ଇରାନ ଯୁଦ୍ଧର ପ୍ରଭାବ ନିର୍ବାଚନରେ? ଟ୍ରମ୍ପଙ୍କ ପାଇଁ ବଢ଼ିଲା ଅଡୁଆ

ୱାଶିଂଟନ: ଆମେରିକା ରାଜନୀତିରେ ମିଡଟର୍ମ ନିର୍ବାଚନକୁ ନେଇ ଚର୍ଚ୍ଚା ଜୋର ଧରିଛି। ଯଦି ବର୍ତ୍ତମାନର ଆକଳନ ସତ ହୁଏ, ତେବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ରିପବ୍ଲିକାନ୍ ପାର୍ଟିକୁ ନିର୍ବାଚନରେ ବଡ଼ ଝଟକା ଲାଗିପାରେ।

ଆମେରିକୀୟ ମିଡିଆ ଆଉଟଲେଟ୍ ‘ଆକ୍ସିଓସ୍‌’ର ଏକ ରିପୋର୍ଟ ଅନୁସାରେ, ମିଡଟର୍ମ ନିର୍ବାଚନରେ ଡେମୋକ୍ରାଟ୍‌ମାନେ ରିପବ୍ଲିକାନ୍‌ଙ୍କ ତୁଳନାରେ ପ୍ରାୟ ୧୦ଟି ଅଧିକ ସିଟ୍ ହାସଲ କରିପାରନ୍ତି। ଏଭଳି ହେଲେ କଂଗ୍ରେସରେ ଟ୍ରମ୍ପଙ୍କ ଦଳର ଶକ୍ତି ଯଥେଷ୍ଟ କମିଯିବ।

୨୩୦ ସିଟରେ ଜିତିପାରେ ଡେମୋକ୍ରାଟ୍‌! : ରିପୋର୍ଟର ଆକଳନ ଅନୁସାରେ, ନିର୍ବାଚନ ଏହି ଟ୍ରେଣ୍ଡରେ ଆଗକୁ ବଢ଼ିଲେ ଡେମୋକ୍ରାଟ୍‌ମାନେ ପ୍ରତିନିଧି ସଭାର ୨୩୦ଟି ସିଟ୍ ଜିତିପାରନ୍ତି। ଅନ୍ୟପଟେ ରିପବ୍ଲିକାନ୍‌ମାନେ ପ୍ରାୟ ୨୦୫ଟି ସିଟ୍‌ରେ ସୀମିତ ରହିପାରନ୍ତି। ବର୍ତ୍ତମାନ ରିପବ୍ଲିକାନ୍ ପାର୍ଟି ପାଖରେ ୨୧୮ ଜଣ ସାଂସଦ ଥିବାବେଳେ ଡେମୋକ୍ରାଟ୍‌ଙ୍କ ପାଖରେ ୨୧୪ ଜଣ ସାଂସଦ ଅଛନ୍ତି। ଅର୍ଥାତ୍ ରିପବ୍ଲିକାନ୍‌ମାନଙ୍କ ପାଖରେ ଏବେ ମାତ୍ର ୫ ସିଟ୍‌ର ଅଗ୍ରଣୀ ରହିଛି। ଯଦି ନିର୍ବାଚନରେ ଏହି ଅଗ୍ରଣୀ ହାତଛଡ଼ା ହୁଏ, ତେବେ ଟ୍ରମ୍ପ ପ୍ରଶାସନ ପାଇଁ ଆଗାମୀ ଦିନରେ ଅନେକ ନୂଆ ଚ୍ୟାଲେଞ୍ଜ ଆସିପାରେ।

ମିଡଟର୍ମ ନିର୍ବାଚନ ଏତେ ଗୁରୁତ୍ୱପୂର୍ଣ୍ଣ କାହିଁକି?: ଆମେରିକାରେ ରାଷ୍ଟ୍ରପତି ଅନେକ ନିଷ୍ପତ୍ତି ନେଇପାରନ୍ତି। କିନ୍ତୁ ଅନେକ ଗୁରୁତ୍ୱପୂର୍ଣ୍ଣ ବିଲ୍ ଓ ବଜେଟ୍ ପାସ୍ କରାଇବା ପାଇଁ କଂଗ୍ରେସର ସମର୍ଥନ ଆବଶ୍ୟକ ହୁଏ।

ମିଡଟର୍ମ ନିର୍ବାଚନରେ ପ୍ରତିନିଧି ସଭାର ସମସ୍ତ ୪୩୫ଟି ସିଟ୍ ପାଇଁ ନିର୍ବାଚନ ହୁଏ। ଏହା ସହ ସିନେଟ୍‌ର ପ୍ରାୟ ଏକ-ତୃତୀୟାଂଶ ସିଟ୍ ପାଇଁ ମଧ୍ୟ ଭୋଟ୍ ହୁଏ। ତେଣୁ ଏଠାରେ ଟ୍ରମ୍ପଙ୍କ ଦଳ ପଛରେ ପଡ଼ିଲେ କେବଳ ସିଟ୍ ହ୍ରାସ ହେବ ନାହିଁ, ବରଂ ରାଷ୍ଟ୍ରପତିଙ୍କ ନୀତି ଓ ବିଧେୟକ ପାସ୍ କରାଇବାର କ୍ଷମତା ଉପରେ ମଧ୍ୟ ପ୍ରଭାବ ପଡ଼ିପାରେ।

ଇରାନ ଯୁଦ୍ଧ ବଢ଼ାଇଲା ଟ୍ରମ୍ପଙ୍କ ଚିନ୍ତା?: ଟ୍ରମ୍ପଙ୍କ ପାଇଁ ଆଉ ଏକ ବଡ଼ ଚିନ୍ତା ହେଉଛି ଇରାନ ଯୁଦ୍ଧ। ଆରମ୍ଭରେ ଖୁବ୍‌ଶୀଘ୍ର ଯୁଦ୍ଧ ଶେଷ ହୋଇଯିବ ବୋଲି ଆଶା କରାଯାଉଥିଲା। ହେଲେ ସଂଘର୍ଷ ଲମ୍ବିବାରୁ ଏହାର ପ୍ରଭାବ ଟ୍ରମ୍ପଙ୍କ ଲୋକପ୍ରିୟତା ଉପରେ ପଡ଼ିଥିବା ଦାବି କରାଯାଉଛି। ଏହାର ପ୍ରଭାବ ଆଗାମୀ ମିଡଟର୍ମ ନିର୍ବାଚନରେ ଦେଖାଯାଇପାରେ ବୋଲି ରାଜନୈତିକ ଆକଳନ କରାଯାଉଛି।

ସିଟ୍ ବଞ୍ଚାଇବାକୁ ରିପବ୍ଲିକାନ୍‌ଙ୍କ ନୂଆ ରଣନୀତି: ନିଜ ଦଳର ସ୍ଥିତି ମଜବୁତ କରିବାକୁ ରିପବ୍ଲିକାନ୍ ପକ୍ଷରୁ ନିର୍ବାଚନୀ ଆସନର ସୀମା ପୁନଃନିର୍ଦ୍ଧାରଣ ବା ‘ପରିସୀମନ’ ଉପରେ ମଧ୍ୟ ଜୋର ଦିଆଯାଉଛି। ଆକ୍ସିଓସ ରିପୋର୍ଟ ଅନୁସାରେ, ଏହି ପରିସୀମନ ଯୋଗୁଁ ରିପବ୍ଲିକାନ୍‌ମାନେ ପ୍ରାୟ ୯ଟି ସିଟ୍‌ର ଫାଇଦା ପାଇପାରନ୍ତି। ତେବେ ଏହା ସତ୍ତ୍ୱେ ଡେମୋକ୍ରାଟ୍‌ଙ୍କ ଅଗ୍ରଣୀକୁ ରୋକିବା କଷ୍ଟକର ହୋଇପାରେ। ଏବେ ସମସ୍ତଙ୍କ ନଜର ମିଡଟର୍ମ ନିର୍ବାଚନ ଉପରେ। ଏହି ନିର୍ବାଚନ ଟ୍ରମ୍ପଙ୍କ ରାଜନୈତିକ ଶକ୍ତିର ପରୀକ୍ଷା ହେବ ନା ରିପବ୍ଲିକାନ୍‌ମାନେ ନିଜ ଗଡ଼ ରକ୍ଷା କରିପାରିବେ, ତାହା ଆଗାମୀ ଦିନରେ ସ୍ପଷ୍ଟ ହେବ।