ଆପଣ WhatsAppରେ ପଠାଉଥିବା ଫଟୋ କେତେ ସୁରକ୍ଷିତ, ଜାଣନ୍ତୁ ସମ୍ପୂର୍ଣ୍ଣ ତଥ୍ୟ…
WhatsAppର ପର୍ସନାଲ୍ ଚାଟ୍ରେ ପଠାଯାଉଥିବା ମେସେଜ୍, ଫଟୋ ଏବଂ ଭିଡିଓ ଡିଫଲ୍ଟ ଭାବେ End-to-End Encryption ଦ୍ୱାରା ସୁରକ୍ଷିତ ରହିଥାଏ।
ନୂଆଦିଲ୍ଲୀ: ଆଜି WhatsApp କେବଳ ଚାଟ୍ କରିବାର ମାଧ୍ୟମ ହୋଇ ରହିନାହିଁ। ଲୋକମାନେ ଏହା ଜରିଆରେ ଫଟୋ, ଡକ୍ୟୁମେଣ୍ଟ, ସ୍କ୍ରିନ୍ସଟ୍ ଏବଂ ଅନେକ ଜରୁରୀ ସୂଚନା ଓ ଫଟୋ ମଧ୍ୟ ଶେୟାର କରୁଛନ୍ତି।
ଏହା ସହିତ ଦେଶରେ ସାଇବର ଠକେଇ ମାମଲା ମଧ୍ୟ ଦ୍ରୁତ ଗତିରେ ବଢ଼ୁଛି। ଅନେକ ମାମଲାରେ ଠକମାନେ ହ୍ୱାଟ୍ସଆପ ସମେତ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମକୁ ଠକେଇ ପାଇଁ ବ୍ୟବହାର କରୁଛନ୍ତି।
ଏଭଳି ପରିସ୍ଥିତିରେ ଅନେକ ଲୋକଙ୍କ ମନରେ ପ୍ରଶ୍ନ ଉଠେ ଯେ, ହ୍ୱାଟ୍ସଆପରେ ଫଟୋ ଶେୟାର କରିବା କେତେ ସୁରକ୍ଷିତ? ଆସନ୍ତୁ, ଏହା ବିଷୟରେ ବିସ୍ତାରରେ ଜାଣିବା।
ବାସ୍ତବରେ, WhatsAppର ପର୍ସନାଲ୍ ଚାଟ୍ରେ ପଠାଯାଉଥିବା ମେସେଜ୍, ଫଟୋ ଏବଂ ଭିଡିଓ ଡିଫଲ୍ଟ ଭାବେ End-to-End Encryption ଦ୍ୱାରା ସୁରକ୍ଷିତ ରହିଥାଏ।
ଏହାର ଅର୍ଥ ହେଉଛି, ପଠାଯାଇଥିବା ଫଟୋକୁ କେବଳ ଫଟୋ ପଠାଇଥିବା ବ୍ୟକ୍ତି ଏବଂ ଯିଏ ଏହାକୁ ରିସିଭ୍ କରିଛନ୍ତି, ସେମାନଙ୍କ ଡିଭାଇସ୍ରେ ହିଁ ଦେଖାଯାଇପାରିବ। ହ୍ୱାଟ୍ସଆପର କହିବା ଅନୁସାରେ, ମଝିରେ WhatsApp ମଧ୍ୟ ଏହି କଣ୍ଟେଣ୍ଟକୁ ପଢ଼ିପାରେ ନାହିଁ।
ଅର୍ଥାତ୍, ଫଟୋ ପଠାଇବା ସମୟରେ ଇଣ୍ଟରନେଟ୍ ଜରିଆରେ ଡାଟା ଟ୍ରାନ୍ସଫର ହେଉଥିବା ବେଳେ ଏହାର ସୁରକ୍ଷା ପାଇଁ ଶକ୍ତିଶାଳୀ ଏନ୍କ୍ରିପ୍ସନ୍ ବ୍ୟବସ୍ଥା ରହିଥାଏ।
ତେବେ End-to-End Encryption ଥିବାର ଅର୍ଥ ଏହା ନୁହେଁ ଯେ ଫଟୋ ପ୍ରତ୍ୟେକ ପରିସ୍ଥିତିରେ ସୁରକ୍ଷିତ ରହିବ। ବାସ୍ତବରେ, ସବୁଠାରୁ ବଡ଼ ବିପଦ ଅନେକ ସମୟରେ WhatsAppର ସର୍ଭରରୁ ନୁହେଁ, ବରଂ ୟୁଜରଙ୍କ ଡିଭାଇସ୍ କିମ୍ବା ଫଟୋ ଯାହାଙ୍କୁ ପଠାଯାଇଛି, ସେହି ବ୍ୟକ୍ତିଙ୍କଠାରୁ ଆସିପାରେ।
ଯଦି କାହାର ଫୋନ୍ରେ ମାଲୱେୟାର ରହିଛି, ଫୋନ୍ ଅନଲକ୍ ଅବସ୍ଥାରେ ଅନ୍ୟ କାହାର ହାତରେ ପଡ଼ିଯାଏ କିମ୍ବା ଆକାଉଣ୍ଟ ଅନ୍ୟ କୌଣସି ଡିଭାଇସ୍ ସହିତ କନେକ୍ଟ ହୋଇଯାଏ, ତେବେ ବ୍ୟକ୍ତିଗତ ଡାଟା ପ୍ରଘଟ ହେବାର ଆଶଙ୍କା ବଢ଼ିପାରେ। ଏଭଳି ବିପଦରୁ ୟୁଜରଙ୍କୁ ସୁରକ୍ଷା ଦେବା ପାଇଁ WhatsApp ମଧ୍ୟ ନିୟମିତ ଭାବେ ନିଜର ସୁରକ୍ଷା ପ୍ରଯୁକ୍ତିକୁ ଅପଡେଟ୍ କରିଥାଏ।
ଏହା ବ୍ୟତୀତ, ଚାଟ୍ରେ ଥିବା ଫଟୋ ଏବଂ ଅନ୍ୟ ମିଡିଆର ବ୍ୟାକଅପ୍ Google Drive କିମ୍ବା iCloud ଭଳି ସର୍ଭିସ୍ରେ ସେଭ୍ ହୋଇପାରେ। ହ୍ୱାଟ୍ସଆପ ୟୁଜରମାନଙ୍କୁ End-to-End Encrypted Backup ନାମକ ଏକ ବିକଳ୍ପ ଦେଇଛି। ଏହାକୁ ଆକ୍ଟିଭ୍ କଲେ ବ୍ୟାକଅପ୍କୁ ଅତିରିକ୍ତ ସୁରକ୍ଷା ମିଳିଥାଏ।
କମ୍ପାନୀର କହିବା ଅନୁସାରେ, ଏହି ବିକଳ୍ପ ଆକ୍ଟିଭ୍ ଥିଲେ ହ୍ୱାଟ୍ସଆପକିମ୍ବା ବ୍ୟାକଅପ୍ ସର୍ଭିସ୍ ପ୍ରୋଭାଇଡରଙ୍କ ପାଖରେ ବ୍ୟାକଅପ୍କୁ ଡିକ୍ରିପ୍ଟ କରିବାର କୌଣସି ପ୍ରଯୁକ୍ତି ରହେ ନାହିଁ।
୨୦୨୫ ମସିହାରେ WhatsApp Passkey ଜରିଆରେ End-to-End Encrypted Backupକୁ ସୁରକ୍ଷିତ ରଖିବା ପାଇଁ ଏକ ବିକଳ୍ପ ଦେବା ଆରମ୍ଭ କରିଥିଲା। ଏହା ଦ୍ୱାରା ଫିଙ୍ଗରପ୍ରିଣ୍ଟ, ଫେସ୍ ଅଥେଣ୍ଟିକେସନ୍ କିମ୍ବା ସ୍କ୍ରିନ୍ ଲକ୍ ବ୍ୟବହାର କରି ବ୍ୟାକଅପ୍କୁ ଅଧିକ ସୁରକ୍ଷିତ ରଖାଯାଇପାରେ।
ଏତିକି ନୁହେଁ, ଯଦି ଆପଣ ଏପରି କୌଣସି ଫଟୋ ପଠାଉଛନ୍ତି, ଯାହାକୁ ସାମ୍ନାରେ ଥିବା ବ୍ୟକ୍ତି ସାଧାରଣ ଚାଟ୍ରେ ସ୍ଥାୟୀ ଭାବେ ସେଭ୍ କରି ନରଖନ୍ତୁ ବୋଲି ଆପଣ ଚାହୁଁଛନ୍ତି, ତେବେ WhatsAppର View Once ଅପ୍ସନ୍ ଆପଣଙ୍କ ପାଇଁ ବହୁତ ଉପଯୋଗୀ ହୋଇପାରେ।
ଏହି ଅପ୍ସନ୍ରେ ଫଟୋ କିମ୍ବା ଭିଡିଓ ଥରେ ଦେଖିବା ପରେ ଏହା ସାଧାରଣ ମିଡିଆ ଭଳି ଚାଟ୍ରେ ଉପଲବ୍ଧ ରହେ ନାହିଁ। WhatsAppର କହିବା ଅନୁସାରେ, View Once ମିଡିଆ ମଧ୍ୟ End-to-End Encryption ଦ୍ୱାରା ସୁରକ୍ଷିତ ରହିଥାଏ।
ନିଜର ବ୍ୟକ୍ତିଗତ ଫଟୋର ସୁରକ୍ଷା ବଢ଼ାଇବା ପାଇଁ WhatsAppକୁ ସବୁବେଳେ ଅପଡେଟ୍ ରଖନ୍ତୁ। Two-Step Verification ଅନ୍ କରନ୍ତୁ, ଅଜଣା ବ୍ୟକ୍ତିଙ୍କଠାରୁ ଆସୁଥିବା ସନ୍ଦେହଜନକ ଲିଙ୍କ କିମ୍ବା ଫାଇଲ୍ଠାରୁ ଦୂରେଇ ରୁହନ୍ତୁ ଏବଂ WhatsApp ଆକାଉଣ୍ଟ ସହ ଯୋଡ଼ି ହୋଇଥିବା ଡିଭାଇସ୍ଗୁଡ଼ିକୁ ସମୟ ସମୟରେ ଯାଞ୍ଚ କରନ୍ତୁ।
ଅତ୍ୟନ୍ତ ସମ୍ବେଦନଶୀଳ କିମ୍ବା ବ୍ୟକ୍ତିଗତ ଫଟୋ ପଠାଇବା ସମୟରେ ଏହା ମଧ୍ୟ ଭାବନ୍ତୁ ଯେ, ସାମ୍ନାରେ ଥିବା ବ୍ୟକ୍ତି ସେହି ଫଟୋକୁ ଆଗକୁ ଅନ୍ୟ କାହା ସହ ଶେୟାର କରିପାରନ୍ତି କି ନାହିଁ।