ରାଜସ୍ଥାନରେ ବଡ଼ ଦୁର୍ଘଟଣା: ନଦୀରେ ବୁଡ଼ିଲା କାର, ବର ସହିତ ଚାଲିଗଲା ୯ ଜୀବନ
କୋଟା: ରାଜସ୍ଥାନ କୋଟାର ନୟାପୁର ଥାନା ସ୍ଥିତ ଚମ୍ବଲର ଛୋଟ କୁଲଭର୍ଟରେ ବଡ଼ ଦୁର୍ଘଟଣା । ବିଳମ୍ବିତ ରାତିରେ ବାହାଘରକୁ ଯାଉଥିବା ଏକ କାର ନଦୀରେ ଖସି ପଡିବାରୁ ବର ସହିତ ୯ ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି । ପ୍ରାରମ୍ଭିକ ସୂଚନା ଅନୁସାରେ, ଏହି ବାରଯାତ୍ରୀ ଚୌଥର ବରୱାଡାଠାରୁ ଉଜ୍ଜେନ ଯାଉଥିଲା । ଯେଉଁ କାରଟି ନଦୀରେ ବୁଡ଼ିଥିଲା, ସେଥିରେ ବର ସହିତ ୯ ଜଣ ଥିବା ଜଣାପଡିଛି ।
ଏତେ ବଡ଼ ଦୁର୍ଘଟଣାର ସୂଚନା ମିଳିବା ପରେ ଜିଲ୍ଲା ପ୍ରଶାସନ ଘଟଣାସ୍ଥଳରେ ପହଞ୍ଚି ଉଦ୍ଧାରକାରୀ ଟିମ୍ ସହିତ କାରକୁ ବାହାର କରିଥିଲା । ଘଟଣାସ୍ଥଳରେ ଅଧିକ ମାତ୍ରାରେ ପୋଲିସ ମୁତୟନ ହେବା ସହିତ ଲୋକଙ୍କ ଭିଡ଼ ଜମିଥିଲା । ଦୁର୍ଘଟଣା ଖବର ମିଳିବା ପରେ ଜିଲ୍ଲା ଅଧିକାରୀ, ପୋଲିସ ପ୍ରଶାସନ ଓ ଜିଲ୍ଲା ପ୍ରାଶସନ ଘଟଣାସ୍ଥଳରେ ପହଞ୍ଚିଥିଲେ । ଅନ୍ୟପଟେ ଲୋକସଭା ଅଧ୍ୟକ୍ଷ ଓମ୍ ବିରଲା ମଧ୍ୟ ଦୁର୍ଘଟଣାକୁ ନେଇ ଗଭୀର ଶୋକ ପ୍ରକାଶ କରିଛନ୍ତି ।
