HOCKEYODISHASPORTSPORTSTOP STORIES

ସବଜୁନିଅର ଜାତୀୟ ହକି ଚାମ୍ପିଅନସିପ୍, ଓଡ଼ିଶା ଚାମ୍ପିଅନ୍

ରାୟପୁର, ୨୨ା୫: ହକି ଇଣ୍ଡିଆ ପକ୍ଷରୁ ଆୟୋଜିତ ନବମ ସବ୍ଜୁନିଅର ଜାତୀୟ ପୁରୁଷ ହକି ଚାମ୍ପିଅନ୍ସିପ୍ରେ କମାଲ୍ ଦେଖାଇ ଚାମ୍ପିଅନ୍ ହୋଇଛି ଓଡ଼ିଶା ଟିମ୍ । ବୁଧବାର ଛତିଶଗଡ଼ର ରାଞ୍ଚିରେ ଖେଳାଯାଇଥିବା ଫାଇନାଲ୍ ମ୍ୟାଚ୍ରେ ହକି ଓଡ଼ିଶା ଟିମ୍ ସୁଟ୍ଆଉଟ୍ରେ ୩-୧ ଗୋଲ୍ରେ ହକି ଉତ୍ତରପ୍ରଦେଶକୁ ପରାସ୍ତ କରିଛି । ଫଳରେ ଏହି ଚାମ୍ପିଅନ୍ସିପ୍ରେ ଓଡ଼ିଶା ଟିମ୍ ଚାମ୍ପିଅନ୍ ହୋଇଥିବା ବେଳେ ଉତ୍ତରପ୍ରଦେଶ ଟିମ୍ ରନର୍ସ ଅପ୍ ହୋଇଛି । ସେହିପରି ଅନ୍ୟ ଏକ ମ୍ୟାଚ୍ରେ ହକି ଝାଡ଼ଖଣ୍ଡ ଟିମ୍ ସ୍ପୋର୍ଟ୍ସ ଅଥରିଟି ଅଫ୍ ଇଣ୍ଡିଆକୁ ପରାସ୍ତ କରି ତୃତୀୟ ସ୍ଥାନ ହାସଲ କରିଛି । ଉତ୍ତରପ୍ରଦେଶ ଓ ଓଡ଼ିଶା ଟିମ୍ ମଧ୍ୟରେ ଖେଳା ଯାଇଥିବା ଫାଇନାଲ୍ ମ୍ୟାଚ୍ର ୨୪ତମ ମିନିଟ୍ରେ ଓଡ଼ିଶା ପକ୍ଷରୁ ଅଧିନାୟକ ଲବନ୍ ଲାଗୁନ୍ ଉତ୍ତରପ୍ରଦେଶ ବିପକ୍ଷରେ ପ୍ରଥମ ଗୋଲ୍ କରିଥିଲେ । ଏହାପରେ ତୃତୀୟ କ୍ୱାର୍ଟରରେ ଅର୍ଥାତ ମ୍ୟାଚ୍ର ୩୮ତମ ମିନିଟ୍ରେ ଉତ୍ତରପ୍ରଦେଶ ଟିମ୍ର ଅଧିନାୟକ ସୌରଭ ଆନନ୍ଦ ଏକ ଗୋଲ୍ କରି ସ୍କୋରକୁ ବରାବର ସ୍ଥିତିକୁ ନେଇ ଆସିଥିଲେ । ଅନ୍ତିମ କ୍ୱାର୍ଟରରେ ଅର୍ଥାତ ମ୍ୟାଚ୍ର ୪୯ତମ ମିନିଟ୍ରେ ଉତ୍ତରପ୍ରଦେଶର ଅଙ୍କିତ ପ୍ରଜାପତି ଆଉ ଏକ ଗୋଲ୍ କରି ଉତ୍ତରପ୍ରଦେଶ ହକି ଟିମ୍କୁ ୨-୧ ଗୋଲ୍ରେ ଆଗୁଆ କରିଦେଇଥିଲେ । ତେବେ ଉତ୍ତରପ୍ରଦେଶର ଏହି ଖୁସିକୁ ଅଧିକ ସମୟ ରହିବାକୁ ଦେଇ ନଥିଲେ ଓଡ଼ିଶା ଖେଳାଳି । ଏହାର ମାତ୍ର ୩ ମିନିଟ୍ ପରେ ଅର୍ଥାତ ମ୍ୟାଚ୍ର ୫୨ତମ ମିନିଟ୍ରେ ଓଡ଼ିଶା ହକି ଟିମ୍ର ପ୍ରବୀଣ ଇନ୍ଦୱାର ଗୋଲ୍ କରି ପୁଣି ସ୍ଥିତିକୁ ୨-୨ର ବରାବର ସ୍ଥିତିକୁ ନେଇ ଆସିଥିଲେ । ମ୍ୟାଚ୍ ଶେଷ ପର୍ଯ୍ୟନ୍ତ ଆଉ କେହି କାହା ବିପକ୍ଷରେ ଗୋଲ୍ କରିବାକୁ ସମର୍ଥ ହୋଇ ନଥିଲେ । ଫଳରେ ମ୍ୟାଚ୍ ୨-୨ର ସମାନ ସ୍ଥିତିରେ ଶେଷ ହୋଇଥିଲା । ଏହାପରେ ସୁଟ୍ଆଉଟ୍ ପର୍ଯ୍ୟାୟ ଆରମ୍ଭ ହୋଇଥିଲା । ସୁଟ୍ଆଉଟ୍ରେ ଓଡ଼ିଶା ଟିମ୍ର ଅଧିନାୟକ ଲବନ୍ ଲାଗୁନ୍, ରାଜମୋନ୍ ତେଲି, ରୋଷନ୍ କୁଜୁର ଗୋଟିଏ ଲେଖାଏଁ ଗୋଲ୍ କରିବାକୁ ସମର୍ଥ ହୋଇଥିବା ବେଳେ ଉତ୍ତରପ୍ରଦେଶ ଟିମ୍ ତରଫରୁ ଚନ୍ଦନ ଯାଦବ ଗୋଲ୍ କରିପାରିଥିଲେ । ଅନ୍ୟପଟେ ଉତ୍ତରପ୍ରଦେଶର ଅଜୟ ଯାଦବ ଓ ସୁଜିତ୍ କୁମାର ଗୋଲ୍ କରିବାରେ ବିଫଳ ହୋଇଥିଲେ । ଫଳରେ ସୁଟ୍ଆଉଟ୍ ଜରିଆରେ ଓଡ଼ିଶା ସବ୍ଜୁନିଅର ହକି ଟିମ୍ ଏହି ଚାମ୍ପିଅନ୍ସିପ୍ରେ ୩-୧ ଗୋଲ୍ରେ ଉତ୍ତରପ୍ରଦେଶ ଟିମ୍କୁ ପରାଜିତ କରି ଚାମ୍ପିଅନ୍ ହୋଇଛି । ଅନ୍ୟପଟେ ତୃତୀୟ ସ୍ଥାନ ପାଇଁ ହୋଇଥିବା ମ୍ୟାଚ୍ରେ ଝାଡ଼ଖଣ୍ଡ ଟିମ୍ ସ୍ପୋର୍ଟ୍ସ ଅଥରିଟି ଅଫ୍ ଇଣ୍ଡିଆ ଟିମ୍କୁ ପରାସ୍ତ କରି ତୃତୀୟ ସ୍ଥାନ ହାସଲ କରିଛି । ଝାଡ଼ଖଣ୍ଡ ପକ୍ଷରୁ ମ୍ୟାଚ୍ର ନବମ ମିନିଟ୍ରେ ଫ୍ଲାବିଅସ୍ ତିର୍କି ପ୍ରଥମ ଗୋଲ୍ କରିଥିବା ବେଳେ ପରବର୍ତ୍ତି ଦୁଇଟି କ୍ୱାର୍ଟରରେ କେହି କାହା ବିପକ୍ଷରେ ଗୋଲ୍ କରିପାରି ନଥିଲେ । ଚତୁର୍ଥ କ୍ୱାର୍ଟରରେ ଅର୍ଥାତ ମ୍ୟାଚ୍ର ୪୮ତମ ମିନିଟ୍ରେ ଝାଡ଼ଖଣ୍ଡ ଟିମ୍ର ଦୀପକ୍ ସୋରେଙ୍ଗ୍ ଆଉ ଏକ ଗୋଲ୍ କରି ଟିମ୍କୁ ୨-୦ରେ ଲିଡ୍ କରାଇଥିଲେ । ଶେଷରେ ଝାଡ଼ଖଣ୍ଡର ଯୋଶେଫ୍ ଟପ୍ନୋ ଏକ ପେନାଲିଟି ସଟ୍କୁ ଗୋଲ୍ରେ ରୂପାନ୍ତର କରି ଝାଡ଼ଖଣ୍ଡକୁ ୩-୦ରେ ବିଜୟୀ କରାଇଥିଲେ । ଫଳରେ ଝାଡ଼ଖଣ୍ଡ ଟିମ୍ ତୃତୀୟ ସ୍ଥାନ ହାସଲ କରିଥିବା ବେଳେ ସ୍ପୋର୍ଟ୍ସ ଅଥରିଟି ଅଫ୍ ଇଣ୍ଡିଆ ଟିମ୍କୁ ଚତୁର୍ଥ ସ୍ଥାନରେ ସନ୍ତୁଷ୍ଟ ହେବାକୁ ପଡ଼ିଛି ।

Show More

Leave a Reply

Your email address will not be published. Required fields are marked *

Related Articles