ୱାଟ୍ସଆପ୍ରେ ବିବାହ ନିମନ୍ତ୍ରଣ ପତ୍ର ଖୋଲୁ ଖୋଲୁ ଖାତା ଖାଲି, ସାଇବର ଠକଙ୍କ ଚାଞ୍ଚଲ୍ୟକର କାଣ୍ଡ!
ସାଇବର ଠକଙ୍କ ନୂଆ ଚାଲ୍: ବିବାହ କାର୍ଡ ନାମରେ ପଠାଉଛନ୍ତି ଭାଇରସ, ମାତ୍ର ଗୋଟିଏ କ୍ଲିକ ଆଉ ତାପରେ ଖାତା ଖାଲି!
ଓଡ଼ିଶା ଭାସ୍କର ଡେସ୍କ: ସାବଧାନ! ସାଇବର ଠକ ଏବେ ଆହୁରି ଆଡଭାନ୍ସ ହୋଇ ଲୋକଙ୍କୁ ଠକୁଛନ୍ତି। ସେଥିପାଇଁ ଯଦି ଆପଣଙ୍କୁ WhatsApp ରେ କୌଣସି ଅଜଣା ନମ୍ବରରୁ ବିବାହ ନିମନ୍ତ୍ରଣ ଆସେ, ତେବେ ଏହାକୁ ଡାଉନଲୋଡ୍ କରିବା ପୂର୍ବରୁ ଭଲଭାବେ ଚିନ୍ତା କରନ୍ତୁ।
ଗୋଟିଏ ଛୋଟ ଭୁଲ୍ ଆପଣଙ୍କୁ ମୁହୂର୍ତ୍ତକ ମଧ୍ୟରେ ସର୍ବସ୍ୱାନ୍ତ କରିଦେଇପାରେ। ଉତ୍ତର ପ୍ରଦେଶର ଜୌନପୁର ଅଞ୍ଚଳର ଜଣେ ଯୁବକ ଏଭଳି ଏକ ଚାଞ୍ଚଲ୍ୟକର ସାଇବର ଠକେଇର ଶିକାର ହୋଇଛନ୍ତି।
ସେପ୍ଟେମ୍ବର ୬ ତାରିଖରେ, ଜୌନପୁରର କୁରେଥୁ ଗ୍ରାମର ବାସିନ୍ଦା ପ୍ରିନ୍ସ ଯାଦବଙ୍କୁ WhatsApp ରେ ଏକ ଅଜଣା ନମ୍ବରରୁ ବିବାହ ନିମନ୍ତ୍ରଣ ବୋଲି କହି ଏକ APK ଫାଇଲ୍ ପଠାଯାଇଥିଲା। ନିମନ୍ତ୍ରଣ ଦେଖିବା ପାଇଁ ପ୍ରିନ୍ସ ଯେମିତି ହିଁ ସେହି ଫାଇଲ୍କୁ ଡାଉନଲୋଡ୍ କରି ଖୋଲିଲେ, ତାଙ୍କ ମୋବାଇଲ୍ ଫୋନ୍ ସମ୍ପୂର୍ଣ୍ଣ ଭାବେ ହ୍ୟାକ୍ ହୋଇଗଲା।
ଆଖି ପିଛୁଳାକେ ତାଙ୍କ ବ୍ୟାଙ୍କ ଆକାଉଣ୍ଟରୁ ୧.୭୬ ଲକ୍ଷ ଟଙ୍କା ଉଭେଇଗଲା! ଫୋନ୍ ହ୍ୟାକ୍ ହେବାର କିଛି ସମୟ ମଧ୍ୟରେ ହିଁ, ଚାରୋଟି ଅଲଗା ଅଲଗା କାରବାର (ଟ୍ରାଞ୍ଜାକ୍ସନ୍) ମାଧ୍ୟମରେ ତାଙ୍କ ୟୁନିଅନ୍ ବ୍ୟାଙ୍କ ଅଫ୍ ଇଣ୍ଡିଆ (ଗୌରାବାଦଶାହପୁର ଶାଖା) ଖାତାରୁ ୧,୭୬,୮୫୦ ଟଙ୍କା ଲୁଟି ନିଆଗଲା। ଟଙ୍କା କଟିଯିବାର ନୋଟିଫିକେସନ୍ ଦେଖି ପ୍ରିନ୍ସ ସ୍ତବ୍ଧ ହୋଇଗଲେ।
ସେ ତୁରନ୍ତ ସାଇବର କ୍ରାଇମ୍ ହେଲ୍ପଲାଇନ୍ (୧୯୩୦) ରେ ଅଭିଯୋଗ କଲେ ଏବଂ ବ୍ୟାଙ୍କ ସହିତ ଯୋଗାଯୋଗ କଲେ। ବ୍ୟାଙ୍କ କର୍ତ୍ତୃପକ୍ଷ ତାଙ୍କୁ ଜଣାଇଲେ ଯେ ଟଙ୍କାଗୁଡ଼ିକ ଏକ Google ID ମାଧ୍ୟମରେ ସ୍ଥାନାନ୍ତର କରାଯାଇଛି।
ପୋଲିସ୍ ଅଜଣା ଅଭିଯୁକ୍ତଙ୍କ ବିରୁଦ୍ଧରେ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ତେଣୁ ଏହି ଘଟଣା ଏବେ ଲୋକଙ୍କ ପାଇଁ ଏକ ସତର୍କ ଘଣ୍ଟି! କୌଣସି ଅଜଣା ମ୍ୟାସେଜ ଖୋଲିବା ପୂର୍ବରୁ ଶହେ ଥର ଭାବନ୍ତୁ।