ପ୍ରେମିକ ସହ ମିଶି ଜଙ୍ଗଲରେ ପତ୍ନୀ ରଚିଲା ବର୍ବର କାଣ୍ଡ, ଡିଜିଟାଲ ପ୍ରମାଣରୁ ଖୋଲିଲା ଗୁମର, ଲାଇଭ୍ ଲୋକେସନ୍ ପାଲଟିଲା ଜରିଆ

ଓଡ଼ିଶା ଭାସ୍କର ଡେସ୍କ: ଆନ୍ଧ୍ରପ୍ରଦେଶର ଚିତ୍ତୁର ଜିଲ୍ଲାରୁ ଏକ ଚାଞ୍ଚଲ୍ୟକର ହତ୍ୟାକାଣ୍ଡର ଖବର ସାମ୍ନାକୁ ଆସିଛି । ଜଣେ ମହିଳା ନିଜର କଥିତ ପ୍ରେମିକ ସହ ମିଶି ନିଜ ସ୍ୱାମୀକୁ ଅତି ନିର୍ମମ ଭାବେ ହତ୍ୟା କରିଥିବା ଅଭିଯୋଗରେ ପୋଲିସ ଉଭୟଙ୍କୁ ଗିରଫ କରିଛି ।

ଅମାବାସ୍ୟା ଅବସରରେ ଆଶୀର୍ବାଦ ନେବା ପାଇଁ ମନ୍ଦିର ଯିବାର ଏହି କାର୍ଯ୍ୟକ୍ରମ ପ୍ରକୃତରେ ଏକ ସୁଚିନ୍ତିତ ହତ୍ୟାକାଣ୍ଡର ଯୋଜନା ଥିଲା । ପୋଲିସ ସୂଚନା ଅନୁଯାୟୀ, ଡିଜିଟାଲ ପ୍ରମାଣ, ସିସିଟିଭି ଫୁଟେଜ୍ ଏବଂ ବୈଷୟିକ ବିଶ୍ଳେଷଣ ସାହାଯ୍ୟରେ ମାତ୍ର କେଇ ଘଣ୍ଟା ମଧ୍ୟରେ ଏହି ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇପାରିଛି ।

ପ୍ରେମ ପାଇଁ ସ୍ୱାମୀ ସାଜିଲେ ବାଧକ: ମୃତକ ଜଣକ ହେଉଛନ୍ତି ୨୩ ବର୍ଷୀୟ ରମେଶ, ଯିଏକି ତାମିଲନାଡୁର କୃଷ୍ଣଗିରି ଜିଲ୍ଲା ସୁଲାଗିରି ଅଞ୍ଚଳର ବାସିନ୍ଦା ଥିଲେ । ସେ ହୋସୁରର ଏକ ଘରୋଇ କମ୍ପାନୀରେ କାର୍ଯ୍ୟ କରୁଥିଲେ । ପ୍ରାୟ ଦୁଇ ବର୍ଷ ପୂର୍ବେ ଶାନ୍ତିପୁରମର ୧୯ ବର୍ଷୀୟା ହସିନୀଙ୍କ ସହ ତାଙ୍କର ବିବାହ ହୋଇଥିଲା ଏବଂ ସେମାନଙ୍କର ଏକ ଛୋଟ ଝିଅ ମଧ୍ୟ ଅଛି ।

ସମ୍ପର୍କୀୟଙ୍କ ନଜରରେ ସବୁକିଛି ସ୍ୱାଭାବିକ ଥିଲା, କିନ୍ତୁ ପୋଲିସ ତଦନ୍ତରୁ ଜଣାପଡ଼ିଛି ଯେ ବିବାହ ପରେ ବି ହସିନୀଙ୍କର ତାଙ୍କ ପିଲାଦିନର ସାଙ୍ଗ ୨୦ ବର୍ଷୀୟ ଯୁଗନ୍ଧର ସହ ପ୍ରେମ ସମ୍ପର୍କ ରହିଥିଲା । ଏହି କାରଣରୁ ଉଭୟ ମିଶି ରମେଶଙ୍କୁ ରାସ୍ତାରୁ ହଟାଇବାକୁ ନିଷ୍ପତ୍ତି ନେଇଥିଲେ ।

ଲାଇଭ୍ ଲୋକେସନ ସେୟାର୍ କରିଥିଲେ ସ୍ତ୍ରୀ: ହତ୍ୟାକାଣ୍ଡର ଯୋଜନା ମୁତାବକ, ହସିନୀ ଗତ ମଙ୍ଗଳବାର ଦିନ ରମେଶଙ୍କୁ ଗୁଡୁପଲ୍ଲେ ମଣ୍ଡଳର ମଲ୍ଲପ୍ପା କୋଣ୍ଡା ପାହାଡ଼ ଚୂଡ଼ାରେ ଥିବା ‘ଶ୍ରୀ ମଲ୍ଲେଶ୍ୱର ସ୍ୱାମୀ ମନ୍ଦିର’ ଯିବା ପାଇଁ ବାଧ୍ୟ କରିଥିଲେ ।

ଯେତେବେଳେ ରମେଶ ନିଜ ପତ୍ନୀ ଓ ଛୋଟ ଝିଅ ସହ ବାଇକ୍‌ରେ ଯାଉଥିଲେ, ହସିନୀ ଲଗାତାର ଫୋନ୍‌ ମାଧ୍ୟମରେ ପ୍ରେମିକ ଯୁଗନ୍ଧର ସହ ନିଜର ଲାଇଭ୍ ଲୋକେସନ ସେୟାର କରୁଥିଲେ । ଏହାଦ୍ୱାରା ହତ୍ୟାକାରୀମାନଙ୍କୁ ସେମାନଙ୍କ ଗତିବିଧି ଉପରେ ନଜର ରଖିବା ସହଜ ହୋଇଥିଲା ।

ଛୋଟ ଝିଅ ଆଗରେ ଘଟିଲା ବର୍ବର କାଣ୍ଡ: ତଦନ୍ତକାରୀଙ୍କ ଅନୁଯାୟୀ, ପାହାଡ଼ ରାସ୍ତାର ତୃତୀୟ ହେୟାରପିନ୍ ବାଙ୍କ ନିକଟରେ ହତ୍ୟାକାଣ୍ଡ ଘଟାଇବାକୁ ସ୍ଥିର ହୋଇଥିଲା । ହସିନୀ ଜାଣିଶୁଣି ନିଜର ହ୍ୟାଣ୍ଡବ୍ୟାଗ୍‌ଟିକୁ ତଳେ ପକାଇ ଦେଇଥିଲେ, ଯାହାକୁ ଉଠାଇବା ପାଇଁ ରମେଶ ମୋଟରସାଇକେଲ ଅଟକାଇଥିଲେ ।

ଠିକ୍ ସେହି ସମୟରେ ପୂର୍ବରୁ ଲୁଚି ରହିଥିବା ଯୁଗନ୍ଧର ଓ ତାର ସହଯୋଗୀମାନେ ବାହାରକୁ ଆସି ରମେଶଙ୍କୁ ଜଙ୍ଗଲ ଭିତରକୁ ପ୍ରାୟ ୧୦୦ ମିଟର ପର୍ଯ୍ୟନ୍ତ ଗୋଡ଼ାଇ ଗୋଡ଼ାଇ ଧାରୁଆ ଅସ୍ତ୍ରରେ ହତ୍ୟା କରିଥିଲେ । ସବୁଠାରୁ ଦୁଃଖଦ କଥା ହେଉଛି, ଯେତେବେଳେ ଏହି ନୃଶଂସ ହତ୍ୟାକାଣ୍ଡ ଘଟିଥିଲା, ସେତେବେଳେ ଉଭୟଙ୍କର ନିଷ୍ପାପ ଝିଅ ପାଖରେ ହିଁ ଉପସ୍ଥିତ ଥିଲା ।

ଧରାପଡ଼ିଲା ପତ୍ନୀର ଯୋଜନା: ହସିନୀ, ତାର ଝିଅ ଓ ସ୍ଵାମୀ ରମେଶ ଘରକୁ ନଫେରିବାରୁ ହସିନୀଙ୍କ ମା’ ଚିନ୍ତିତ ହୋଇ ପୋଲିସର ଦ୍ୱାରସ୍ଥ ହୋଇଥିଲେ । ପୋଲିସ ମନ୍ଦିର ରାସ୍ତାର ସିସିଟିଭି ଫୁଟେଜ୍ ଯାଞ୍ଚ କରିବା ପରେ ପୂରା ଘଟଣା ସାମ୍ନାକୁ ଆସିଥିଲା ।

ଫୁଟେଜ୍‌ରେ ଦେଖାଯାଇଥିଲା ଯେ ରମେଶ ନିଜ ପତ୍ନୀ ସହ ମନ୍ଦିର ଯାଇଥିଲେ, କିନ୍ତୁ ଫେରିବା ବେଳେ ହସିନୀ ରମେଶଙ୍କ ବାଇକ୍‌ରେ ଅନ୍ୟ ଦୁଇଜଣ ପୁରୁଷଙ୍କ ସହ ସେହି ଅଞ୍ଚଳ ଛାଡ଼ି ଯାଉଛନ୍ତି । ଏହାପରେ ପୋଲିସ ମୋବାଇଲ୍ ଫୋନ୍ ରେକର୍ଡ, ଲୋକେସନ ଡାଟା ଏବଂ ଅନ୍ୟାନ୍ୟ ବୈଷୟିକ ପ୍ରମାଣ ଆଧାରରେ ରମେଶଙ୍କ ମୃତଦେହ ଉଦ୍ଧାର କରିବା ସହ ଅଭିଯୁକ୍ତମାନଙ୍କୁ ଗିରଫ କରିଛି ।

ପୋଲିସ ଏବେ ମୃତକଙ୍କ ପତ୍ନୀ, ତାର ପ୍ରେମିକ ଏବଂ ଅନ୍ୟ ଦୁଇ ସହଯୋଗୀଙ୍କୁ ଗିରଫ କରି ଜେରା କରୁଛି । ଏହା ସହିତ ବିବାହ ସମୟରେ ହସିନୀ ନାବାଳିକା ଥିଲେ ଓ ୯ମ ଶ୍ରେଣୀରେ ପଢୁଥିଲେ ବୋଲି ଗ୍ରାମବାସୀ ଦାବି କରୁଥିବାରୁ, ପୋଲିସ ଏହାର ମଧ୍ୟ ତଦନ୍ତ କରୁଛି । ଯଦି ଏହି ଦାବି ସତ ପ୍ରମାଣିତ ହୁଏ, ତେବେ ବାଲ୍ୟ ବିବାହ ନିରୋଧ ଆଇନ ଅନୁଯାୟୀ ଭିନ୍ନ ମାମଲା ରୁଜୁ କରାଯିବ ବୋଲି ପୋଲିସ କହିଛି ।