ପରକୀୟା ପ୍ରୀତିର ଭୟଙ୍କର ରୂପ: ପ୍ରେମିକ ସହ ମିଶି ସ୍ୱାମୀକୁ ହତ୍ୟା କଲା ସ୍ତ୍ରୀ

ଅମରାବତୀ: ଆନ୍ଧ୍ରପ୍ରଦେଶରୁ ଏକ ଅତି ନିଷ୍ଠୁର ହତ୍ୟାକାଣ୍ଡ ସାମ୍ନାକୁ ଆସିଛି, ଯେଉଁଠି ପରକୀୟା ପ୍ରୀତି ଯୋଗୁଁ ଏଭଳି ଏକ ସାଂଘାତିକ ଷଡ଼ଯନ୍ତ୍ର ରଚାଯାଇଥିଲା। ପୋଲିସ ସୂଚନା ଅନୁସାରେ, ୩୫ ବର୍ଷୀୟ ଡି. ଅପାଲା ନାଇଡୁଙ୍କ ସ୍ତ୍ରୀ ହାଇମା ନିଜ ସ୍ୱାମୀଙ୍କୁ ରାସ୍ତାରୁ ହଟାଇବା ପାଇଁ ସ୍ୱାମୀଙ୍କ ପଇସାରେ ହିଁ ସୁପାରୀ କିଲର (ଭଡ଼ାଟିଆ ଗୁଣ୍ଡା) ମାନଙ୍କୁ ନିୟୋଜିତ କରିଥିଲେ। ଅନାକାପାଲ୍ଲୀ ଜିଲ୍ଲାର ଦେବରାପାଲ୍ଲୀ ମଣ୍ଡଳ ଅନ୍ତର୍ଗତ ଶ୍ରୀରାମପୁରମ ଗାଁର ବାସିନ୍ଦା ନାଇଡୁଙ୍କୁ ଗତ ଜୁଲାଇ ୧ ତାରିଖରେ ତାଙ୍କ ନିଜ ଘର ଭିତରେ ଗଳା ଚିପି ହତ୍ୟା କରାଯାଇଥିଲା।

ପୋଲିସ ତଦନ୍ତରୁ ଜଣାପଡ଼ିଛି ଯେ, ହାଇମାଙ୍କର ଗଙ୍ଗାଧର ନାମକ ଜଣେ ବ୍ୟକ୍ତିଙ୍କ ସହ ଅବୈଧ ସମ୍ପର୍କ ଥିଲା। ହାଇମା ଏହି ସମ୍ପର୍କକୁ ନେଇ ନାଇଡୁ ପ୍ରତିବାଦ କରିବାରୁ, ହାଇମା ନିଜ ପ୍ରେମିକ ଗଙ୍ଗାଧର ଏବଂ ତାଙ୍କ ପୁତୁରା ନାଗାଚରଣଙ୍କ ସହ ମିଶି ନାଇଡୁଙ୍କୁ ମାରିଦେବାକୁ ଯୋଜନା କରିଥିଲେ। ପୋଲିସ କହିବା ଅନୁସାରେ, ଏହି ତିନିଜଣ ମିଶି ଭଡ଼ାଟିଆ ଗୁଣ୍ଡାମାନଙ୍କୁ ପ୍ରାୟ ୧ ଲକ୍ଷ ଟଙ୍କା ଦେଇଥିଲେ। ହାଇମା ନିଜ ସ୍ୱାମୀଙ୍କ ଜମା ଖାତାରୁ ହିଁ ଏହି ସୁପାରୀ ଟଙ୍କା ଆଣିଥିଲେ। ଏହାପରେ ଭଡ଼ାଟିଆ ଗୁଣ୍ଡାମାନେ ଘର ଭିତରେ ପଶି ନାଇଡୁଙ୍କୁ ହତ୍ୟା କରି ସେଠାରୁ ଫେରାର ହୋଇଯାଇଥିଲେ।

ଗତ ଜୁଲାଇ ୫ ତାରିଖରେ ପୋଲିସ ହାଇମା, ଗଙ୍ଗାଧର ଏବଂ ନାଗାଚରଣଙ୍କୁ ଗିରଫ କରିଛି। ତେବେ ଏହି ହତ୍ୟାକାଣ୍ଡକୁ ରୂପ ଦେଇଥିବା ଅନ୍ୟ ଦୁଇ ସନ୍ଦିଗ୍ଧ ପ୍ରକାଶ ଏବଂ ସଫୀର ଏବେ ବି ଫେରାର ଅଛନ୍ତି। ସେମାନଙ୍କୁ ଧରିବା ପାଇଁ ପୋଲିସର ସ୍ୱତନ୍ତ୍ର ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ଏହି ଦୁଃଖଦ ଘଟଣା ପରେ ଦମ୍ପତିଙ୍କ ଦୁଇଟି ଛୋଟ ପିଲା ସମ୍ପୂର୍ଣ୍ଣ ଅନାଥ ହୋଇଯାଇଛନ୍ତି ଏବଂ ସେମାନଙ୍କୁ ଦେଖାଶୁଣା କରିବାକୁ ଏବେ କେହି ନାହାନ୍ତି।