ଆଶ୍ଚର୍ଯ୍ୟ କରୁଛି ଅଦୃଶ୍ୟ ଚୋରି: ନା ତାଲା ଭାଙ୍ଗିଲା, ନା କବାଟ, ୧୭ ମହଲାରେ କିପରି ହେଲା ଲୁଟ୍?

ତାଲା ନଭାଙ୍ଗି ଆଲମାରିରୁ ୨୭ ଲକ୍ଷର ଗହଣା ଗାୟବ, ଆଶ୍ଚର୍ଯ୍ୟ କରୁଛି ୧୭ତମ ମହଲାରେ ରହସ୍ୟମୟ ଚୋରି।

ମୁମ୍ବାଇ: ମୁମ୍ବାଇର ଏକ ସମ୍ଭ୍ରାନ୍ତ ଅଞ୍ଚଳ ‘ହିରାନନ୍ଦାନୀ ଗାର୍ଡେନ୍ସ’ରେ ଏକ ଚାଞ୍ଚଲ୍ୟକର ଚୋରି ଘଟଣା ସାମ୍ନାକୁ ଆସିଛି। ଏକ ଉଚ୍ଚାଟ୍ଟାଳିକାର ୧୭ତମ ମହଲାରେ ଥିବା ଫ୍ଲାଟରୁ ଚୋରମାନେ କୌଣସି ତାଲା ନ ଭାଙ୍ଗି କିମ୍ବା ଜୋରଜବରଦସ୍ତି ପ୍ରବେଶ ନ କରି ପ୍ରାୟ ୨୫.୯ ଲକ୍ଷ ଟଙ୍କା ମୂଲ୍ୟର ସୁନା ଓ ହୀରା ଅଳଙ୍କାର, ୨୦ଟି ସୁନା ମୁଦ୍ରା ଏବଂ ୭ ଲକ୍ଷର ନଗଦ ଟଙ୍କା ଚୋରି କରି ନେଇଛନ୍ତି। କୌଣସି ତାଲା ନ ଭାଙ୍ଗି ଏତେ ବଡ଼ ଚୋରି କିପରି ହେଲା, ତାହାକୁ ନେଇ ପୋଲିସ ଆଶ୍ଚର୍ଯ୍ୟଚକିତ ହୋଇପଡ଼ିଛି।

କ୍ଷତିଗ୍ରସ୍ତ ପରିବାରର କହିବା ଅନୁଯାୟୀ, ସେମାନେ ୨୦୦୮ ରୁ ୨୦୧୪ ମଧ୍ୟରେ ନିଜର ରୋଜଗାର ଏବଂ ବୋନସ୍‌ରୁ ୨୦ଟି ସୁନା ମୁଦ୍ରା ଯାହା ପ୍ରତ୍ୟେକର ଓଜନ ୧୦ ଗ୍ରାମ ସଂଗ୍ରହ କରିଥିଲେ। ଏହା ବ୍ୟତୀତ, କୁଚ୍‌ ନିକଟରେ ହୋଇଥିବା ଜମି ବିକ୍ରିରୁ ମିଳିଥିବା ନଗଦ ଟଙ୍କା ମଧ୍ୟ ଘରେ ରଖାଯାଇଥିଲା। ଅଗଷ୍ଟ ୨୮ ତାରିଖରେ, ଦମ୍ପତି ସମସ୍ତ ଗହଣା ଓ ନଗଦ ଟଙ୍କା ଯାଞ୍ଚ କରି ଆଲମାରିରେ ସୁରକ୍ଷିତ ଭାବେ ରଖିଥିଲେ ଏବଂ ଚାବିଟିକୁ ନିଜ ଲାପଟପ୍ ବ୍ୟାଗ୍‌ରେ ରଖିଥିଲେ। ତେବେ, ସେପ୍ଟେମ୍ବର ୧୫ ତାରିଖରେ ଯେତେବେଳେ ଆଲମାରି ଖୋଲାଗଲା, ସେତେବେଳେ ସମସ୍ତ ମୂଲ୍ୟବାନ ସାମଗ୍ରୀ ନିଖୋଜ ଥିବା ଦେଖି ପରିବାରବର୍ଗ ସ୍ତବ୍ଧ ହୋଇଯାଇଥିଲେ। ପରବର୍ତ୍ତୀ ସମୟରେ, ସେପ୍ଟେମ୍ବର ୧୬ ତାରିଖରେ ପୋୱାଇ ଥାନାରେ ଏହି ଘଟଣା ସମ୍ପର୍କରେ ଏକ ଏଫ୍‌ଆଇଆର୍ ଦାୟର କରାଯାଇଥିଲା।

ତଦନ୍ତ ସମୟରେ, ସେପ୍ଟେମ୍ବର ୧୬ ତାରିଖ ଦିନ ଘରର ରୋଷେୟା ଯେତେବେଳେ ବାଥରୁମ୍‌ର ନିଷ୍କାସନ ପଥ ସଫା କରୁଥିଲେ, ସେତେବେଳେ ସୁନା ମୁଦ୍ରା ଥିବା ତିନୋଟି ଖାଲି ପ୍ୟାକେଟ୍ ମିଳିଥିଲା। ଏହାକୁ ଆଧାର କରି ପୋଲିସ ସନ୍ଦେହ କରୁଛି ଯେ ଚୋରି ସମୟରେ ଭୁଲବଶତଃ ସେହି ପ୍ୟାକେଟ୍‌ଗୁଡ଼ିକ ନାଳ ମଧ୍ୟରେ ପଡ଼ିଯାଇଥାଇପାରେ।

ପରିବାର ସଦସ୍ୟମାନେ ସେମାନଙ୍କର ପୂର୍ବତନ ଘରୋଇ ସହାୟିକା ଅନିତା ଦେବୀ ପ୍ରସାଦଙ୍କ ଉପରେ ସନ୍ଦେହ ପ୍ରକଟ କରିଛନ୍ତି। ଘର ଭିତରେ ଇନଷ୍ଟାଗ୍ରାମ ରିଲ୍ ତିଆରି କରିବା କାରଣରୁ ତାଙ୍କୁ ଚାକିରିରୁ ବରଖାସ୍ତ କରାଯାଇଥିଲା, କିନ୍ତୁ ଚାକିରି ଛାଡ଼ିବା ପରେ ସେ ଘରର ଚାବି ଫେରାଇ ନଥିଲେ। ତଥାପି, ପୋଲିସ କହିଛି ଯେ ସେ ବର୍ତ୍ତମାନ କେବଳ ଜଣେ ସନ୍ଦିଗ୍ଧ ଅଟନ୍ତି ଏବଂ ଏପର୍ଯ୍ୟନ୍ତ କାହାକୁ ବି ଆନୁଷ୍ଠାନିକ ଭାବେ ଗିରଫ କରାଯାଇନାହିଁ।

ଘଟଣା ସମୟରେ ଆପାର୍ଟମେଣ୍ଟର ସିସିଟିଭି କ୍ୟାମେରାଗୁଡ଼ିକ ବନ୍ଦ ଥିବା କଥା ପୋଲିସର ସନ୍ଦେହକୁ ଆହୁରି ବଢ଼ାଇ ଦେଇଛି। ସନ୍ଦେହ କରାଯାଉଛି ଯେ, ଚୋରମାନେ ପୂର୍ବରୁ ହିଁ ସୁରକ୍ଷା ବ୍ୟବସ୍ଥାର ତ୍ରୁଟି ଏବଂ କ୍ୟାମେରାଗୁଡ଼ିକ କାମ କରୁନଥିବା ବିଷୟରେ ଅବଗତ ଥିଲେ। ବର୍ତ୍ତମାନ ପୋୱାଇ ପୋଲିସ ଭିଜିଟର ରେଜିଷ୍ଟର ଯାଞ୍ଚ କରିବା ସହ ସୁରକ୍ଷା କର୍ମଚାରୀ ଏବଂ ବର୍ତ୍ତମାନର ତଥା ପୂର୍ବତନ କର୍ମଚାରୀମାନଙ୍କୁ ପଚରାଉଚରା କରୁଛି।