ହକି ବିଶ୍ୱକପ୍: ୫-୩ ଗୋଲ୍ରେ ପାକିସ୍ତାନକୁ ପରାସ୍ତ କଲା ଭାରତ
ହରମନପ୍ରୀତ ନିଜ ପାରମ୍ପରିକ ଶୈଳୀରେ ଦିନର ଆରମ୍ଭ କରିଥିଲେ। ମ୍ୟାଚ୍ର ପ୍ରଥମ ପେନାଲ୍ଟି କର୍ଣ୍ଣରରେ ସେ ଡ୍ରାଗ୍ ଫ୍ଲିକ୍ ମାଧ୍ୟମରେ ବଲ୍କୁ ଗୋଲପୋଷ୍ଟର ତଳ ଡାହାଣ କୋଣରେ ପହଞ୍ଚାଇ ଭାରତକୁ ୧-୦ର ଅଗ୍ରଣୀ ଦେଇଥିଲେ
ନୂଆଦିଲ୍ଲୀ: ଆମଷ୍ଟେଲଭିନ୍ରେ ଖେଳାଯାଇଥିବା ଏଫ୍ଆଇଏଚ୍ ହକି ବିଶ୍ୱକପ-୨୦୨୬ର ପୁଲ୍-ଡି ମ୍ୟାଚ୍ରେ ପାକିସ୍ତାନକୁ ୫-୩ ଗୋଲ୍ରେ ଭାରତ ପରାସ୍ତ କରି ପରବର୍ତ୍ତୀ ରାଉଣ୍ଡ ପାଇଁ ଯୋଗ୍ୟତା ହାସଲ କରିଛି। ଅନ୍ୟପଟେ ପାକିସ୍ତାନ ବିଶ୍ୱକପ୍ରୁ ବାଦ୍ ପଡ଼ିଛି। ଭାରତ ପକ୍ଷରୁ ହରମନପ୍ରୀତ ସିଂହ ଓ ଅଭିଷେକ ଦୁଇଟି ଲେଖାଏଁ ଗୋଲ୍ କରିଥିବାବେଳେ ହାର୍ଦ୍ଦିକ ପେନାଲ୍ଟି ଷ୍ଟ୍ରୋକ୍ରୁ ଗୋଟିଏ ଗୋଲ୍ ଦେଇଥିଲେ। ପାକିସ୍ତାନ ପକ୍ଷରୁ ହନାନ ଶାହିଦ ୨ଟି ଏବଂ ସୁଫିଆନ ଖାନ ଗୋଟିଏ ଗୋଲ୍ କରିଥିଲେ।
ହରମନପ୍ରୀତ ନିଜ ପାରମ୍ପରିକ ଶୈଳୀରେ ଦିନର ଆରମ୍ଭ କରିଥିଲେ। ମ୍ୟାଚ୍ର ପ୍ରଥମ ପେନାଲ୍ଟି କର୍ଣ୍ଣରରେ ସେ ଡ୍ରାଗ୍ ଫ୍ଲିକ୍ ମାଧ୍ୟମରେ ବଲ୍କୁ ଗୋଲପୋଷ୍ଟର ତଳ ଡାହାଣ କୋଣରେ ପହଞ୍ଚାଇ ଭାରତକୁ ୧-୦ର ଅଗ୍ରଣୀ ଦେଇଥିଲେ। ଏହାର ୬ ମିନିଟ ପରେ ଅଭିଷେକ ଚମତ୍କାର ଖେଳ ପ୍ରଦର୍ଶନ କରି ଗୋଲ୍ ନିକଟରେ ଶାନଦାର ଡ୍ରିବ୍ଲିଂ କରି ସ୍କୋରକୁ ୨-୦ କରିଦେଇଥିଲେ।
୨୧ତମ ମିନିଟ୍ରେ ହରମନପ୍ରୀତ ପୁଣିଥରେ କମାଲ କରିଥିଲେ। ସେ ପେନାଲ୍ଟି କର୍ଣ୍ଣରରେ ଏକ ଚତୁର ପାସ ଦେବାକୁ ଚେଷ୍ଟା କରିଥିଲେ, କିନ୍ତୁ ବଲ୍ ପୁଣି ତାଙ୍କ ପାଖକୁ ଫେରିଆସିଥିଲା। ଏହାପରେ ସେ ନିକଟରୁ ଏକ ଶକ୍ତିଶାଳୀ ସ୍ଲାପ୍ ଶଟ୍ ମାରି ଗୋଲ୍ କରିଥିଲେ।
ଏହାପରେ ପାକିସ୍ତାନୀ ଦଳ ଯେପରି ଜାଗି ଉଠିଥିଲା। ହନାନ ଶାହିଦ ନିଜର ଡ୍ରିବ୍ଲିଂ ଓ ଦ୍ରୁତ ଗତିର ଉପଯୋଗ କରି ଠିକ୍ ଏକ ମିନିଟ୍ ପରେ ଚମତ୍କାର ଫିଲ୍ଡ ଗୋଲ୍ କରି ସ୍କୋରକୁ ୩-୧ କରିଥିଲେ।
୨୪ତମ ମିନିଟ୍ରେ ଉଭୟ ଦଳ ଗୋଟିଏ ଲେଖାଏଁ ଗୋଲ୍ କରିଥିଲେ। ଅଭିଷେକ ଗୋଲ୍ ନିକଟରେ ପୁଣି ଚମତ୍କାର ଡ୍ରିବ୍ଲିଂ କରି ନିଜର ୩ଊ ସ୍କିଲ୍ ପ୍ରଦର୍ଶନ କରିଥିଲେ। ଏହାପରେ ପାକିସ୍ତାନର ପ୍ରଥମ ପେନାଲ୍ଟି କର୍ଣ୍ଣରରେ ସୁଫିଆନ ଡ୍ରାଗ୍ ଫ୍ଲିକ୍ ମାଧ୍ୟମରେ ଗୋଲ୍ କରି ସ୍କୋରକୁ ୪-୨ କରିଦେଇଥିଲେ।
ହାଫ୍-ଟାଇମ୍ ପର୍ୟ୍ୟନ୍ତ ପାକିସ୍ତାନର ପଲ୍ଲା ଭାରୀ ରହିଥିଲା। କିନ୍ତୁ ଭାରତ ଦ୍ୱିତୀୟାର୍ଦ୍ଧର ଆରମ୍ଭକୁ ଭଲ ଖେଳିଥିଲା। ୫ ମିନିଟ୍ ମଧ୍ୟରେ ସୁଖଜିତ ସିଂହଙ୍କ ଉପରେ ଅର୍ଶଦ ଲିଆକତଙ୍କ ବିପଜ୍ଜନକ ଟ୍ୟାକଲ୍ ପରେ ଭାରତକୁ ପେନାଲ୍ଟି ଷ୍ଟ୍ରୋକ ମିଳିଥିଲା। ହାର୍ଦ୍ଦିକ କୌଣସି ଭୁଲ୍ ନକରି ଏହାକୁ ଗୋଲ୍ରେ ପରିଣତ କରିଥିଲେ।
ତୃତୀୟ କ୍ୱାର୍ଟର ସମ୍ପୂର୍ଣ୍ଣ ଭାବେ ଭାରତର ନିୟନ୍ତ୍ରଣରେ ରହିଥିଲା। ଭାରତ ବଲ୍ ଉପରେ ନିଜର ଦଖଲ ବଜାୟ ରଖିଥିଲା। କିନ୍ତୁ ଚତୁର୍ଥ କ୍ୱାର୍ଟରର ଆରମ୍ଭରେ ପାକିସ୍ତାନ ଅଧିକ ଦ୍ରୁତ ଗତିରେ ଖେଳିଥିଲା। ହାଇ-ପ୍ରେସିଂ ଯୋଗୁଁ ଶାହିଦଙ୍କୁ ସୂରଜ କେରକେରାଙ୍କ ବିପକ୍ଷରେ ୱାନ୍-ଅନ୍-ୱାନ୍ ସୁଯୋଗ ମିଳିଥିଲା ଏବଂ ସେ ଶାନ୍ତ ଭାବେ ବଲ୍କୁ ନିକଟସ୍ଥ ପୋଷ୍ଟର ତଳ କୋଣରେ ପହଞ୍ଚାଇ ଗୋଲ୍ କରିଥିଲେ।
ସ୍କୋର ୫-୩ ହେବା ପରେ ପାକିସ୍ତାନ ପୁଣି ସମ୍ପୂର୍ଣ୍ଣ ଶକ୍ତି ଲଗାଇ ଖେଳିବାକୁ ଉତ୍ସାହିତ ହୋଇଥିଲା। ଏହା ଫଳରେ ମ୍ୟାଚ୍ ରୋମାଞ୍ଚକର ମୋଡ଼ ନେଇଥିଲା। ତେବେ ଭାରତ ନିଜର ଅଗ୍ରଣୀ ବଜାୟ ରଖିବା ସହ ଶେଷରେ ମ୍ୟାଚ୍କୁ ୫-୩ରେ ଜିତି ନେଇଥିଲା।