Air Pollution: ଦିଲ୍ଲୀକୁ ପ୍ରଦୂଷଣମୁକ୍ତ କରିବ ଚୀନ! ବଢାଇଲା ସାହାଯ୍ୟର ହାତ, ସେୟାର କଲା ଷ୍ଟେପ୍ ବାଇ ଷ୍ଟେପ୍ ଗାଇଡ୍
ଦିଲ୍ଲୀକୁ ପ୍ରଦୂଷଣମୁକ୍ତ କରିବ ଚୀନ! ବଢାଇଲା ସାହାଯ୍ୟର ହାତ ।
ନୂଆଦିଲ୍ଲୀ: ବର୍ତ୍ତମାନ ଘନ କୁହୁଡ଼ିରେ ଆଚ୍ଛାଦିତ ହୋଇଯାଇଛି ଦିଲ୍ଲୀ। ବାୟୁ ଗୁଣବତ୍ତା ବିପଦପୂର୍ଣ୍ଣ ସ୍ତରରେ ପହଞ୍ଚିଛି। ଡିସେମ୍ବର 15 ତାରିଖରେ, ଦିଲ୍ଲୀର AQI 447 ରେକର୍ଡ କରାଯାଇଥିଲା, ଯାହା ଗମ୍ଭୀର ଶ୍ରେଣୀରେ ଆସେ। ଏହି ସମୟରେ, ଚୀନର ରାଜଧାନୀ ବେଜିଂ, ଯାହା ଏକଦା ବିଶ୍ୱର କୁହୁଡ଼ି ରାଜଧାନୀ ଭାବରେ ଜଣାଶୁଣା, ଏବେ ତାହା ବହୁତ ସଫା ବାୟୁରେ ନିଶ୍ୱାସ ନେଉଛି । ଦିଲ୍ଲୀର AQI 447 ରେକର୍ଡ କରାଯାଇଥିବା ବେଳେ ସେହି ଦିନ, ବେଜିଂର AQI ମାତ୍ର 67 ଥିଲା।
ଏହା ଭିତରେ ଭାରତରେ ଥିବା ଚୀନ ଦୂତବାସ ଦିଲ୍ଲୀ ପାଇଁ ସାହାଯ୍ୟର ହାତ ବଢାଇଛି । ଦୂତାବାସର ମୁଖପାତ୍ର ୟୁ ଜିଙ୍ଗ୍ ସୋସିଆଲ ମିଡିଆ Xରେ ଏକ ସିରିଜ୍ ଆରମ୍ଭ କରିଛନ୍ତି, ଯେଉଁଥିରେ ବେଜିଂ ପ୍ରଦୂଷଣ ବିରୁଦ୍ଧରେ କିପରି ବିଜୟୀ ହାସଲ କଲା, ସେହି ବିଷୟରେ ପର୍ଯ୍ୟାୟକ୍ରମେ ଷ୍ଟେପ ବାଇ ଷ୍ଟେପ ସେୟାର କରିଛି ।
ୟୁ ଜିଙ୍ଗ୍ ଲେଖିଛନ୍ତି ଯେ ଦ୍ରୁତ ସହରୀକରଣ ମଧ୍ୟରେ ଚୀନ୍ ଏବଂ ଭାରତ ଉଭୟ ବାୟୁ ପ୍ରଦୂଷଣର ଚ୍ୟାଲେଞ୍ଜର ସମ୍ମୁଖୀନ ହେଉଛନ୍ତି। ଏହି ଚ୍ୟାଲେଞ୍ଜ ଜଟିଳ, କିନ୍ତୁ ଗତ ଦଶନ୍ଧି ଧରି ଚୀନ୍ ର ନିରନ୍ତର ପ୍ରୟାସ ଯୋଗୁଁ ଗୁରୁତ୍ୱପୂର୍ଣ୍ଣ ଉନ୍ନତି ଆସିଛି। ସେ ବେଜିଂର ପୂର୍ବ ଏବଂ ପରବର୍ତ୍ତୀ ଫଟୋ ସେୟାର କରିଛନ୍ତି, ଯାହା ପ୍ରଦୂଷଣ ହ୍ରାସକୁ ଦର୍ଶାଏ।
କଠୋର ନିର୍ଗମନ ମାନଦଣ୍ଡ: ଚୀନ୍ “ଚାଇନା 6” ମାନଦଣ୍ଡ ଗ୍ରହଣ କରିଛି, ଯାହା ୟୁରୋ-6 ସହିତ ସମାନ। ପୁରୁଣା ତଥା ଅଧିକ ପ୍ରଦୂଷଣକାରୀ ଯାନଗୁଡ଼ିକୁ ଧୀରେ ଧୀରେ ବନ୍ଦ କରାଯାଇଥିଲା।
କାର ସଂଖ୍ୟା ନିୟନ୍ତ୍ରଣ: ଏକ ଲାଇସେନ୍ସ ପ୍ଲେଟ୍ ଲଟେରୀ ସିଷ୍ଟମ ଏବଂ ଏକ ଅଯୁଗ୍ମ-ଯୁଗ୍ମ ନିୟମ କାର୍ଯ୍ୟକାରୀ କରିଛି। ଏହାର ଅର୍ଥ ହେଉଛି, କିଛି ଦିନ ଅଯୁଗ୍ମ ସଂଖ୍ୟା ବିଶିଷ୍ଟ ଯାନଗୁଡ଼ିକ ଚାଲୁଥିବା ବେଳେ ଯେତେବେଳେ ଯୁଗ୍ମ ସଂଖ୍ୟା ବିଶିଷ୍ଟ ଯାନଗୁଡ଼ିକ ଅନ୍ୟ କିଛି ନିର୍ଦ୍ଧିଷ୍ଟ ଦିନ ଗୁଡ଼ିକରେ ଚାଲେ ।
ପବ୍ଲିକ ଟ୍ରାନ୍ସପୋର୍ଟ: ମୁଖ୍ୟତଃ ମେଟ୍ରୋ ଏବଂ ବସ୍ ନେଟୱାର୍କକୁ ବିସ୍ତାର କରିଥିଲା। ବୈଦ୍ୟୁତିକ ଯାନଗୁଡ଼ିକର ଅଧିକ ବ୍ୟବହରା।
ଆଞ୍ଚଳିକ ସମନ୍ୱୟ: ବେଜିଂ ଏକା ଲଢ଼ି ନଥିଲା – ସେ ତାହର ପଡ଼ୋଶୀ ଅଞ୍ଚଳ (ତିଆନଜିନ୍ ଏବଂ ହେବେଇ) ସହିତ ସହଯୋଗରେ ନିୟମ ବନାଇଥିଲା । ଯାହା ପ୍ରଦୂଷଣକୁ ଗୋଟିଏ ଅଞ୍ଚଳରୁ ଅନ୍ୟ ଅଞ୍ଚଳକୁ ବ୍ୟାପିବାରୁ ରୋକିବ।
ଏହା ବ୍ୟତୀତ, ଶିଳ୍ପ ପୁନର୍ଗଠନ ହୋଇଥିଲା – କୋଇଲା-ନିର୍ଭରଶୀଳ କାରଖାନାଗୁଡ଼ିକୁ ବନ୍ଦ କିମ୍ବା ସ୍ଥାନାନ୍ତର କରାଯାଇଥିଲା, ଏବଂ ସ୍ୱଚ୍ଛ ଶକ୍ତି ଗ୍ରହଣ କରାଯାଇଥିଲା। ୨୦୧୩ ମସିହାରେ ଚୀନ୍ “ପ୍ରଦୁଷଣ ବିରୁଦ୍ଧରେ ଯୁଦ୍ଧ” ଘୋଷଣା କରିଥିଲା ଏବଂ ଗୁରୁତ୍ୱପୂର୍ଣ୍ଣ ନିବେଶ କରିଥିଲା। ବେଜିଂରେ ଏବେ ଅଧିକାଂଶ ସମୟ ଆକାଶ ନୀଳ ଥିବା ଦେଖିବାକୁ ମିଳୁଛି ।
ଦିଲ୍ଲୀର ପରିସ୍ଥିତିରୁ ଆମେ ଆଉ କ’ଣ ଶିଖିପାରିବା?
ଦିଲ୍ଲୀରେ ପ୍ରତି ଶୀତରେ ସମାନ କାହାଣୀ – ଦୀପାବଳି ପରେ କୁହୁଡ଼ି ଏବଂ ଶ୍ୱାସକ୍ରିୟା ସଂମ୍ବନ୍ଧୀୟ ରୋଗ ବୃଦ୍ଧି ପାଉଛି। ଭାରତ BS-VI ମାନକ କାର୍ଯ୍ୟକାରୀ କରିଥିଲା (୨୦୨୦ ରୁ), କିନ୍ତୁ ପୁରୁଣା ଯାନବାହାନ ପ୍ରବେଶକୁ ପ୍ରତିବନ୍ଧିତ କରିବାରେ ବିଳମ୍ବ ହୋଇଥିଲା। ଏହି ସପ୍ତାହରେ, ନନ୍-BS-VI ଯାନବାହନ ଉପରେ ପ୍ରତିବନ୍ଧକ ଲଗାଯାଇଥିଲା। ଗ୍ରେଡେଡ୍ ରେସପନ୍ସ ଆକ୍ସନ୍ ପ୍ଲାନ୍ (GRAP) ଚାଲିଛି, କିନ୍ତୁ ପଡ଼ୋଶୀ ରାଜ୍ୟଗୁଡ଼ିକରେ ନଡ଼ା ଜାଳିବା ଏବଂ ଆଞ୍ଚଳିକ ସମନ୍ୱୟର ଅଭାବ ପ୍ରମୁଖ ସମସ୍ୟା ପାଲଟିଛି।
ବିଶେଷଜ୍ଞମାନେ କହିଛନ୍ତି ଯେ ବେଜିଂର ମଡେଲକୁ ଗ୍ରହଣ କରାଯାଇପାରିବ – କଠୋର ନିୟମ, ଆଞ୍ଚଳିକ ସହଯୋଗ ଏବଂ ଦୀର୍ଘକାଳୀନ ଯୋଜନା। ଚୀନ୍ ଦୂତାବାସର ଏହି ପଦକ୍ଷେପ ଦୁଇ ଦେଶ ମଧ୍ୟରେ ପରିବେଶଗତ ସହଯୋଗର ଏକ ସଙ୍କେତ । ଯଦି ସଠିକ୍ ଭାବରେ କାର୍ଯ୍ୟକାରୀ କରାଯାଏ, ତେବେ ଏହି ମାର୍ଗଦର୍ଶିକା ଦିଲ୍ଲୀ ଏବଂ ସମଗ୍ର ଉତ୍ତର ଭାରତ ପାଇଁ ଆଶାର କିରଣ ସାଜିବ।