OSM ପଲିସି ଆଣିବା ପାଇଁ CBSE ନିଜେ ଟେଣ୍ଡରରେ କରିଥିଲା ହେରଫେର! ଦ୍ୱାଦଶ ଶ୍ରେଣୀର ଛାତ୍ରଙ୍କ ଦାବିରୁ ପଦାକୁ ଆସିଲା ସତ

CBSE OSM Tender Controversy : ଦେଶବ୍ୟାପୀ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ବୋର୍ଡ ପରୀକ୍ଷା ଫଳାଫଳକୁ ପ୍ରଭାବିତ କରୁଥିବା CBSE ର ଅନ୍-ସ୍କ୍ରିନ୍ ମାର୍କିଂ (OSM) ସିଷ୍ଟମ୍ ଏବେ ଗମ୍ଭୀର ବିବାଦ ଘେରରେ ରହିଛି। ଏହି ବିବାଦର ସୂତ୍ରପାତ କୌଣସି ରାଜନୈତିକ ଦଳ କିମ୍ବା ତଦନ୍ତକାରୀ ସଂସ୍ଥା ନୁହେଁ, ବରଂ ଝାଡ଼ଖଣ୍ଡର ଜଣେ ୧୭ ବର୍ଷୀୟ ଛାତ୍ର କରିଛନ୍ତି। ସାର୍ଥକ ସିଦ୍ଧାନ୍ତ ନାମକ ଏହି ଛାତ୍ର ଦାବି କରିଛନ୍ତି ଯେ, CBSE OSM ସିଷ୍ଟମ୍ ପାଇଁ ଟେଣ୍ଡର ଜାରି କରିବା ସମୟରେ ଅନେକ ଗୁରୁତ୍ୱପୂର୍ଣ୍ଣ ନିୟମରେ ପରିବର୍ତ୍ତନ କରିଥିଲା, ଯାହାଦ୍ୱାରା ଏକ ନିର୍ଦ୍ଦିଷ୍ଟ କମ୍ପାନୀ ଲାଭବାନ ହୋଇଛି।

ଏହି ଛାତ୍ରଙ୍କ ଅଭିଯୋଗ ଏତେ ବଡ଼ ରୂପ ନେଇଛି ଯେ ବିରୋଧୀ ଦଳର ନେତା, ଅନେକ ରାଜନୈତିକ ଦଳ ଏବଂ ଶିକ୍ଷା କ୍ଷେତ୍ର ସହ ଜଡ଼ିତ ବ୍ୟକ୍ତିବିଶେଷ ମଧ୍ୟ ଏହି ମାମଲାରେ ପ୍ରଶ୍ନ ଉଠାଇବା ଆରମ୍ଭ କରିଛନ୍ତି। ଏବେ ଏହି ମାମଲା କେବଳ ଟେଣ୍ଡର ପ୍ରକ୍ରିୟାରେ ସୀମିତ ରହିନାହିଁ, ବରଂ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ଏବଂ ପରୀକ୍ଷା ବ୍ୟବସ୍ଥାର ସ୍ୱଚ୍ଛତା ଉପରେ ମଧ୍ୟ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି। ଆସନ୍ତୁ ଜାଣିବା, OSM ପ୍ରକ୍ରିୟା ପାଇଁ CBSE ପ୍ରକୃତରେ ଟେଣ୍ଡର ପ୍ରକ୍ରିୟାରେ ହେରଫେର୍ କରିଥିଲା କି ଏବଂ ଏହି ୧୭ ବର୍ଷୀୟ ଛାତ୍ର କ’ଣ ବଡ଼ ଦାବି କରିଛନ୍ତି।

ସାର୍ଥକ ସିଦ୍ଧାନ୍ତ କିଏ?

ସାର୍ଥକ ସିଦ୍ଧାନ୍ତ ହେଉଛନ୍ତି ଝାଡ଼ଖଣ୍ଡର ଜଣେ ଦ୍ୱାଦଶ ଶ୍ରେଣୀର ଛାତ୍ର। ସେ ନିଜକୁ OSM ସିଷ୍ଟମ୍ ଦ୍ୱାରା ପ୍ରଭାବିତ ଛାତ୍ରମାନଙ୍କ ମଧ୍ୟରୁ ଜଣେ ବୋଲି କହିଛନ୍ତି। ନିଜ ପରୀକ୍ଷା ଫଳାଫଳ ଏବଂ ଉତ୍ତର ଖାତାକୁ ନେଇ ସନ୍ତୁଷ୍ଟ ନହେବା ପରେ, ସେ କେନ୍ଦ୍ରୀୟ ସାର୍ବଜନୀନ କ୍ରୟ ପୋର୍ଟାଲ (CPPP) ରେ ଉପଲବ୍ଧ CBSE ର ଟେଣ୍ଡର ଦଲିଲଗୁଡ଼ିକର ଅନୁଧ୍ୟାନ କରିବା ଆରମ୍ଭ କରିଥିଲେ। ଅନେକ ଦିନ ଧରି ଭିନ୍ନ ଭିନ୍ନ ଟେଣ୍ଡର ଦଲିଲଗୁଡ଼ିକୁ ତୁଳନା କରିବା ପରେ ସେ ନିଜର ନିଷ୍କର୍ସଗୁଡ଼ିକୁ ଏକ ବ୍ଲଗ୍ ଆକାରରେ ପୋଷ୍ଟ କରିଛନ୍ତି। ତାଙ୍କ ଦାବି ଅନୁଯାୟୀ, ସେ ଟେଣ୍ଡର ପ୍ରକ୍ରିୟାରେ ପ୍ରାୟ ୧୫ଟି ଏପରି ଗଡ଼ବଡ଼ି ଖୋଜି ପାଇଛନ୍ତି, ଯାହା ସନ୍ଦେହ ସୃଷ୍ଟି କରୁଛି।

OSM ପ୍ରକ୍ରିୟା ପାଇଁ କ’ଣ CBSE ଟେଣ୍ଡରରେ ହେରଫେର୍ କରିଥିଲା?

ବର୍ତ୍ତମାନ ସୁଦ୍ଧା ଏହା କେବଳ ଅଭିଯୋଗ ଏବଂ ଦାବିର ମାମଲା, ଯାହାର ତଦନ୍ତ ଏବଂ ସମୀକ୍ଷା ପାଇଁ ଦାବି କରାଯାଉଛି। ଝାଡ଼ଖଣ୍ଡର ୧୭ ବର୍ଷୀୟ ଛାତ୍ର ସାର୍ଥକ ସିଦ୍ଧାନ୍ତ ଦାବି କରିଛନ୍ତି ଯେ, CBSE OSM ସିଷ୍ଟମ୍ ପାଇଁ ଟେଣ୍ଡର ଜାରି କଲାବେଳେ କିଛି ନିୟମ ଏବଂ ଯୋଗ୍ୟତା ସର୍ତ୍ତରେ ପରିବର୍ତ୍ତନ କରିଥିଲା, ଯାହା ଅଭିଯୋଗ ମୁତାବକ ଗୋଟିଏ ନିର୍ଦ୍ଦିଷ୍ଟ କମ୍ପାନୀକୁ ସୁବିଧା ଦେଇଛି। ଛାତ୍ରଜଣକ ନିଜ ବ୍ଲଗରେ ଟର୍ନଓଭର, ବ୍ଲାକଲିଷ୍ଟିଂ, ବୈଷୟିକ ଯୋଗ୍ୟତା ଏବଂ ଡାଟା ସେଣ୍ଟର ଭଳି ଅନେକ ସର୍ତ୍ତରେ ହୋଇଥିବା ପରିବର୍ତ୍ତନ ଆଡ଼କୁ ଇଙ୍ଗିତ କରିଛନ୍ତି।

ଅନ୍ୟପକ୍ଷରେ, CBSE ଏହି ସମସ୍ତ ଅଭିଯୋଗକୁ ଖଣ୍ଡନ କରି କହିଛି ଯେ, ସମସ୍ତ କ୍ରୟ ପ୍ରକ୍ରିୟା ନିର୍ଦ୍ଧାରିତ ସରକାରୀ ନିୟମ ଏବଂ ପ୍ରକ୍ରିୟା ଅନୁଯାୟୀ କରାଯାଇଛି। ବର୍ତ୍ତମାନ, ଆଇଆଇଟି ମାଡ୍ରାସ ଏବଂ ଆଇଆଇଟି କାନପୁରର ବିଶେଷଜ୍ଞମାନେ ଏହି ସମଗ୍ର ମାମଲାର ବୈଷୟିକ ତଦନ୍ତ କରୁଛନ୍ତି।

ଏହି ୧୭ ବର୍ଷୀୟ ଛାତ୍ର ସାର୍ଥକ ସିଦ୍ଧାନ୍ତ CBSE ର OSM ଟେଣ୍ଡର ପ୍ରକ୍ରିୟାକୁ ନେଇ ଗମ୍ଭୀର ଅଭିଯୋଗ ଆଣିଛନ୍ତି।

• ଟର୍ନଓଭର ସୀମାରେ ପରିବର୍ତ୍ତନ: ଛାତ୍ରଙ୍କ ଅଭିଯୋଗ ଅନୁଯାୟୀ, CBSE ଟେଣ୍ଡର ସର୍ତ୍ତରେ କମ୍ପାନୀର ବାର୍ଷିକ ହାରାହାରି ଟର୍ନଓଭର ସୀମାକୁ ଏଭଳି ଭାବେ ନିର୍ଦ୍ଧାରଣ କରିଥିଲା (ପାଖାପାଖି ୫୦ କୋଟି), ଯାହାଦ୍ୱାରା ‘Coempt Edu Tech’ ଭଳି କମ୍ପାନୀକୁ ଯୋଗ୍ୟତା ହାସଲ କରିବାରେ ସୁବିଧା ହୋଇଥିଲା।
• ଖରାପ ରେକର୍ଡ ଥିବା କମ୍ପାନୀକୁ ସୁଯୋଗ: ପୂର୍ବରୁ ଖରାପ ପ୍ରଦର୍ଶନ କିମ୍ବା ଅଧୁରା ପ୍ରକଳ୍ପ ଛାଡ଼ିଥିବା କମ୍ପାନୀଗୁଡ଼ିକୁ ବାଦ୍ ଦେବାର ନିୟମ ଥିଲା। ସାର୍ଥକଙ୍କ ଦାବି ମୁତାବକ, ଏହି କଠୋର ସର୍ତ୍ତକୁ ପରେ କୋହଳ କରାଯାଇଥିଲା, ଯାହା ଦ୍ୱାରା ବିବାଦୀୟ କମ୍ପାନୀଗୁଡ଼ିକ ମଧ୍ୟ ପ୍ରତିଯୋଗିତାରେ ସାମିଲ ହୋଇପାରିଲେ।
• ବ୍ଲାକଲିଷ୍ଟ ନିୟମରେ କୋହଳ: ପୂର୍ବରୁ କୌଣସି ପରୀକ୍ଷା ବିବାଦରେ ନାମ ଆସିଥିବା ‘Globarena Technologies’ (ଯାହା ଏବେ Coempt Edu Tech) କୁ ସୁହାଇବା ପାଇଁ CBSE ନିୟମ ବଦଳାଇଥିଲା। ‘Previously Blacklisted’ (ପୂର୍ବରୁ ବ୍ଲାକଲିଷ୍ଟ) ବଦଳରେ ‘Currently Blacklisted’ ଶବ୍ଦ ବ୍ୟବହାର କରି କମ୍ପାନୀକୁ ଟେଣ୍ଡରରେ ଭାଗ ନେବାକୁ ବାଟ ଖୋଲିଦିଆଯାଇଥିଲା।
• ବୈଷୟିକ ମାନଦଣ୍ଡରେ ହ୍ରାସ: CMMI ସାର୍ଟିଫିକେସନ୍‌କୁ Level-5 ରୁ Level-3 କୁ ହ୍ରାସ କରିବା ସହିତ ସ୍କାନିଂ କ୍ୱାଲିଟି, ଡାଟା ସେଣ୍ଟର ଏବଂ ଡିଜାଷ୍ଟର ରିକଭରି ସେଣ୍ଟର ସମ୍ବନ୍ଧୀୟ ନିୟମଗୁଡ଼ିକୁ ମଧ୍ୟ ଅଧିକ ସରଳ କରାଯାଇଥିଲା, ଯାହା ବଡ଼ କମ୍ପାନୀଙ୍କ ତୁଳନାରେ Coempt ପାଇଁ ଅଧିକ ଲାଭଦାୟକ ହୋଇଥିଲା।