କୋଲ ବ୍ଲକ୍ ଆବଣ୍ଟନ ମାମଲାରେ ନବୀନ ଜିନ୍ଦଲ ଓ ଅନ୍ୟ ଅଭିଯୁକ୍ତଙ୍କୁ ନୋଟିସ୍‌

ନୂଆଦିଲ୍ଲୀ: ଦିଲ୍ଲୀର ସ୍ପେଶାଲ ରାଉଜ ଆଭେନ୍ୟୁ କୋର୍ଟ ଛତିଶଗଡ଼ରେ ଗାରେ ପାଲମା ଓଠ/୧ କୋଇଲା ବ୍ଲକ ଆବଣ୍ଟନରେ ହୋଇଥିବା ଅନିୟମିତତା ମାମଲାରେ ସିବିଆଇର ଚାର୍ଜଶିଟ ଉପରେ ସଜ୍ଞାନ ନେଇଛନ୍ତି। କୋର୍ଟ ଶିଳ୍ପପତି ତଥା ଲୋକସଭା ସାଂସଦ ନବୀନ ଜିନ୍ଦଲ, ପୂର୍ବତନ କୋଇଲା ସଚିବ ପିସି ପାରେଖ ଓ ଅନ୍ୟ ଅଭିଯୁକ୍ତଙ୍କୁ ସମନ କରିଛନ୍ତି।

ସ୍ପେଶାଲ ଜଜ୍ ସୁନୈନା ଶର୍ମା ନିଜ ଆଦେଶରେ କହିଛନ୍ତି; କୋଇଲା ବ୍ଲକ ମାମଲାର ସବୁଠାରୁ ବଡ଼ ଚାର୍ଜଶିଟ ମଧ୍ୟରୁ ଏହି ଅଭିଯୋଗ ଅନ୍ୟତମ । ଏଫ୍‌ଆଇଆର୍ ପଞ୍ଜୀକୃତ ହେବାର ଏକ ଦଶନ୍ଧିରୁ ଅଧିକ ସମୟ ପରେ ସିବିଆଇ ଦାଖଲ କରିଛି ଚାର୍ଜଶିଟ୍‌। ଏହି ମାମଲାରେ ଆଗକୁ ବଢ଼ିବା ପାଇଁ କୋର୍ଟ ପାଖରେ ଯଥେଷ୍ଟ ସାମଗ୍ରୀ ଅଛି।

ତେଣୁ ୧୭ ଜୁଲାଇରେ ମେସର୍ସ ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ, ଏହାର ମ୍ୟାନେଜିଂ ଡାଇରେକ୍ଟର ନବୀନ ଜିନ୍ଦଲ, ପାରେଖ, ରାକେଶ କୁମାର ଜିନ୍ଦଲ, ରାମ କିଶୋର, ଏସକେ ଅଗ୍ରୱାଲ ଓ ମେସର୍ସ ଜିନ୍ଦଲ ଷ୍ଟ୍ରିପ୍ସ ଲିମିଟେଡ (ବର୍ତ୍ତମାନ ମେସର୍ସ ନଲୱା ସନ୍ସ ଇନଭେଷ୍ଟମେଣ୍ଟସ ଲିମିଟେଡ)ଙ୍କୁ ହାଜର ହେବା ପାଇଁ କୋର୍ଟ ଆଦେଶ ଦେଇଛନ୍ତି।

କୋର୍ଟ କହିଛନ୍ତି, ଚାର୍ଜଶିଟରେ ୧ ଲକ୍ଷରୁ ଅଧିକ ପୃଷ୍ଠାର ୭୭୮ ଡକ୍ୟୁମେଣ୍ଟ ଏବଂ ୨୩୪ ତାଲିକାଭୁକ୍ତ ସାକ୍ଷୀ ଅଛନ୍ତି। କୋର୍ଟ ବୁଧବାର ସଜ୍ଞାନ ଆଦେଶରେ କହିଛନ୍ତି, ଲମ୍ବା ତଦନ୍ତ, ଯେଉଁଥିରେ ବହୁତ ରେକର୍ଡ ଏବଂ ଅନେକ ସାକ୍ଷୀ ସାମିଲ ଅଛନ୍ତି। ଚାର୍ଜଶିଟରେ ଦିଆଯାଇଥିବା ଅଭିଯୋଗ, ପ୍ରତ୍ୟେକ ଅଭିଯୁକ୍ତଙ୍କ ଖାସ ଭୂମିକା ଏବଂ ତା’ର ସମର୍ଥନରେ ଦାଖଲ କରାଯାଇଥିବା ଡକ୍ୟୁମେଣ୍ଟର ଆଲୋକରେ ଉଈଓର ବରିଷ୍ଠ ସରକାରୀ ଓକିଲଙ୍କ ଯୁକ୍ତି ଉପରେ ବିଚାର କରିବା ପରେ ଏହି କୋର୍ଟ ପାଖରେ ଏହି ମାମଲାରେ ଆଗକୁ ବଢ଼ିବା ପାଇଁ ଯଥେଷ୍ଟ ସାମଗ୍ରୀ ଅଛି। ଏଥିରେ ସାକ୍ଷୀମାନଙ୍କ ବୟାନ ମଧ୍ୟ ସାମିଲ।