ଯେତେ ଗୁହାରୀ କଲେ ବି ଶୁଣିଲେନି ଶିକ୍ଷକ, ପିଟି ପିଟି କଲେ ଲହୁ ଲୁହାଣ, ଏବେ ନିଶ୍ଵାସ ଛାଡ଼ିଦେଲେ ଛାତ୍ରୀ

ଉତ୍ତରପ୍ରଦେଶ: ଉତ୍ତରପ୍ରଦେଶର ହରଦୋଇ ଜିଲ୍ଲାରେ ଜଣେ ୧୩ ବର୍ଷୀୟା ସ୍କୁଲ୍ ଛାତ୍ରୀଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ଭରଖନୀ ବ୍ଲକ୍‌ର ସଂବିଲିୟନ୍ ବିଦ୍ୟାଳୟ ସାହୁଆପୁରରେ ଅଷ୍ଟମ ଶ୍ରେଣୀରେ ପଢ଼ୁଥିବା ୧୩ ବର୍ଷୀୟା କ୍ଷମା ଦୀକ୍ଷିତଙ୍କ ଚିକିତ୍ସା ସମୟରେ ମୃତ୍ୟୁ ଘଟିଛି।

ଛାତ୍ରୀଙ୍କ ପରିବାର ଅଭିଯୋଗ କରିଛନ୍ତି ଯେ, ସ୍କୁଲ୍‌ର ସହକାରୀ ଶିକ୍ଷକ ରାଜେନ୍ଦ୍ର କୁମାର ଗଙ୍ଗୱାର ତାଙ୍କୁ ମାଡ଼ ମାରିଥିଲେ। ଏହି ଅଭିଯୋଗ ଆଧାରରେ ପୋଲିସ ଶିକ୍ଷକ ଏବଂ ଜଣେ ସହପାଠୀ ଛାତ୍ରୀଙ୍କ ବିରୋଧରେ ଅନିଚ୍ଛାକୃତ ହତ୍ୟା ସମେତ ବିଭିନ୍ନ ଧାରାରେ ମାମଲା ରୁଜୁ କରିଛି।

ପେପର ଦେବାକୁ ଯାଇଥିଲେ ଛାତ୍ରୀ: ପୋଲିସ ଅନୁସାରେ, ଅଗଷ୍ଟ ୨୦ ତାରିଖରେ କ୍ଷମା ପରୀକ୍ଷା ଦେବା ପାଇଁ ସ୍କୁଲ୍ ଯାଇଥିଲେ। ସେଠାରେ ଜଣେ ସହପାଠୀ ଛାତ୍ରୀଙ୍କ ସହ ତାଙ୍କର ବିବାଦ ହୋଇଥିଲା। ଏହା ପରେ କ୍ଷମା ଘଟଣା ସମ୍ପର୍କରେ ସହକାରୀ ଶିକ୍ଷକଙ୍କୁ ଅଭିଯୋଗ କରିଥିଲେ।

ପରିବାରର ଅଭିଯୋଗ ଅନୁସାରେ, ଅଭିଯୋଗ କରିବା ପରେ ଶିକ୍ଷକ ତାଙ୍କୁ ମାଡ଼ ମାରିଥିଲେ। ଏଥିରେ ତାଙ୍କ ହାତରେ ଗୁରୁତର ଆଘାତ ଲାଗିବା ସହ ଫ୍ୟାକ୍ଚର ହୋଇଥିଲା। ଘଟଣାର ତିନି ଦିନ ପରେ, ଅଗଷ୍ଟ ୨୩ରେ ଛାତ୍ରୀଙ୍କ ବାପା ଉମେଶ ଦୀକ୍ଷିତ ଥାନାରେ ଅଭିଯୋଗ କରିଥିଲେ।

ଚିକିତ୍ସାଧୀନ ଅବସ୍ଥାରେ ମୃତ୍ୟୁ: ଅଗଷ୍ଟ ୨୪ରେ ପରିବାର ଛାତ୍ରୀଙ୍କୁ ଚିକିତ୍ସା ପାଇଁ ଫରୁଖାବାଦ ନେଇଥିଲେ। ତେବେ ଚିକିତ୍ସା ଚାଲିଥିବା ବେଳେ ଅଗଷ୍ଟ ୩୦ରେ କ୍ଷମାଙ୍କ ମୃତ୍ୟୁ ଘଟିଥିଲା। ମୃତ୍ୟୁ ପରେ ଫରୁଖାବାଦରେ ପଞ୍ଚନାମା ଓ ପୋଷ୍ଟମର୍ଟମ୍ ପ୍ରକ୍ରିୟା କରାଯାଇଥିଲା। ଏହା ପରେ ବାପାଙ୍କ ଲିଖିତ ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ଛାତ୍ରୀଙ୍କ ଭିଡିଓ ମଧ୍ୟ ସାମ୍ନାକୁ ଆସିଛି: ଘଟଣା ସମ୍ପର୍କରେ ଛାତ୍ରୀଙ୍କ ଏକ ଭିଡିଓ ମଧ୍ୟ ସାମ୍ନାକୁ ଆସିଛି। ଭିଡିଓରେ ସେ ନିଜ ସହ ହୋଇଥିବା କଥିତ ମାଡ଼ ସମ୍ପର୍କରେ କହୁଥିବା ଦେଖାଯାଉଛି। ପୋଲିସ କହିଛି ଯେ ଘଟଣାର ସମସ୍ତ ଦିଗରୁ ତଦନ୍ତ କରାଯାଉଛି। ପୋଷ୍ଟମର୍ଟମ୍ ରିପୋର୍ଟ, ମେଡିକାଲ୍ ଦସ୍ତାବିଜ, ଭିଡିଓ ଏବଂ ଅନ୍ୟାନ୍ୟ ପ୍ରମାଣକୁ ତଦନ୍ତରେ ସାମିଲ କରାଯିବ।

ଦୁଇ ଶିକ୍ଷକ ନିଲମ୍ବିତ: ଘଟଣାକୁ ଗୁରୁତ୍ୱର ସହ ନେଇ ଜିଲ୍ଲା ବେସିକ୍ ଶିକ୍ଷା ଅଧିକାରୀ ସ୍କୁଲ୍‌ର ଇନ୍‌ଚାର୍ଜ ଶିକ୍ଷକ ଅକ୍ଷତ ଏବଂ ଅଭିଯୁକ୍ତ ସହକାରୀ ଶିକ୍ଷକ ରାଜେନ୍ଦ୍ର କୁମାର ଗଙ୍ଗୱାରଙ୍କୁ ନିଲମ୍ବିତ କରିଛନ୍ତି। ବିଭାଗୀୟ ସ୍ତରରେ ମଧ୍ୟ ଘଟଣାର ତଦନ୍ତ ଚାଲିଛି।

ପୋଲିସର କହିବା ଅନୁସାରେ, ବାପାଙ୍କ ଅଭିଯୋଗ ଆଧାରରେ ମାମଲା ରୁଜୁ ହୋଇଛି। ତଦନ୍ତରେ ସାମ୍ନାକୁ ଆସୁଥିବା ତଥ୍ୟ ଆଧାରରେ ପରବର୍ତ୍ତୀ ଆଇନଗତ ପଦକ୍ଷେପ ନିଆଯିବ।