ବୁମରାଙ୍କ ଆହତ ସମସ୍ୟା ନେଇ ଚିନ୍ତାରେ BCCI, ଦଳରେ ମିଳିପାରେ ନୂଆ ମୁହଁକୁ ସୁଯୋଗ

ନୂଆଦିଲ୍ଲୀ: ଜଶପ୍ରୀତ ବୁମରାଙ୍କ ବାରମ୍ବାର ଆହତ ସମସ୍ୟା କାରଣରୁ ବିସିସିଆଇ ଟେଷ୍ଟ କ୍ରିକେଟ୍ ପାଇଁ ଏକ ନୂତନ ଦ୍ରୁତ ବୋଲିଂ ବାହିନୀ ପ୍ରସ୍ତୁତ କରିବା ପାଇଁ ବାଧ୍ୟ ହୋଇଛି। ତାରକା ପେସ୍ ବୋଲର ବୁମରା ଦଳର ମୁଖ୍ୟ ବିକଳ୍ପ ଭାବେ ରହିବେ, କିନ୍ତୁ ତାଙ୍କ ଅନୁପସ୍ଥିତିରେ ଲମ୍ବା ଫର୍ମାଟରେ ସେହି ସ୍ଥାନ ପୂରଣ କରିପାରିବା ଭଳି ଏକ ଶକ୍ତିଶାଳୀ ବୋଲିଂ ଗ୍ରୁପ୍ ପ୍ରସ୍ତୁତ କରିବା ହେଉଛି ମୂଳ ଲକ୍ଷ୍ୟ। ଭଲ ଓ ଦ୍ରୁତ ବେଗ ଏବଂ ପିଚ୍‌ରୁ ବାଉନ୍ସ ଆଣିବାର କ୍ଷମତା ରଖିଥିବା ଖେଳାଳିମାନଙ୍କୁ ପରିଚାଳନା କର୍ତ୍ତୃପକ୍ଷ ଖୋଜୁଛନ୍ତି।
ଭାରତୀୟ ବୋଲିଂ ଲାଇନଅପରେ ବୁମରା ଏକ ଗୁରୁତ୍ୱପୂର୍ଣ୍ଣ ସ୍ଥାନ ଅଧିକାର କରିଆସିଛନ୍ତି, କିନ୍ତୁ ଗତ କିଛି ବର୍ଷ ଭିତରେ ବାରମ୍ବାର ଆହତ ହେବା ଏବଂ ବୋଲିଂ ପରିଚାଳନା ଚିନ୍ତା ଯୋଗୁଁ ଭାରତୀୟ ଟେଷ୍ଟ ଦଳକୁ ବହୁତ କ୍ଷତି ସହିବାକୁ ପଡ଼ିଛି। ବୁମରାଙ୍କ ବୟସ ବଢ଼ୁଥିବାରୁ ଦଳରେ ପରିବର୍ତ୍ତନ ଆଣିବା ପାଇଁ ବିସିସିଆଇ ମଧ୍ୟ ଯୋଜନା ପ୍ରସ୍ତୁତ କରିଛି। ତେବେ ଦଳ ପାଇଁ ବୁମରା ଏବେ ବି ଅତ୍ୟନ୍ତ ମୂଲ୍ୟବାନ, କିନ୍ତୁ ଖେଳାଳି ଜଣକ ସବୁବେଳେ ଉପଲବ୍ଧ ନ ରହିପାରନ୍ତି। ବିଶେଷକରି ଆଗକୁ ଦିନିକିଆ ବିଶ୍ୱକପ୍ ଥିବାରୁ ଏହା ଅଧିକ ଗୁରୁତ୍ୱପୂର୍ଣ୍ଣ।

ବର୍ତ୍ତମାନର ଦ୍ରୁତ ବୋଲିଂ ଲାଇନଅପରେ ମହମ୍ମଦ ସିରାଜ ଆଉ ଜଣେ ନିର୍ଭରଯୋଗ୍ୟ ବିକଳ୍ପ ଅଛନ୍ତି, ଯିଏ କୌଣସି ସହାୟତା ମିଳୁନଥିବା ପିଚ୍‌ରେ ମଧ୍ୟ ନିଜର ଦମଦାର ପ୍ରଦର୍ଶନ ଜାରି ରଖିବା ପାଇଁ ଜଣାଶୁଣା। ତଥାପି ବୁମରା ଏବଂ ସିରାଜଙ୍କ ବ୍ୟତୀତ, ଆନ୍ତର୍ଜାତୀୟ ସ୍ତରରେ ବିପକ୍ଷ ବ୍ୟାଟ୍ସମ୍ୟାନ୍‌ମାନଙ୍କୁ କ୍ରମାଗତ ଭାବେ ଚିନ୍ତାରେ ପକାଇବା ଭଳି ଅନ୍ୟ କୌଣସି ଦ୍ରୁତ ବୋଲର ଭାରତ ପାଖରେ ଅଛନ୍ତି କି ନାହିଁ, ତାହାକୁ ହେଉଛି ମୁଖ୍ୟ ଚିନ୍ତାର କାରଣ।

ମହମ୍ମଦ ସାମୀଙ୍କ ସ୍ଥିତି ମଧ୍ୟ ସମସ୍ତଙ୍କ ନଜରଟାଣିଛି। ଆଣ୍ଠୁରେ ଗଭୀର ଆହତ ସମସ୍ୟାରୁ ଫେରିବା ପରେ, ଏହି ଅଭିଜ୍ଞ ପେସ୍ ବୋଲର ବଙ୍ଗଳା ପାଇଁ ରଣଜୀ ଟ୍ରଫିରେ ଜବରଦସ୍ତ ପ୍ରଦର୍ଶନ କରିଥିଲେ ଏବଂ ଏକାକୀ ବୋଲିଂ ଲାଇନଅପର ନେତୃତ୍ୱ ନେଇଥିଲେ। ଏଭଳି ଭଲ ପ୍ରଦର୍ଶନ ସତ୍ତ୍ୱେ ଚୟନକର୍ତ୍ତା ଏବଂ ଟିମ୍ ମ୍ୟାନେଜମେଣ୍ଟ ତାଙ୍କୁ ଦଳରେ ସାମିଲ କରିନଥିଲେ, ଯାହା ସୂଚାଉଛି ଯେ ସେ ବୋଧହୁଏ ଏବେ ଭାରତର ଆଗାମୀ ଟୁର୍ଣ୍ଣାମେଣ୍ଟ ପାଇଁ ଆଉ ଲିଷ୍ଟରେ ନାହାନ୍ତି।

ତଥାପି ମ୍ୟାନେଜମେଣ୍ଟ ସେହିଭଳି ଜଣେ ଭଲ ଖେଳାଳି ଚାହୁଁଛି, ଯେଉଁଥିପାଇଁ ବର୍ତ୍ତମାନ ତୁଷାର ଦେଶପାଣ୍ଡେ, ଗୁରଜପ୍ରୀତ ସିଂହ ଏବଂ ନଚିକେତ ଭୁଟେଙ୍କ ଉପରେ ନଜର ରଖାଯାଇଛି। ଏହି ସମସ୍ତ ବୋଲର ଭଲ ବେଗ ସୃଷ୍ଟି କରିପାରିବେ ଏବଂ ଯଦି ଭାରତ ଡବ୍ଲୁଟିସି ଫାଇନାଲ୍ ଦୌଡ଼ରୁ ବାଦ୍ ପଡ଼େ, ତେବେ ସେମାନଙ୍କୁ ଦଳରେ ଅଣାଯାଇପାରେ ଏବଂ ଏହି ବୋଲରମାନେ ନ୍ୟୁଜିଲାଣ୍ଡ ଗସ୍ତ ପାଇଁ ଦଳରେ ସାମିଲ ହୋଇପାରନ୍ତି।

“ଯଦି ନ୍ୟୁଜିଲାଣ୍ଡ ଗସ୍ତ ସମୟରେ ଆମେ ଜାଣିବାକୁ ପାଉ ଯେ ଆମର (ଡବ୍ଲୁଟିସି) ଫାଇନାଲ୍ ଖେଳିବାର ସମ୍ଭାବନା ଆଉ ନାହିଁ, ତେବେ ଆମକୁ ତୁଷାର ଦେଶପାଣ୍ଡେ, ଗୁରଜପ୍ରୀତ ସିଂହ ଏବଂ ନଚିକେତ ଭୁଟେଙ୍କ ଭଳି ଦ୍ରୁତ ବୋଲରଙ୍କୁ ଅଧିକ ସୁଯୋଗ ଦେବା ଆରମ୍ଭ କରିବା ଉଚିତ। ଏହି ବୋଲରମାନେ ଭଲ ବେଗ ସୃଷ୍ଟି କରିପାରିବେ। ଯେପର୍ଯ୍ୟନ୍ତ ଆପଣ ସେମାନଙ୍କୁ ଚେଷ୍ଟା ନ କରିଛନ୍ତି, ସେପର୍ଯ୍ୟନ୍ତ ଆପଣ କେବେବି ଜାଣିପାରିବେ ନାହିଁ ଯେ ସେମାନେ ଆନ୍ତର୍ଜାତୀୟ ସ୍ତରରେ କିପରି ପ୍ରଦର୍ଶନ କରୁଛନ୍ତି,’ ବୋଲି ‘ଦି ଟେଲଗ୍ରାଫ୍‌’କୁ ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି ।

୨୦୨୪-୨୫ ଅଷ୍ଟ୍ରେଲିଆ ଗସ୍ତ ସମୟରେ ବୁମରାଙ୍କ ଉପରେ ଭାରତର ନିର୍ଭରଶୀଳତା ସ୍ପଷ୍ଟ ଭାବେ ବାରି ହୋଇପଡ଼ିଥିଲା, ଯେଉଁଠାରେ ଦଳକୁ ୧-୩ରେ ସିରିଜ୍ ହାରିବାକୁ ପଡ଼ିଥିଲା। ଯେତେବେଳେ ବୁମରା ସଫଳତା ଦେଇ ପାରୁନଥିଲେ, ସେତେବେଳେ ଦଳର ସମସ୍ୟା ଆହୁରି ବଢ଼ିଯାଉଥିଲା। ଯଦିଓ ଭାରତ ଗତବର୍ଷ ଇଂଲଣ୍ଡରେ ସିରିଜ୍ ୨-୨ରେ ଡ୍ର ରଖିବାରେ ସଫଳ ହୋଇଥିଲା, କିନ୍ତୁ ସେଥିରେ ବ୍ୟାଟିଂ ପ୍ରଦର୍ଶନ ଏବଂ ଇଂଲଣ୍ଡର ଖରାପ ସଟ୍ ଚୟନ ଏକ ବଡ଼ ଭୂମିକା ଗ୍ରହଣ କରିଥିଲା।

ଇଂଲଣ୍ଡରେ ସମସ୍ତ ପାଞ୍ଚଟି ଟେଷ୍ଟରୁ ବୁମରାଙ୍କ ଅନୁପସ୍ଥିତି ଅନ୍ୟାନ୍ୟ ଦ୍ରୁତ ବୋଲିଂ ବିକଳ୍ପଗୁଡ଼ିକୁ ନେଇ ଚୟନ ନିଷ୍ପତ୍ତିକୁ ମଧ୍ୟ ଆଲୋକପାତ କରିଥିଲା। ବାମହାତୀ ଦ୍ରୁତ ବୋଲର ଅର୍ଶଦୀପ ସିଂହ, ଯିଏ ଉଭୟ ପାର୍ଶ୍ୱରେ ବଲ୍ ଘୂରାଇ ପାରନ୍ତି, ତାଙ୍କୁ ସେହି ସିରିଜରେ କୌଣସି ସୁଯୋଗ ଦିଆଯାଇ ନଥିଲା। ଏହାର ପରିବର୍ତ୍ତେ ଅଂଶୁଲ କମ୍ବୋଜ ମ୍ୟାଞ୍ଚେଷ୍ଟରରେ ଚତୁର୍ଥ ଟେଷ୍ଟ ଖେଳିଥିଲେ କିନ୍ତୁ ତାଙ୍କୁ ପୁଣି ଚୟନ କରାଯାଇ ନଥିଲା। ସେବେଠାରୁ କମ୍ବୋଜ ଦଳର ନିୟମିତ ଖେଳାଳି ହୋଇପାରି ନାହାନ୍ତି ଏବଂ ଶ୍ରୀଲଙ୍କା ସିରିଜ୍ ପାଇଁ ଔକିବ ନବୀଙ୍କୁ ସୁଯୋଗ ଦିଆଯାଇଛି।