୬୦ ବର୍ଷ ପୂର୍ବରୁ ଅଟଳ ପେନସନ୍ ବନ୍ଦ କଲେ କେତେ ମିଳିବ ଟଙ୍କା? ଜାଣନ୍ତୁ ସରକାରୀ ନିୟମ…

ଓଡ଼ିଶା ଭାସ୍କର ଡେସ୍କ: ଭବିଷ୍ୟତକୁ ସୁରକ୍ଷିତ କରିବା ଏବଂ ବୃଦ୍ଧାବସ୍ଥାରେ ଅନ୍ୟମାନଙ୍କ ଉପରେ ନିର୍ଭର ନ କରିବା ପାଇଁ, ଅନେକ ଲୋକ ହୁଏତ ନିଜର କଷ୍ଟ-ଅର୍ଜିତ ସଞ୍ଚୟକୁ ‘ଅଟଳ ପେନସନ୍ ଯୋଜନା’ (APY) ରେ ନିବେଶ କରୁଥିବେ।

ଏଥିରେ ମାସିକ ଯେଉଁ ଅର୍ଥ ଜମା ହୋଇଥେଏ, ତାହା ବ୍ୟକ୍ତିଙ୍କୁ ୬୦ ବର୍ଷ ବୟସ ପରେ ଏକ ନିଶ୍ଚିତ ପେନସନ୍ ପ୍ରଦାନ କରିବାର ପ୍ରତିଶ୍ରୁତି ଦେଇଥାଏ। ତଥାପି, ଭାଗ୍ୟର ବିଡ଼ମ୍ବନା କିମ୍ବା ହଠାତ୍ ଆସିପଡ଼ୁଥିବା ଆର୍ଥିକ ସଙ୍କଟ ଯେକୌଣସି ସମୟରେ ଜଣଙ୍କୁ କଠିନ ପରିସ୍ଥିତିରେ ପକାଇପାରେ।

ଯଦି କୌଣସି ବ୍ୟକ୍ତି ବର୍ତ୍ତମାନ ଏଭଳି କୌଣସି ଜରୁରୀକାଳୀନ ପରିସ୍ଥିତିର ସମ୍ମୁଖୀନ ହେଉଛନ୍ତି ଏବଂ ୬୦ ବର୍ଷ ବୟସ ପୂର୍ବରୁ ନିଜର APY ଖାତା ବନ୍ଦ କରିବାକୁ ଚିନ୍ତା କରୁଛନ୍ତି, ତେବେ ଆଗକୁ ବଢ଼ିବା ପୂର୍ବରୁ ଏହା ସମ୍ବନ୍ଧୀୟ ନିୟମାବଳୀକୁ ଭଲଭାବେ ବୁଝିନିଅନ୍ତୁ, ନଚେତ୍ ଆପଣଙ୍କୁ ବଡ଼ ଧରଣର ଆର୍ଥିକ କ୍ଷତିର ସମ୍ମୁଖୀନ ହେବାକୁ ପଡ଼ିପାରେ।

୬୦ ବର୍ଷ ପୂର୍ବରୁ ଆକାଉଣ୍ଟ ବନ୍ଦ କଲେ କେତେ ଟଙ୍କା ଫେରସ୍ତ ମିଳିବ?

ଯଦି ଆପଣ ଆପଣଙ୍କର ଅଟଳ ପେନସନ୍ ୟୋଜନା ଆକାଉଣ୍ଟକୁ ସମୟ ପୂର୍ବରୁ ବନ୍ଦ କରିବାକୁ ନିଷ୍ପତ୍ତି ନିଅନ୍ତି, ତେବେ ଆପଣଙ୍କୁ ସମ୍ପୂର୍ଣ୍ଣ ଆଶ୍ୱାସନା ମିଳିବ ନାହିଁ। ନିୟମ ଅନୁସାରେ, ଆପଣ ନିଜ ଆକାଉଣ୍ଟରେ ଯେତିକି ଟଙ୍କା ନିଜ ପକେଟରୁ ଜମା କରିଛନ୍ତି, କେବଳ ସେହି ରାଶି ଏବଂ ତାହା ଉପରେ ମିଳିଥିବା ସୁଧ ଆପଣଙ୍କୁ ଫେରସ୍ତ କରାଯିବ।

କିନ୍ତୁ ଏଠାରେ ଗୋଟିଏ ବଡ଼ ଝଟକା ଲୁଚି ରହିଛି! ଆକାଉଣ୍ଟ ବନ୍ଦ କରିବା ବାବଦରେ ବ୍ୟାଙ୍କ କିମ୍ବା ସଂସ୍ଥା ଆପଣଙ୍କ ଫେରସ୍ତ ରାଶିରୁ ଆକାଉଣ୍ଟ ମେଣ୍ଟେନାନ୍ସ ଓ ପ୍ରଶାସନିକ ଚାର୍ଜ ବାବଦକୁ କିଛି ଟଙ୍କା କାଟିନେବେ। ଅର୍ଥାତ୍, ଆପଣ ଭାବୁଥିବା ପୂରା ସୁଧ ରାଶି ଆପଣଙ୍କ ହାତକୁ ଆସିବ ନାହିଁ।

ସରକାରୀ ଯୋଗଦାନ ଏବଂ ବୋନସ୍ ସୁଧ ସମ୍ପୂର୍ଣ୍ଣ ବୁଡ଼ିଯିବ!

ଏହା ହେଉଛି ସବୁଠାରୁ ବଡ଼ ଧକ୍କା! ଯଦି ଆପଣ ସ୍ୱେଚ୍ଛାକୃତ ଭାବେ ୬୦ ବର୍ଷ ପୂର୍ବରୁ ନିଜ ଯୋଜନା ବନ୍ଦ କରୁଛନ୍ତି, ତେବେ ସରକାରଙ୍କ ତରଫରୁ ଆପଣଙ୍କ ଆକାଉଣ୍ଟରେ ଜମା କରାଯାଇଥିବା ସହ-ଯୋଗଦାନ (Government Co-contribution) ଏବଂ ସେହି ସରକାରୀ ଟଙ୍କା ଉପରେ ମିଳିଥିବା ସମସ୍ତ ସୁଧକୁ ସମ୍ପୂର୍ଣ୍ଣ ଭାବେ ବ୍ୟାଜପ୍ତ କରାଯିବ।

ସରକାର ନିଜର ଏହି ଯୋଗଦାନ ଟଙ୍କା ଆପଣଙ୍କୁ ଆଦୌ ଫେରସ୍ତ ଦେବେ ନାହିଁ। କେବଳ କୌଣସି ଗମ୍ଭୀର ରୋଗ କିମ୍ବା ଆକାଉଣ୍ଟଧାରୀଙ୍କ ମୃତ୍ୟୁ ଭଳି ଅତ୍ୟନ୍ତ ଜରୁରୀ ପରିସ୍ଥିତିରେ ନିୟମ କିଛିଟା କୋହଳ ହୋଇଥାଏ, ଅନ୍ୟଥା ସାଧାରଣ ପରିସ୍ଥିତିରେ ଆପଣଙ୍କୁ ସରକାରୀ ସାହାଯ୍ୟରୁ ବଞ୍ଚିତ ହେବାକୁ ପଡ଼ିବ।

୬୦ ବର୍ଷ ପର୍ଯ୍ୟନ୍ତ ଅପେକ୍ଷା କଲେ ମିଳିବ ଅସଲ ଫାଇଦା!

ଯଦି ଆପଣ ନିଜ ଧୈର୍ଯ୍ୟ ବଜାୟ ରଖି ୬୦ ବର୍ଷ ବୟସ ପର୍ଯ୍ୟନ୍ତ ଏହି ଆକାଉଣ୍ଟକୁ ଚାଲୁ ରଖନ୍ତି, ତେବେ ଆପଣଙ୍କୁ ମାସକୁ ୧,୦୦୦ ରୁ ୫,୦୦୦ ଟଙ୍କା ପର୍ଯ୍ୟନ୍ତ ଗ୍ୟାରେଣ୍ଟିଯୁକ୍ତ ସରକାରୀ ପେନସନ୍ ମିଳିବ।

ଆପଣ କେଉଁ ବୟସରୁ ନିବେଶ ଶୁରୁ କରିଥିଲେ ଏବଂ କେତେ ଟଙ୍କା ଜମା କରୁଛନ୍ତି, ତାହା ଉପରେ ପେନସନ୍‌ର ପରିମାଣ ନିର୍ଭର କରେ। ଏହି ଯୋଜନାର ମୂଳ ଲକ୍ଷ୍ୟ ହେଉଛି ଆପଣଙ୍କର ପରିଣତ ବୟସରେ ଏକ ନିଶ୍ଚିତ ଆୟର ସ୍ରୋତ ସୃଷ୍ଟି କରିବା।

ବର୍ତ୍ତମାନ ଆପଣଙ୍କ ପାଇଁ କେଉଁ ନିଷ୍ପତ୍ତି ସଠିକ୍?

ସମୟ ପୂର୍ବରୁ ଆକାଉଣ୍ଟ ବନ୍ଦ କରିବା ନିଷ୍ପତ୍ତି ସମ୍ପୂର୍ଣ୍ଣ ଭାବେ ଆପଣଙ୍କ ବର୍ତ୍ତମାନର ଆର୍ଥିକ ସଙ୍କଟ ଉପରେ ନିର୍ଭର କରେ। ଯଦି ଆପଣଙ୍କ ପାଖରେ ଟଙ୍କାର ଅତ୍ୟନ୍ତ ଅଭାବ ଅଛି ଏବଂ ଆପଣଙ୍କ ପାଖରେ ଅନ୍ୟ କୌଣସି ବିକଳ୍ପ ନାହିଁ, ତେବେ ବାଧ୍ୟ ହୋଇ ଆପଣ ଏହାକୁ ବନ୍ଦ କରିପାରନ୍ତି।

କିନ୍ତୁ ମନେରଖନ୍ତୁ, ଏହାଦ୍ୱାରା ଆପଣଙ୍କ ନିଜର ଭବିଷ୍ୟତର ଆର୍ଥିକ ସୁରକ୍ଷା କ୍ଷତିଗ୍ରସ୍ତ ହେବ। ଯଦି ଅନ୍ୟ କୌଣସି ଉପାୟରେ ଟଙ୍କାର ଯୋଗାଡ଼ ହୋଇପାରୁଛି, ତେବେ APY ଆକାଉଣ୍ଟକୁ ବନ୍ଦ ନକରି ୬୦ ବର୍ଷ ପର୍ଯ୍ୟନ୍ତ ଚାଲୁରଖିବା ହିଁ ଆପଣଙ୍କ ପାଇଁ ବୁଦ୍ଧିମାନର କାମ ହେବ।