ଭାଙ୍ଗିଲା ୩ ଖେଳାଳିଙ୍କ ମନ, ଏହି କାରଣରୁ ଆଫଗାନିସ୍ତାନ ଟି-୨୦ ସିରିଜରେ ମିଳିଲାନି ସ୍ଥାନ

ଓଡ଼ିଶା ଭାସ୍କର ଡେସ୍କ: ଆଫଗାନିସ୍ତାନ ବିପକ୍ଷ ଆଗାମୀ ୩ ମ୍ୟାଚ୍ ବିଶିଷ୍ଟ T20I ସିରିଜ୍ ପାଇଁ BCCI ଭାରତୀୟ ଦଳ ଘୋଷଣା କରିଛି। ଶ୍ରେୟସ ଅୟର୍ ଦଳର ଅଧିନାୟକ ଏବଂ ତିଲକ ବର୍ମା ଉପଅଧିନାୟକ ରହିଛନ୍ତି। ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କୁ ମଧ୍ୟ ୧୫ ଜଣିଆ ଦଳରେ ସ୍ଥାନ ମିଳିଛି।

ସବୁଠାରୁ ବଡ଼ ଖବର ହେଉଛି ଦ୍ରୁତ ବୋଲର ଜସପ୍ରୀତ ବୁମ୍ରାଙ୍କ ଦଳକୁ ପ୍ରତ୍ୟାବର୍ତ୍ତନ। ତେବେ ବୁମ୍ରାଙ୍କ ସହ ନୀତିଶ କୁମାର ରେଡ୍ଡୀ, ୱାଶିଂଟନ୍ ସୁନ୍ଦର ଏବଂ ହର୍ଷିତ ରାଣାଙ୍କ ଖେଳିବା ଫିଟନେସ୍ କ୍ଲିୟରାନ୍ସ ଉପରେ ନିର୍ଭର କରିବ।

ବୈଭବ ସୂର୍ଯ୍ୟବଂଶୀଙ୍କୁ ମିଳିଲା ସୁଯୋଗ: ଯୁବ ଖେଳାଳି ବୈଭବ ସୂର୍ଯ୍ୟବଂଶୀଙ୍କୁ ଆଫଗାନିସ୍ତାନ ବିପକ୍ଷ T20I ଦଳରେ ସ୍ଥାନ ମିଳିଛି। ଇଂଲଣ୍ଡ ବିପକ୍ଷରେ ଆନ୍ତର୍ଜାତୀୟ ଡେବ୍ୟୁ ପରେ ଏହା ତାଙ୍କ ପାଇଁ ଆଉ ଏକ ବଡ଼ ସୁଯୋଗ। ଜିମ୍ବାୱେ ଗସ୍ତରେ ମଧ୍ୟ ସେ ଭଲ ପ୍ରଦର୍ଶନ କରି ଚୟନକର୍ତ୍ତାଙ୍କ ଭରସା ଜିତିଥିଲେ।

ରିଙ୍କୁ ସିଂହଙ୍କୁ ସ୍ଥାନ ମିଳିଲା ନାହିଁ: ଭାରତର ଶେଷ T20I ସିରିଜ୍‌ରେ ଦଳର ଅଂଶ ଥିବା ରିଙ୍କୁ ସିଂହଙ୍କୁ ଏଥର ଦଳରେ ସାମିଲ କରାଯାଇନାହିଁ। ଫିନିଶର ଭାବେ ରିଙ୍କୁ ଭାରତ ପାଇଁ ୪୮ଟି T20I ଖେଳି ୭୦୨ ରନ୍ କରିଛନ୍ତି।

କୁଲଦୀପ ଯାଦବ ଏବଂ କ୍ରୁଣାଲ ପାଣ୍ଡ୍ୟା ମଧ୍ୟ ବାଦ୍: ଭାରତୀୟ ସ୍ପିନର କୁଲଦୀପ ଯାଦବଙ୍କୁ ମଧ୍ୟ ଏଥର ଦଳରେ ସ୍ଥାନ ମିଳିନାହିଁ। ସେ ୨୦୨୬ T20 ବିଶ୍ୱକପ୍ ବିଜୟୀ ଭାରତୀୟ ଦଳର ଅଂଶ ଥିଲେ। ଅନ୍ୟପଟେ, ଗତ ଦୁଇ IPL ସିଜନରେ ଭଲ ପ୍ରଦର୍ଶନ କରିଥିବା କ୍ରୁଣାଲ ପାଣ୍ଡ୍ୟାଙ୍କୁ ମଧ୍ୟ ଚୟନକର୍ତ୍ତାମାନେ ସୁଯୋଗ ଦେଇନାହାନ୍ତି। ୨୦୨୧ ପରେ ଆନ୍ତର୍ଜାତୀୟ କ୍ରିକେଟ୍‌କୁ ଫେରିବା ତାଙ୍କ ଆଶା ପୁଣି ଅଧୁରା ରହିଛି।

ଆଫଗାନିସ୍ତାନ ବିପକ୍ଷ ଭାରତୀୟ T20I ଦଳ: ଶ୍ରେୟସ ଅୟର୍ (ଅଧିନାୟକ), ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ, ସଞ୍ଜୁ ସାମସନ୍ (ୱିକେଟକିପର), ଈଶାନ କିଶନ (ୱିକେଟକିପର), ତିଲକ ବର୍ମା (ଉପଅଧିନାୟକ), ଶିବମ ଦୁବେ, ନୀତିଶ କୁମାର ରେଡ୍ଡୀ, ଅକ୍ଷର ପଟେଲ, ୱାଶିଂଟନ୍ ସୁନ୍ଦର, ବରୁଣ ଚକ୍ରବର୍ତ୍ତୀ, ରବି ବିଷ୍ଣୋଇ, ଜସପ୍ରୀତ ବୁମ୍ରା, ଅର୍ଶଦୀପ ସିଂହ, ହର୍ଷିତ ରାଣା।

କେବେ ହେବ ସିରିଜ୍: ଭାରତ ଓ ଆଫଗାନିସ୍ତାନ ମଧ୍ୟରେ ୩ଟି T20I ମ୍ୟାଚ୍ ସେପ୍ଟେମ୍ବର ୧୩, ୧୫ ଏବଂ ୧୭ ତାରିଖରେ ନୂଆଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଖେଳାଯିବ।