୍ ହାସଲ କରିଛି । ରବିବାର ଖେଳା ଯାଇଥିବା ଏହି ମ୍ୟାଚ୍ରେ ରୋହିତ ଶର୍ମା ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ । ମୁମ୍ବାଇ ଇଣ୍ଡିଆନ୍ସ ନିର୍ଦ୍ଧାରିତ ୨୦ ଓଭରରେ ୮ ୱିକେଟ୍ ହରାଇ ୧୪୯ ରନ୍ କରିବାକୁ ସମର୍ଥ ହୋଇଥିଲା । ତେବେ ୧୫୦ ରନ୍ର ବିଜୟ ଲକ୍ଷ୍ୟକୁ ପିଛା କରି ଚେନ୍ନାଇ ସୁପରକିଙ୍ଗସ୍ ଟିମ୍ ୨୦ ଓଭରରେ ୭ ୱିକେଟ୍ ହରାଇ ୧୪୮ ରନ୍ କରିଥିଲା । ଫଳରେ ଚେନ୍ନାଇ ମାତ୍ର ୧ ରନ୍ରେ ମୁମ୍ବାଇ ଇଣ୍ଡିଆନ୍ସଠାରୁ ପରାସ୍ତ ହୋଇଛି । ମୁମ୍ବାଇ ପକ୍ଷରୁ କିରଣ ପୋଲାର୍ଡ ୨୫ ବଲ୍ରୁ ବିସ୍ଫୋରକ ୪୧ ରନ୍ କରି ଶେଷ ପର୍ଯ୍ୟନ୍ତ ଅପରାଜିତ ଥିଲେ । କ୍ୱିଣ୍ଟନ ଡିକୋକ୍ ୨୯ ରନ୍ କରି ଶ୍ରଦ୍ଦୁଳ ଠାକୁରଙ୍କ ବଲ୍ରେ ଆଉଟ୍ ହୋଇଥିବା ବେଳେ ଅଧିନାୟକ ରୋହିତ ଶର୍ମା ୧୫ ରନ୍ କରି ଦୀପକ ଚହରଙ୍କ ଶିକାର ହୋଇଥିଲେ । ସୂର୍ଯ୍ୟକୁମାର ଯାଦବ କମାଲ୍ ଦେଖାଇ ପାରିନଥିଲେ । ସେ ୧୫ ରନ୍ କରି ଓ ଇସାନ୍ କିଶାନ୍୍ ୨୩ ରନ୍ କରି ଇମ୍ରାନ୍ ତାହିରଙ୍କ ବଲ୍ରେ ଆଉଟ୍ ହୋଇଥିଲେ । କୃଣାଳ ପାଣ୍ଡ୍ୟା ୭ ରନ୍ କରି ଶ୍ରଦ୍ଦୁଳ ଠାକୁରଙ୍କ ବଲ୍ରେ ଆଉଟ୍ ହୋଇଥିବା ବେଳେ ହାର୍ଦ୍ଦିକ ପାଣ୍ଡ୍ୟା ୧୬ ରନ୍ କରି ଦୀପକ ଚହରଙ୍କ ବଲ୍ରେ ଏଲ୍ବିଡବ୍ଲ୍ୟୁ ଆଉଟ୍ ହୋଇଥିଲେ । ରାହୁଲ୍ ଚହର ଖାତା ଖୋଲି ନପାରି ଦୀପକ ଚହରଙ୍କ ବଲ୍ରେ ଆଉଟ୍ ହୋଇଥିବା ବେଳେ ମିଚେଲ୍ ମାକ୍କ୍ଲେନ୍ଘାନ୍ ଖାତା ଖୋଲି ନଥିବା ବେଳେ ଫାପ୍ ଡୁପ୍ଲେସିସ୍ଙ୍କ ଦ୍ୱାରା ରନ୍ ଆଉଟ୍ ହୋଇ ପାଭେଲିଅନ୍ ଫେରିଥିଲେ । ଯଶପ୍ରିତ ବୁୁମ୍ରାହ ଶେଷ ବେଳକୁ ଅପରାଜିତ ଥିଲେ ମଧ୍ୟ ସେ ଖାତା ଖୋଲି ପାରିନଥିଲେ । ମୁମ୍ବାଇ ଇଣ୍ଡିଆନ୍ସ ୨୦ ଓଭରରେ ୧୪୯ ରନ୍ କରିବା ପରେ ୧୫୦ ରନ୍ର ବିଜୟଲକ୍ଷ୍ୟ ନେଇ ଚେନ୍ନାଇ ସୁପରକିଙ୍ଗସ୍ ଟିମ୍ ବ୍ୟାଟିଂ ପାଇଁ ପଡ଼ିଆକୁ ଓହ୍ଲାଇଥିଲା । ଚେନ୍ନାଇ ତରଫରୁ ସେନ୍ ୱାଟସନ୍ ଦମ୍ଦାର ଅର୍ଦ୍ଧଶତକ ହାସଲ କରିଥିଲେ । ସେ ୫୯ ବଲ୍ରୁ ୮୦ ରନ୍ କରିଥିଲେ ମଧ୍ୟ ତାହା ଚେନ୍ନାଇ ପାଇଁ ବିଜୟ ଆଣିପାରି ନଥିଲା । ସେ କୃଣାଳ ପାଣ୍ଡ୍ୟାଙ୍କ ଦ୍ୱାରା ରନ୍ଆଉଟ୍ ହୋଇଥିଲେ । ଫଳରେ ତାଙ୍କ ଅର୍ଦ୍ଧଶତକୀୟ ଇନିଂସ ବେକାର ଯାଇଛି । ଫାଫ୍ ଡୁପ୍ଲେସିସ୍ ୧୩ ବଲ୍ରୁ ୨୬ ରନ୍ କରି କୃଣାଳ ପାଣ୍ଡ୍ୟାଙ୍କ ବଲ୍ରେ ଆଉଟ୍ ହୋଇଥିଲେ । ସୁରେଶ ରାଇନା ୮ ରନ୍ କରି ରାହୁଲ୍ ଚହରଙ୍କ ବଲ୍ରେ ଏଲ୍ବିଡବ୍ଲ୍ୟୁ ଆଉଟ୍ ହୋଇଥିଲେ । ଅମ୍ବାତି ରାଉଡୁ ମଧ୍ୟ କମାଲ୍ କରିପାରି ନଥିଲେ । ସେ ୧ ରନ୍ କରି ବୁମ୍ରାହଙ୍କ ବଲ୍ରେ ଆଉଟ୍ ହୋଇଥିବା ବେଳେ ଅଧିନାୟକ ମହେନ୍ଦ୍ର ସିଂ ଧୋନୀ ୨ ରନ୍ କରିଥିବା ବେଳେ ଇସାନ୍ କିଶାନ୍ଙ୍କ ଦ୍ୱାରା ରନ୍ଆଉଟ୍ ହୋଇ ପାଭେଲିଅନ୍ ଫେରିଥିଲେ । ଡାଏନ୍ ବ୍ରାଭୋ ୧୫ ରନ୍ କରି ବୁମରାହଙ୍କ ବଲ୍ରେ ଆଉଟ୍ ହୋଇଥିଲେ । ମ୍ୟାଚ୍ର ଶେଷ ବଲ୍ରେ ଚେନ୍ନାଇକୁ ବିଜୟ ପାଇଁ ୨ରନ୍ ଆବଶ୍ୟକ ହେଉଥିବା ବେଳେ ମୁମ୍ବାଇ ଇଣ୍ଡିଆନ୍ସର ବୋଲର ଲସିଥ୍ ମାଲିଙ୍ଗା କମାଲ୍ ଦେଖାଇ ଶ୍ରଦ୍ଧୁଳ ଠାକୁରଙ୍କୁ ଆଉଟ୍ କରି ମୁମ୍ବାଇକୁ ଏହି ବିଜୟ ଭେଟି ଦେଇଛନ୍ତି ।

Show More

Related Articles

Leave a Reply

Your email address will not be published. Required fields are marked *