କ୍ରିକେଟ ଜଗତରେ ଶୋକର ଛାୟା, ପରଲୋକରେ ପୂର୍ବତନ କ୍ରିକେଟର, ମୃତ୍ୟୁ ବେଳକୁ ହେଇଥିଲା ୬୭ ବର୍ଷ

Tony Pigott: କ୍ରିକେଟ ଜଗତରେ ଶୋକର ଛାୟା । ଇଂଲଣ୍ଡର ପୂର୍ବତନ କ୍ରିକେଟର ଦିଗ୍ଗଜ ଟୋନି ପିଗଟଙ୍କ ୬୭ ବର୍ଷ ବୟସରେ ଦେହାନ୍ତ ଘଟିଛି। ତାଙ୍କ ପରଲୋକ ଇଂଲିଶ୍ କାଉଣ୍ଟି କ୍ରିକେଟ ମହଳରେ ଶୋକର ଛାୟା ପକାଇଛି।

ଟୋନି ପିଗଟ ୧୯୭୮ ମସିହାରେ ମାତ୍ର ୨୦ ବର୍ଷ ବୟସରେ ସସେକ୍ସ ପାଇଁ ଫର୍ଷ୍ଟ କ୍ଲାସ୍ କ୍ରିକେଟରେ ଡେବ୍ୟୁ କରିଥିଲେ। ହୋଭରେ ସରେ ବିପକ୍ଷ ମ୍ୟାଚରେ ସେ ନିଜର ପ୍ରଥମ ଫର୍ଷ୍ଟ କ୍ଲାସ୍ ୱିକେଟକୁ ହ୍ୟାଟ୍ରିକ୍‌ରେ ପରିଣତ କରି ସମସ୍ତଙ୍କ ଦୃଷ୍ଟି ଆକର୍ଷିତ କରିଥିଲେ।

ଯଦିଓ ତାଙ୍କର ଆନ୍ତର୍ଜାତିକ କ୍ରିକେଟ କ୍ୟାରିଅର ଛୋଟ ଥିଲା, ତଥାପି ସେହି କ୍ୟାରିଅର ଖୁବ ମନୋରମ ଥିଲା। ୧୯୮୩–୮୪ ମସିହାରେ ନ୍ୟୁଜିଲ୍ୟାଣ୍ଡ ଟୁରରେ ସେ ଇଂଲଣ୍ଡ ପାଇଁ ନିଜର ଏକମାତ୍ର ଟେଷ୍ଟ ମ୍ୟାଚ ଖେଳିଥିଲେ। ସେ ସମୟରେ ଇଂଲିଶ୍ ଦଳ ଇଞ୍ଜୁରି ସମସ୍ୟାରେ ଥିବାରୁ ପିଗଟଙ୍କୁ ଦଳରେ ସାମିଲ କରାଯାଇଥିଲା। ଏହି ଟେଷ୍ଟ ମ୍ୟାଚ ପାଇଁ ସେ ନିଜର ବିବାହକୁ ମଧ୍ୟ ପଛକୁ ପକାଇ ଦେଇଥିଲେ।

୧୯୯୪ ମସିହାରେ ସେ ସସେକ୍ସ ଛାଡ଼ି ସରେ ଦଳକୁ ଯୋଗ ଦେଇଥିଲେ, କିନ୍ତୁ ପିଠିରେ ଗୁରୁତର ଆଘାତ ଯୋଗୁଁ ୧୯୯୬ ମସିହାରେ କ୍ରିକେଟରୁ ସନ୍ନ୍ୟାସ ନେବାକୁ ପଡ଼ିଥିଲା।

ପରେ ସେ ପୁଣି ସସେକ୍ସକୁ ଫେରି ସେକେଣ୍ଡ ଟିମ୍ କୋଚ ହୋଇଥିଲେ ଏବଂ ପରବର୍ତ୍ତୀ ବର୍ଷ କ୍ଲବର ଚିଫ୍ ଏଗ୍ଜିକ୍ୟୁଟିଭ୍ ଭାବେ ନିଯୁକ୍ତ ହୋଇଥିଲେ। ତାଙ୍କ ନେତୃତ୍ୱରେ ସସେକ୍ସ କ୍ରିକେଟ କ୍ଲବ ଅନେକ ଐତିହାସିକ ସଫଳତା ହାସଲ କରିଥିଲା। ସସେକ୍ସ ସ୍ଥାୟୀ ଫ୍ଲଡଲାଇଟ୍ ସ୍ଥାପନ କରିଥିବା ପ୍ରଥମ କାଉଣ୍ଟି କ୍ଲବ ହୋଇଥିଲା ଏବଂ ୨୦୦୩ ମସିହାରେ ପ୍ରଥମ କାଉଣ୍ଟି ଚ୍ୟାମ୍ପିଅନ୍‌ଶିପ୍ ଖିତାବ ଜିତିଥିଲା।

୨୦୦୩ ଚ୍ୟାମ୍ପିଅନ୍ ଟିମ୍‌ର ଅଧିନାୟକ କ୍ରିସ୍ ଆଡମ୍ସ ପିଗଟଙ୍କୁ ସସେକ୍ସ କ୍ଲବ ଇତିହାସର ସବୁଠାରୁ ପ୍ରଭାବଶାଳୀ ବ୍ୟକ୍ତିମାନଙ୍କ ମଧ୍ୟରୁ ଜଣେ ବୋଲି ଉଲ୍ଲେଖ କରିଛନ୍ତି।

୧୯୯୯ ମସିହାରେ CEO ପଦ ଛାଡ଼ିବା ପରେ ମଧ୍ୟ ସେ କ୍ରିକେଟ ସହ ଜଡିତ ରହିଥିଲେ। ପିଚ୍ ଇନ୍ସପେକ୍ଟର ଓ ମ୍ୟାଚ୍ ରେଫେରି ଭାବେ ସେବା ଦେଇଥିଲେ। ଖରାପ ସ୍ୱାସ୍ଥ୍ୟ ସତ୍ତ୍ୱେ ୨୦୨୫ ନଭେମ୍ବରରେ ସେ ନିଜ ଆତ୍ମକଥା “Lester and the Deckchair Revolution” ପ୍ରକାଶ କରିଥିଲେ।

ଟୋନି ପିଗଟଙ୍କ ଅବଦାନ କେବଳ ମଇଦାନରେ ସୀମିତ ନଥିଲା; ଖେଳାଳି, ପ୍ରଶାସକ ଓ ନେତା ଭାବେ ସେ ସସେକ୍ସ କ୍ରିକେଟକୁ ଏକ ନୂଆ ପରିଚୟ ଦେଇଥିଲେ।