ପ୍ରଧାନମନ୍ତ୍ରୀଙ୍କୁ ‘ଆତଙ୍କବାଦୀ’ ମନ୍ତବ୍ୟ ଦେଇ ଫସିଲେ ଖାଡଗେ: ନିର୍ବାଚନ କମିଶନଙ୍କ କାରଣ ଦର୍ଶାଅ ନୋଟିସ୍

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଷୟରେ କଥିତ ଭାବେ ‘ଆତଙ୍କବାଦୀ’ ମନ୍ତବ୍ୟ ଦେଇଥିବା ଅଭିଯୋଗରେ ଭାରତୀୟ ନିର୍ବାଚନ କମିଶନ କଂଗ୍ରେସର ଜାତୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାଡଗେଙ୍କୁ ଏକ ନୋଟିସ୍ ଜାରି କରିଛନ୍ତି। ଏହି ଘଟଣା ସେତେବେଳେ ଘଟିଛି ଯେତେବେଳେ କେନ୍ଦ୍ର ମନ୍ତ୍ରୀ ନିର୍ମଳା ସୀତାରମଣ, କିରେନ ରିଜିଜୁ, ଏବଂ ଅର୍ଜୁନ ରାମ ମେଘୱାଲଙ୍କ ସମେତ ବିଜେପିର ଏକ ପ୍ରତିନିଧି ଦଳ ନିର୍ବାଚନ କମିଶନଙ୍କୁ ଭେଟିଥିଲେ। ପ୍ରଧାନମନ୍ତ୍ରୀ ମୋଦୀଙ୍କ ବିରୋଧରେ ଖାଡଗେଙ୍କ “ଆତଙ୍କବାଦୀ” ମନ୍ତବ୍ୟ ନେଇ ସେମାନେ ଅଭିଯୋଗ କରିବାର କିଛି ଘଣ୍ଟା ପରେ କମିଶନ ଏହି ପଦକ୍ଷେପ ନେଇଛନ୍ତି।

ଭାରତୀୟ ନିର୍ବାଚନ କମିଶନ କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡଗେଙ୍କ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ “ଆତଙ୍କବାଦୀ” କହିବା ଘଟଣାକୁ ଗୁରୁତର ସହ ନେଇଛନ୍ତି। ଏହି ମନ୍ତବ୍ୟ ପାଇଁ କମିଶନ ଖାଡଗେଙ୍କୁ ଏକ ନୋଟିସ୍ ଜାରି କରିଛନ୍ତି ଏବଂ ୨୪ ଘଣ୍ଟା ମଧ୍ୟରେ ନିଜର ପକ୍ଷ ରଖିବାକୁ କିମ୍ବା ସ୍ପଷ୍ଟୀକରଣ ଦେବାକୁ ନିର୍ଦ୍ଦେଶ ଦେଇଛନ୍ତି।
ଏହି ମନ୍ତବ୍ୟ ନିର୍ବାଚନ ଆଚରଣ ବିଧିର ଉଲ୍ଲଂଘନ ହୋଇଥାଇପାରେ ବୋଲି ଦର୍ଶାଇ, ନିର୍ବାଚନ କମିଶନ ୨୪ ଘଣ୍ଟା ମଧ୍ୟରେ ତାଙ୍କର ଜବାବ ମାଗିଛନ୍ତି।

ମଙ୍ଗଳବାର ଏକ ସାମ୍ବାଦିକ ସମ୍ମିଳନୀରେ ଖାଡଗେ ପ୍ରଧାନମନ୍ତ୍ରୀ ମୋଦୀଙ୍କୁ “ଆତଙ୍କବାଦୀ” ବୋଲି କହିଥିଲେ। ଏହି ମନ୍ତବ୍ୟ ବିଷୟରେ ପଚରାଯିବାରୁ କଂଗ୍ରେସ ସଭାପତି ସ୍ପଷ୍ଟ କରିଥିଲେ ଯେ, ମୋଦୀ “ଲୋକଙ୍କୁ ଏବଂ ରାଜନୈତିକ ଦଳଗୁଡ଼ିକୁ ଭୟଭୀତ (Terrorising) କରୁଛନ୍ତି” ବୋଲି ସେ କହିବାକୁ ଚାହୁଁଥିଲେ। ଏଥିସହିତ ସେ ପ୍ରଧାନମନ୍ତ୍ରୀଙ୍କୁ ସିଧାସଳଖ ଆତଙ୍କବାଦୀ କହିଥିବା କଥାକୁ ମଧ୍ୟ ଅସ୍ୱୀକାର କରିଛନ୍ତି।

Election Commission of India takes note of Congress National President Mallikarjun Kharge calling PM Narendra Modi a “Terrorist” and issues a notice to Kharge to explain his stand within 24 Hrs pic.twitter.com/5xGoympL9o

— ANI (@ANI) April 22, 2026

ଏହି ବିବାଦ ଗତ ମଙ୍ଗଳବାର ତାମିଲନାଡୁ ନିର୍ବାଚନ ପ୍ରଚାରର ଶେଷ ଦିନରେ ଖାଡଗେ ଦେଇଥିବା ଭାଷଣରୁ ଆରମ୍ଭ ହୋଇଛି। ସେଠାରେ ସେ ବିଜେପି ସହ ହାତ ମିଳାଇଥିବାରୁ AIADMK ଦଳକୁ ସମାଲୋଚନା କରିବା ସହ ପ୍ରଧାନମନ୍ତ୍ରୀ ମୋଦୀଙ୍କ ବିରୋଧରେ କଡ଼ା ଟିପ୍ପଣୀ ଦେଇଥିଲେ। ଖାଡଗେ ପ୍ରଧାନମନ୍ତ୍ରୀ ମୋଦୀଙ୍କୁ “ସମାନତାରେ ବିଶ୍ୱାସ କରୁନଥିବା ଜଣେ ଆତଙ୍କବାଦୀ” ବୋଲି ସମ୍ବୋଧନ କରିଥିଲେ, ଯାହାକୁ ନେଇ ରାଜନୈତିକ ହଟଚମଟ ସୃଷ୍ଟି ହୋଇଛି।

ପରେ ଖାଡଗେ ସ୍ପଷ୍ଟ କରିଥିଲେ ଯେ ସେ ପ୍ରଧାନମନ୍ତ୍ରୀଙ୍କୁ ଆତଙ୍କବାଦୀ କହିନାହାନ୍ତି, ବରଂ ବିରୋଧୀ ଦଳର ନେତାମାନଙ୍କ ବିରୋଧରେ “ଚାପ ପ୍ରୟୋଗ ରାଜନୀତି” ଏବଂ “କେନ୍ଦ୍ରୀୟ ଏଜେନ୍ସିର ଅପବ୍ୟବହାର” କୁ ସେ ଏଭଳି ଭାବେ ବର୍ଣ୍ଣନା କରିଥିଲେ।

ଖାଡଗେ କହିଛନ୍ତି, “ମୁଁ ତାଙ୍କୁ ଆତଙ୍କବାଦୀ କହିନି… ସେ ED, CBI ଏବଂ ଆୟକର ବିଭାଗ ଭଳି ଏଜେନ୍ସି ଜରିଆରେ ରାଜନୈତିକ ବିରୋଧୀଙ୍କୁ ଭୟଭୀତ କରୁଛନ୍ତି।” ଏଥିସହ ତାଙ୍କ କଥାର ଭୁଲ୍ ଅର୍ଥ ବାହାର କରାଯାଉଛି ବୋଲି ସେ କହିଛନ୍ତି।

ଖାଡଗେଙ୍କ ଏହି ମନ୍ତବ୍ୟକୁ ବିଜେପି ଜୋରଦାର ବିରୋଧ କରିବା ସହ କ୍ଷମା ପ୍ରାର୍ଥନା ଦାବି କରିଛି ଏବଂ ଏ ନେଇ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିଛି।

ବିଜେପି ନେତାମାନେ ଖାଡଗେଙ୍କ ମନ୍ତବ୍ୟକୁ ତୀବ୍ର ନିନ୍ଦା କରିଛନ୍ତି। ଭାରତୀୟ ଜନତା ପାର୍ଟିର ଜାତୀୟ ମୁଖପାତ୍ର ଶେହଜାଦ ପୁନାୱାଲା କହିଛନ୍ତି ଯେ ଏହି ବିବୃତ୍ତିଟି “ପୂର୍ବ ଯୋଜନାବଦ୍ଧ” ଥିଲା ଏବଂ ସେ ନିର୍ବାଚନ କମିଶନଙ୍କ ପକ୍ଷରୁ କାର୍ଯ୍ୟାନୁଷ୍ଠାନ ଦାବି କରିଛନ୍ତି।

ଅନ୍ୟପଟେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କଂଗ୍ରେସ ସଭାପତିଙ୍କୁ ଟାର୍ଗେଟ କରି କହିଛନ୍ତି ଯେ, ରାହୁଲ ଗାନ୍ଧୀଙ୍କ ସହ ରହି ଖାଡଗେଙ୍କ ଭାଷା “ବିଗିଡ଼ି” ଯାଇଛି।

ଉତ୍ତର ୨୪ ପ୍ରଗଣାର ଦମ୍‌ଦମ୍‌ଠାରେ ଏକ ନିର୍ବାଚନ ସଭାକୁ ସମ୍ବୋଧିତ କରି ଶାହ କହିଛନ୍ତି, “ଯେଉଁ ନରେନ୍ଦ୍ର ମୋଦୀ ଜୀ ଆତଙ୍କବାଦକୁ ଶେଷ କରିଛନ୍ତି, ତାଙ୍କୁ କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡଗେ ଜଣେ ଆତଙ୍କବାଦୀ ବୋଲି କହୁଛନ୍ତି। ରାହୁଲ ବାବାଙ୍କ ପାଖରେ ରହି ଖାଡଗେ ଜୀଙ୍କ ଭାଷା ମଧ୍ୟ ବିଗିଡ଼ିବାକୁ ଲାଗିଲାଣି।