ଆଖିପିଛୁଳାକେ ଭୟଙ୍କର ଦୁର୍ଘଟଣା: ଭିଡ଼ ଭିତରକୁ ପଶିଗଲା ଅନିୟନ୍ତ୍ରିତ କାର୍, ଆଉ ତା’ପରେ ସବୁ ଛୀନଛତ୍ର!
ସିଡନୀରେ ଦୁର୍ଘଟଣା: ରଗ୍ବି ଫ୍ୟାନ୍ସଙ୍କ ଭିଡ଼ରେ ପଶିଲା ଅନିୟନ୍ତ୍ରିତ କାର୍, ୯ ଜଣ ଆହତ, ଷଡ଼ଯନ୍ତ୍ର ସନ୍ଦେହରେ ଖୋଳତାଡ଼!
ସିଡ୍ନୀ: ରବିବାର ଦିନ ହେବାକୁ ଥିବା ବଡ଼ ମ୍ୟାଚ୍ ପୂର୍ବରୁ ସମଗ୍ର ସହରରେ ଏକ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା। ନିଜର ପ୍ରିୟ ରଗ୍ବି ଦଳ ‘ନ୍ୟୁକାସଲ୍ ନାଇଟ୍ସ’କୁ ସ୍ୱାଗତ କରିବା ପାଇଁ ରାସ୍ତାରେ ପ୍ରଶଂସକଙ୍କ ପ୍ରବଳ ଭିଡ଼ ଜମିଥିଲା। ଦଳର ବସ୍କୁ ଅପେକ୍ଷା କରିଥିବା ପ୍ରଶଂସକମାନେ ଉତ୍ସାହର ସହ ଉତ୍ଫୁଲ୍ଲିତ ହୋଇ ଚିତ୍କାର କରୁଥିଲେ। କିନ୍ତୁ କିଏ ଜାଣିଥିଲା ଯେ, ମୁହୂର୍ତ୍ତକ ମଧ୍ୟରେ ଏହି ଆନନ୍ଦମୟ ଦୃଶ୍ୟ ଚିତ୍କାର ଓ ରକ୍ତପାତଭରା ଏକ ଭୟଙ୍କର ସ୍ୱପ୍ନରେ ପରିଣତ ହୋଇଯିବ!
ଶନିବାର ସକାଳେ ଅଷ୍ଟ୍ରେଲିଆର ସିଡ୍ନୀ ଉତ୍ତରରେ ଥିବା ନ୍ୟୁକାସଲ୍ରେ ଏକ ହୃଦୟବିଦାରକ ଘଟଣା ଘଟିଛି। ଦ୍ରୁତ ଗତିରେ ଆସୁଥିବା ଏବଂ ନିୟନ୍ତ୍ରଣ ବାହାରକୁ ଚାଲିଯାଇଥିବା ଏକ କାର୍ ହଠାତ୍ ପ୍ରଶଂସକଙ୍କ ଭିଡ଼ ଉପରକୁ ମାଡ଼ିଯାଇଥିଲା। ଆଖି ପିଛଡ଼ାକେ, ମୃତ୍ୟୁର ଦୂତ ସଦୃଶ ସେହି ଗାଡ଼ିଟି ଲୋକଙ୍କ ଉପର ଦେଇ ଚାଲିଯାଇଥିଲା। ଘଟଣାସ୍ଥଳରେ ହଇଚଇ ଓ ଆତଙ୍କ ଖେଳିଯାଇଥିଲା, ଚାରିଆଡ଼େ କେବଳ ଚିତ୍କାର, ରକ୍ତ ଏବଂ ଆହତମାନଙ୍କର ଯନ୍ତ୍ରଣାଦାୟକ ଆର୍ତ୍ତନାଦ ଶୁଣିବାକୁ ମିଳୁଥିଲା।
୯ ଜଣ ଗୁରୁତର ଆହତ, ଜୀବନ ସହ ସଂଘର୍ଷ କରୁଛନ୍ତି: ଏହି ଦୁର୍ଘଟଣାରେ ଅତିକମରେ ୯ ଜଣ ରଗ୍ବି ପ୍ରଶଂସକ ଗୁରୁତର ଆହତ ହୋଇଛନ୍ତି। ଖବର ପାଇବା ମାତ୍ରେ ନ୍ୟୁ ସାଉଥ୍ ୱେଲ୍ସ ଆମ୍ବୁଲାନ୍ସ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରିଥିଲା ଏବଂ ଡାକ୍ତରଖାନାରେ ଭର୍ତ୍ତି କରିଥିଲା। ସୂଚନା ମିଳିଛି ଯେ ସେମାନଙ୍କ ମଧ୍ୟରୁ କେତେକଙ୍କ ଅବସ୍ଥା ଅତ୍ୟନ୍ତ ଗୁରୁତର ରହିଛି।
ଚାଳକ ଗିରଫ, ଦୁର୍ଘଟଣା ନା ବଡ଼ ଷଡ଼ଯନ୍ତ୍ର?
‘ଅଷ୍ଟ୍ରେଲିଆନ୍ ଆସୋସିଏଟେଡ୍ ପ୍ରେସ୍’ ଅନୁଯାୟୀ, ଘଟଣା ପରେ ସ୍ଥାନୀୟ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ସମ୍ପୃକ୍ତ ଚାଳକଙ୍କୁ ଗିରଫ କରିଛି। ତଥାପି, ଏହା କେବଳ ଏକ ନିୟନ୍ତ୍ରଣହୀନ ଗାଡ଼ି ଯୋଗୁଁ ଘଟିଥିବା ଦୁର୍ଘଟଣା ଥିଲା, ନା ଏହା ପଛରେ କୌଣସି ଗଭୀର ଷଡ଼ଯନ୍ତ୍ର କିମ୍ବା ଦୁଷ୍ଟ ଉଦ୍ଦେଶ୍ୟ ରହିଛି, ତାହା ଜାଣିବା ପାଇଁ ପ୍ରଶାସନ ଓ ପୋଲିସ ପକ୍ଷରୁ ଟିକିନିଖି ତଦନ୍ତ କରାଯାଉଛି।
ଏହି ଦୁଃଖଦ ଘଟଣା ପରେ ସିଡ୍ନୀ ସହରରେ ଶୋକ ଓ ଆତଙ୍କର ଛାୟା ଖେଳିଯାଇଛି। ଯେଉଁ ସହରଟି ଗତକାଲି ମାତ୍ର ରଗ୍ବି ଫାଇନାଲ୍କୁ ନେଇ ଉତ୍ସାହରେ ମୁଖରିତ ଥିଲା, ତାହା ବର୍ତ୍ତମାନ କେବଳ ସାଇରନ୍ର ଶବ୍ଦ ଓ ପ୍ରାର୍ଥନାର ସ୍ୱରରେ ପରିପୂର୍ଣ୍ଣ ହୋଇରହିଛି।