ଡେରାଡୁନରେ ଏସିଆନ୍ ଓପନ୍ ସ୍କେଟିଂ ଟ୍ରଫି ଆରମ୍ଭ, ମୁଖ୍ୟମନ୍ତ୍ରୀ ଧାମୀ କଲେ ଉଦ୍‌ଘାଟନ

ଡେରାଡ଼ୁନ:ଉତ୍ତରାଖଣ୍ଡର ରାଜଧାନୀ ଡେରାଡ଼ୁନ ସ୍ଥିତ ମହାରାଣା ପ୍ରତାପ ସ୍ପୋର୍ଟସ୍ କମ୍ପ୍ଲେକ୍ସରେ ‘ଏସିଆନ୍ ଓପନ୍ ସର୍ଟ ଟ୍ରାକ୍ ସ୍ପିଡ୍ ସ୍କେଟିଂ ଟ୍ରଫି ୨୦୨୬’ ଆନୁଷ୍ଠାନିକ ଭାବେ ଆରମ୍ଭ ହୋଇଯାଇଛି। ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ମୁଖ୍ୟ ଅତିଥି ଭାବେ ଯୋଗଦେଇ ଏହି ପ୍ରତିଯୋଗିତାର ଶୁଭାରମ୍ଭ କରିଛନ୍ତି। ଏହି ଅବସରରେ ସେ ଦେଶବିଦେଶରୁ ଆସିଥିବା ସମସ୍ତ ଖେଳାଳି, ପ୍ରଶିକ୍ଷକ ଏବଂ ଅଧିକାରୀମାନଙ୍କୁ ଦେବଭୂମି ଉତ୍ତରାଖଣ୍ଡକୁ ସ୍ୱାଗତ କରିବା ସହ ଶୁଭେଚ୍ଛା ଜଣାଇଛନ୍ତି।

ମୁଖ୍ୟମନ୍ତ୍ରୀ କହିଛନ୍ତି ଯେ, ଏଭଳି ଏକ ପ୍ରତିଷ୍ଠିତ ଆନ୍ତର୍ଜାତୀୟ ପ୍ରତିଯୋଗିତାର ଆୟୋଜନ କରିବାକୁ ଉତ୍ତରାଖଣ୍ଡକୁ ସୁଯୋଗ ମିଳିଥିବାରୁ ଏହା ରାଜ୍ୟ ପାଇଁ ଅତ୍ୟନ୍ତ ଗର୍ବର ବିଷୟ । ଏହି ଆୟୋଜନ ଦ୍ୱାରା ରାଜ୍ୟଟି ଆଇସ୍ ସ୍ପୋର୍ଟସ୍ ଏବଂ ଶୀତକାଳୀନ କ୍ରୀଡ଼ାର ଏକ ପ୍ରମୁଖ କେନ୍ଦ୍ର ଭାବରେ ବିଶ୍ୱସ୍ତରରେ ପରିଚିତ ହେବ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ଖେଲୋ ଇଣ୍ଡିଆ’ ଏବଂ ‘ଫିଟ୍ ଇଣ୍ଡିଆ’ ଅଭିଯାନ ଯୋଗୁଁ ଦେଶରେ କ୍ରୀଡ଼ା ସଂସ୍କୃତି ଦ୍ରୁତ ଗତିରେ ବୃଦ୍ଧି ପାଉଛି ବୋଲି ମୁଖ୍ୟମନ୍ତ୍ରୀ ମତପ୍ରକାଶ କରିଛନ୍ତି। ଉତ୍ତରାଖଣ୍ଡ ସରକାର ମଧ୍ୟ ରାଜ୍ୟକୁ କ୍ରୀଡ଼ା କ୍ଷେତ୍ରରେ ଅଗ୍ରଣୀ କରିବା ପାଇଁ କ୍ରମାଗତ ଭାବେ କାର୍ଯ୍ୟ କରୁଛନ୍ତି। ରାଜ୍ୟରେ ଆଠଟି ପ୍ରମୁଖ ସହରରେ ୨୩ଟି କ୍ରୀଡ଼ା ଏକାଡେମୀ ସ୍ଥାପନ କରାଯିବା ସହ, ହଲ୍ଦୱାନୀରେ ପ୍ରଥମ କ୍ରୀଡ଼ା ବିଶ୍ୱବିଦ୍ୟାଳୟ ପ୍ରତିଷ୍ଠା ପାଇଁ କାର୍ଯ୍ୟ ଜୋରସୋରରେ ଚାଲିଛି। ଏହାଛଡ଼ା ନୂତନ କ୍ରୀଡ଼ା ନୀତି ଅଧୀନରେ ପଦକ ବିଜେତା ଖେଳାଳିମାନଙ୍କୁ ସରକାରୀ ଚାକିରି ଏବଂ ବିଭିନ୍ନ ପ୍ରୋତ୍ସାହନ ଯୋଜନା ଯୋଗାଇ ଦିଆଯାଉଛି।

ଏହି ରୋମାଞ୍ଚକର ଆନ୍ତର୍ଜାତୀୟ ପ୍ରତିଯୋଗିତାଟି ଅଗଷ୍ଟ ୧୭ରୁ ୨୦ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେଉଛି। ଏହି କାର୍ଯ୍ୟକ୍ରମରେ ବିଧାୟକ ଉମେଶ ଶର୍ମା କାଉ, ଏସିଆନ୍ ସ୍କେଟିଂ ୟୁନିଅନର ଅଧ୍ୟକ୍ଷ ମ୍ୟୋଙ୍ଗ୍ ହି ଚାଙ୍ଗ୍, ଆଇସ୍ ସ୍କେଟିଂ ଆସୋସିଏସନ୍ ଅଫ୍ ଇଣ୍ଡିଆର ଅଧ୍ୟକ୍ଷ ଅମିତାଭ ଶର୍ମା ପ୍ରମୁଖ ଉପସ୍ଥିତ ଥିଲେ।