୮ମ ବେତନ କମିଶନ: କେନ୍ଦ୍ରୀୟ କର୍ମଚାରୀଙ୍କ ପାଇଁ ବଡ଼ ଖବର; ପ୍ରଫେସନାଲ୍ ଟ୍ୟାକ୍ସରୁ ମିଳିବ ସମ୍ପୂର୍ଣ୍ଣ ମୁକ୍ତି

8th Pay Commission: କେନ୍ଦ୍ର ସରକାରୀ କର୍ମଚାରୀମାନେ ଅଷ୍ଟମ ବେତନ କମିଶନ ଲାଗୁ ହେବାକୁ ନେଇ ବେଶ୍ ଉତ୍କଣ୍ଠାର ସହ ଅପେକ୍ଷା କରିଛନ୍ତି । ବେତନ କମିଶନ ମଧ୍ୟ ଏହାକୁ ନେଇ ବର୍ତ୍ତମାନ ଆକ୍ସନ୍ ମୋଡ୍‌ରେ ଅଛନ୍ତି । ଦେଶର ବିଭିନ୍ନ ରାଜ୍ୟରେ କର୍ମଚାରୀ ସଂଗଠନ ବା ୟୁନିଅନଗୁଡ଼ିକ ସହ ବୈଠକ କରାଯାଇ ସେମାନଙ୍କର ପରାମର୍ଶ ଓ ଦାବିଗୁଡ଼ିକୁ ଶୁଣାଯାଉଛି ।

ଏହି ସମୟରେ, ନ୍ୟାସନାଲ କାଉନସିଲ୍-ଜଏଣ୍ଟ କନସଲଟେଟିଭ୍ ମେସିନାରୀ (NC-JCM) ର ଷ୍ଟାଫ୍ ପକ୍ଷରୁ କେନ୍ଦ୍ରୀୟ କର୍ମଚାରୀମାନଙ୍କ ପାଇଁ ଏକ ବଡ଼ ଦାବି ଉପସ୍ଥାପନ କରାଯାଇଛି । ରାଜ୍ୟ ସରକାରମାନେ କର୍ମଚାରୀଙ୍କ ଦରମାରୁ କାଟୁଥିବା ପ୍ରଫେସନାଲ୍ ଟ୍ୟାକ୍ସରୁ କେନ୍ଦ୍ରୀୟ କର୍ମଚାରୀଙ୍କୁ ସମ୍ପୂର୍ଣ୍ଣ ରିହାତି ବା ମୁକ୍ତି ଦେବା ପାଇଁ ଏକ ପ୍ରସ୍ତାବ ଆୟୋଗ ସାମ୍ନାରେ ରଖାଯାଇଛି ।

ପ୍ରଫେସନାଲ୍ ଟ୍ୟାକ୍ସ କଣ?

ଭାରତୀୟ ସମ୍ବିଧାନର ଅନୁଚ୍ଛେଦ ୨୭୬ ଅନୁଯାୟୀ, ସମସ୍ତ ରାଜ୍ୟ ସରକାରଙ୍କ ପାଖରେ ନିଜ ରାଜ୍ୟର ଚାକିରିଆ ଓ ବ୍ୟବସାୟୀଙ୍କଠାରୁ ପ୍ରଫେସନାଲ୍ ଟ୍ୟାକ୍ସ ଆଦାୟ କରିବାର ଅଧିକାର ରହିଛି । ଏହା ପ୍ରତି ରାଜ୍ୟରେ ସେମାନଙ୍କର ଟ୍ୟାକ୍ସ ସ୍ଲାବ୍ ଆଧାରରେ କଟାଯାଇଥାଏ । ତେବେ ଏହାର ସର୍ବାଧିକ ସୀମା ବାର୍ଷିକ ୨୫୦୦ ଟଙ୍କା ଧାର୍ଯ୍ୟ କରାଯାଇଛି ।

ପୁରୁଣା ଟ୍ୟାକ୍ସ ବ୍ୟବସ୍ଥା

ଯେଉଁ କେନ୍ଦ୍ରୀୟ କର୍ମଚାରୀମାନେ ପୁରୁଣା ଟ୍ୟାକ୍ସ ବ୍ୟବସ୍ଥା ଚୟନ କରିଛନ୍ତି, ସେମାନଙ୍କୁ ଆୟକର ଅଧିନିୟମର ଧାରା ୧୬(୩) ଅନୁଯାୟୀ ଏହି ପ୍ରଫେସନାଲ୍ ଟ୍ୟାକ୍ସ ଉପରେ ରିହାତି ମିଳିଥାଏ ।

ନୂଆ ଟ୍ୟାକ୍ସ ବ୍ୟବସ୍ଥା

ନୂତନ ଆୟକର ବ୍ୟବସ୍ଥାରେ ଏହି ପ୍ରଫେସନାଲ୍ ଟ୍ୟାକ୍ସ ଉପରେ କୌଣସି ରିହାତିର ସୁବିଧା ନାହିଁ ।

କର୍ମଚାରୀ ୟୁନିଅନର କଣ ରହିଛି ଦାବି?

କର୍ମଚାରୀ ସଂଗଠନଗୁଡ଼ିକର ଯୁକ୍ତି ହେଉଛି ଯେ, କେନ୍ଦ୍ରୀୟ କର୍ମଚାରୀମାନେ ପୂର୍ବରୁ ହିଁ କେନ୍ଦ୍ର ସରକାରଙ୍କୁ ବିପୁଳ ପରିମାଣର ଆୟକର ପ୍ରଦାନ କରୁଛନ୍ତି । ଏହା ସହିତ ଦୈନନ୍ଦିନ ବ୍ୟବହାର୍ଯ୍ୟ ସାମଗ୍ରୀ ଉପରେ ସେମାନେ ଜିଏସଟି ମଧ୍ୟ ଦେଉଛନ୍ତି । ଏହା ପରେ ପୁଣି ଥରେ ରାଜ୍ୟ ସରକାରଙ୍କ ଦ୍ୱାରା ଦରମାରୁ ପ୍ରଫେସନାଲ୍ ଟ୍ୟାକ୍ସ କାଟିବା ସେମାନଙ୍କ ଉପରେ ଅତିରିକ୍ତ ଆର୍ଥିକ ବୋଝ ସଦୃଶ ଅଟେ ।

NC-JCM ପକ୍ଷରୁ ବେତନ କମିଶନଙ୍କୁ ଦିଆଯାଇଥିବା ସ୍ମାରକପତ୍ରରେ କୁହାଯାଇଛି ଯେ, ୮ମ ବେତନ କମିଶନ ନିଜର ଚୂଡ଼ାନ୍ତ ରିପୋର୍ଟରେ ସମସ୍ତ କେନ୍ଦ୍ରୀୟ କର୍ମଚାରୀଙ୍କୁ ପ୍ରଫେସନାଲ୍ ଟ୍ୟାକ୍ସରୁ ସମ୍ପୂର୍ଣ୍ଣ ମୁକ୍ତ କରିବା ପାଇଁ ସୁପାରିଶ ସାମିଲ କରନ୍ତୁ ।

ରାଜ୍ୟ ସରକାରମାନେ କାହିଁକି ପ୍ରଫେସନାଲ୍ ଟ୍ୟାକ୍ସ ନିଅନ୍ତି?

ରାଜ୍ୟ ସରକାରଗୁଡ଼ିକ ପାଖରେ ନିଜସ୍ୱ ରାଜସ୍ୱ ସଂଗ୍ରହ କରିବା ପାଇଁ ସୀମିତ ସାଧନ ଥାଏ, କାରଣ ପ୍ରତ୍ୟକ୍ଷ କର ବା ଡାଇରେକ୍ଟ ଟ୍ୟାକ୍ସର ଏକ ବଡ଼ ଅଂଶ କେନ୍ଦ୍ର ସରକାରଙ୍କ ପାଖକୁ ଯାଇଥାଏ । ତେଣୁ ରାଜ୍ୟରେ ସ୍ୱାସ୍ଥ୍ୟ, ଶିକ୍ଷା ଏବଂ ବିଭିନ୍ନ ସରକାରୀ ଯୋଜନାଗୁଡ଼ିକୁ ସୁଚାରୁରୂପେ ଚଳାଇବା ପାଇଁ ରାଜ୍ୟ ସରକାର ପ୍ରଫେସନାଲ୍ ଟ୍ୟାକ୍ସ ଲଗାଇଥାନ୍ତି ।

ଟଙ୍କାର ବ୍ୟବହାର

ଏହି ଟ୍ୟାକ୍ସ ଜରିଆରେ ଆଦାୟ ହେଉଥିବା ଅର୍ଥକୁ ମ୍ୟୁନିସିପାଲିଟି, ମହାନଗର ନିଗମ କିମ୍ବା ସ୍ଥାନୀୟ ସ୍ୱାୟତ୍ତ ଶାସନ ସଂସ୍ଥାଗୁଡ଼ିକୁ ହସ୍ତାନ୍ତର କରାଯାଏ । ସ୍ଥାନୀୟ ପ୍ରଶାସନ ଏହି ଅର୍ଥକୁ ସହରର ସଫାସୁତୁରା, ପାନୀୟ ଜଳ ଯୋଗାଣ, ରାସ୍ତାଘାଟର ମରାମତି, ଷ୍ଟ୍ରିଟ୍ ଲାଇଟ୍ ଏବଂ ପାର୍କ ଇତ୍ୟାଦିର ବିକାଶ କାର୍ଯ୍ୟରେ ବ୍ୟବହାର କରିଥାନ୍ତି । କର୍ମଚାରୀଙ୍କ ଏହି ନୂଆ ଦାବି ଉପରେ ବେତନ କମିଶନ କଣ ନିଷ୍ପତ୍ତି ନେଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି ।