ନିଃସନ୍ତାନ ମହିଳାଙ୍କୁ କରନ୍ତୁ ଗର୍ଭବତୀ, ପାଆନ୍ତୁ ୧୦ ଲକ୍ଷ, ପୁଣି ଫେରିଲା ପୁରୁଣା ସ୍କାମ୍, ଏଥର କିନ୍ତୁ ନୂଆ ଶିକାର

Cyber Alert: ବିହାରରୁ ଏକ ଭିନ୍ନ ଧରଣର ଠକେଇ ମାମଲା ସାମ୍ନାକୁ ଆସିଛି, ଯେଉଁଥିରେ କୁହାଯାଇଛି ଯେ ଜଣେ ନିଃସନ୍ତାନ ମହିଳାଙ୍କୁ ଗର୍ଭବତୀ କରେଇଲେ ଆପଣଙ୍କୁ ୧୦ ଲକ୍ଷ ଟଙ୍କା ମିଳିବ । ଏହି ଠକେଇର ବିଜ୍ଞାପନ ସୋସିଆଲ ମିଡିଆରେ “ଅଲ୍ ଇଣ୍ଡିଆ ପ୍ରେଗ୍ନେନ୍ସି ଜବ୍” ନାମରେ ପୋଷ୍ଟ କରାଯାଇଥିଲା। ଏଥିପାଇଁ ପଞ୍ଜିକରଣ ଫି ଆଦାୟ କରାଯାଉଛି ଏବଂ ଅନେକ ଲୋକ ଏହାର ଶିକାର ମଧ୍ୟ ହେଉଛନ୍ତି ।

ଏହି ଠକେଇ ଏକ ପୁରୁଣା ଠକେଇ, ଯାହା ଗତ କିଛି ମାସ ପୂର୍ବରୁ ମଧ୍ୟ ସାମ୍ନାକୁ ଆସିଥିଲା । ଏବେ ପୋଲିସ କାର୍ଯ୍ୟାନୁଷ୍ଠାନରୁ ଜଣାପଡିଛି ଯେ ବିହାରରେ ଏବେ ବି ଏହି ଠକେଇ ଚାଲିଛି। ଅନେକ ଲୋକ ଏହି ଠକେଇର ଶିକାର ମଧ୍ୟ ହୋଇଛନ୍ତି ଏବଂ ଟଙ୍କା ହରାଇଛନ୍ତି।

ରିପୋର୍ଟ ଅନୁଯାୟୀ, ବିହାରର ନୱାଡା ସାଇବର ପୋଲିସ ଏକ ଗ୍ୟାଙ୍ଗର ପର୍ଦ୍ଦାଫାସ କରିଛି ଯେଉଁମାନେ ନିଃସନ୍ତାନ ମହିଳାଙ୍କୁ ଗର୍ଭଧାରଣ, ଶସ୍ତା ଋଣ ପ୍ରଦାନ ଏବଂ ନକଲି ଚାକିରି ପ୍ରଦାନ କରି ଲୋକଙ୍କୁ ଠକୁଥିଲେ। ପୋଲିସ ନୱାଡା ନିବାସୀ ରଞ୍ଜନ କୁମାରଙ୍କୁ ଗିରଫ କରିଛି ଏବଂ ଏହି ମାମଲାରେ ଜଣେ ନାବାଳକଙ୍କୁ ମଧ୍ୟ ଅଟକ ରଖିଛି।

ଠକମାନେ “ପ୍ଲେବୟ ସର୍ଭିସ୍”, “ଧାନି ଫାଇନାନ୍ସ” ଏବଂ “ଏସବିଆଇ ଶସ୍ତା ଋଣ” ଭଳି ଭ୍ରାମକ ବିଜ୍ଞାପନ ବ୍ୟବହାର କରି ଲୋକଙ୍କୁ ଠକିଥିଲେ। ସେମାନେ ଏହି ବିଜ୍ଞାପନଗୁଡ଼ିକୁ ଫେସବୁକ୍ ଏବଂ ହ୍ୱାଟସଆପରେ ସେୟାର କରିଥିଲେ ଏବଂ ଲୋକମାନେ ସେମାନଙ୍କ ଜାଲରେ ପଡ଼ି ଯାଇଥିଲେ।

ଲୋକମାନେ ବିଜ୍ଞାପନ ଦେଖିବା ପରେ ସେମାନଙ୍କ ସହିତ ଯୋଗାଯୋଗ କରିଥିଲେ । ସେତେବେଳେ ସେମାନଙ୍କୁ କୁହାଯାଥିଲା ଯେ, ଯଦି ସେମାନେ ଜଣେ ନିଃସନ୍ତାନ ମହିଳାଙ୍କୁ ଗର୍ଭବତୀ କରନ୍ତି, ତେବେ ସେମାନଙ୍କୁ ୧୦ ଲକ୍ଷ ଟଙ୍କା ମିଳିବ। ସେମାନେ ଏହା ମଧ୍ୟ ପ୍ରତିଶ୍ରୁତି ଦେଇଥିଲେ ଯେ, ଯଦି ସେମାନେ ତାଙ୍କୁ ଗର୍ଭବତୀ କରିବାରେ ବିଫଳ ହୁଅନ୍ତି, ତେବେ ମଧ୍ୟ ସେମାନଙ୍କୁ ଅଧା ଟଙ୍କା ମିଳିବ।

ପଞ୍ଜିକରଣ ଫିସ୍, ହୋଟେଲ୍ ଖର୍ଚ୍ଚ ଏବଂ ଅନ୍ୟାନ୍ୟ ଫିସ୍ ନାମରେ ପୀଡିତମାନଙ୍କଠାରୁ ଟଙ୍କା ମାଗୁଥିବା ବେଳେ ଏହି ଠକେଇ ଆରମ୍ଭ ହୋଇଥିଲା। ପୀଡିତମାନେ ଠକାମି ଶିକାର ହେଉଥିବା ଅନୁଭବ କରିବା ପର୍ଯ୍ୟନ୍ତ ଏହି ଚାନ୍ଦା ଆଦାୟ ଜାରି ରହିଥିଲା। ଲୋକଲଜ୍ଜା ଭୟରେ, ଅଧିକାଂଶ ପୀଡିତ ପୋଲିସ ସହିତ ଯୋଗାଯୋଗ କରିନଥିଲେ।

ପୋଲିସ ରଞ୍ଜନ କୁମାର ଏବଂ ଗିରଫ ହୋଇଥିବା ନାବାଳକଙ୍କଠାରୁ ଠକେଇରେ ବ୍ୟବହୃତ ଚାରୋଟି ମୋବାଇଲ୍ ଫୋନ୍ ମଧ୍ୟ ଜବତ କରିଛି। ପୋଲିସର ସୂଚନା ଅନୁଯାୟୀ, ପୂର୍ବରୁ ନୱାଡା ଜିଲ୍ଲାରେ ସମାନ ମାମଲା ରିପୋର୍ଟ ହୋଇଛି।