ଟ୍ରମ୍ପ ଖେଳୁଛନ୍ତି ଟାରିଫ୍ ଖେଳ, ସେପଟେ ମୋଦୀ ରଚିଲେଣି ମାଷ୍ଟରପ୍ଲାନ, ଏହି ନେତାଙ୍କୁ କରିଦେଲେ ନିଜର ବନ୍ଧୁ

Trump Tariff: ଅମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳକୁ ଏକ ବର୍ଷ ପୂରଣ ହେବାକୁ ଯାଉଛି। ଦ୍ୱିତୀୟଥର ସତ୍ତାରେ ଆସିବା ପରେ ଟ୍ରମ୍ପ ପ୍ରାୟ ପ୍ରତି ଦୁଇ ଦିନରେ କୌଣସି ନ କୌଣସି ଦେଶ ବିରୋଧରେ ଟାରିଫ୍ ଘୋଷଣା କରୁଥିବା ଦେଖାଯାଉଛି। ଏହି କ୍ରମରେ ଭାରତ ଭଳି ଅମେରିକାର ଏକ ବଡ଼ ବ୍ୟବସାୟିକ ସାଥୀ ମଧ୍ୟ ଚାପରୁ ରହି ପାରିନାହିଁ।

ବର୍ତ୍ତମାନ ଭାରତ ଉପରେ ୫୦ ପ୍ରତିଶତ ଟାରିଫ୍ ଲାଗୁ ହୋଇଛି। କିନ୍ତୁ ଯଦି ଭାରତ ରୁଷ ସହ ତେଲ କ୍ରୟ ଜାରି ରଖେ, ତେବେ ଏହି ଟାରିଫ୍ ୫୦୦ ପ୍ରତିଶତ ପର୍ଯ୍ୟନ୍ତ ବଢ଼ିପାରେ। ସେହିପରି, ଯଦି ଭାରତ ଇରାନ ସହ ବ୍ୟବସାୟିକ ସମ୍ପର୍କ ଅବ୍ୟାହତ ରଖେ, ତେବେ ଅଲଗା ଭାବେ ୨୫ ପ୍ରତିଶତ ଟାରିଫ୍ ଲାଗିପାରେ। ଏହା ସହ ମୋଟ ମିଶାଇ ଭାରତ ଉପରେ ୫୭୫ ପ୍ରତିଶତ ପର୍ଯ୍ୟନ୍ତ ଟାରିଫ୍ ଲାଗିବାର ଆଶଙ୍କା ସୃଷ୍ଟି ହୋଇଛି।

ଟ୍ରମ୍ପଙ୍କ ଏହି କଠୋର ନୀତି ଦ୍ୱାରା ଦୁଇ ଦେଶ ମଧ୍ୟରେ ବ୍ୟବସାୟ ଓ କୂଟନୈତିକ ସମ୍ପର୍କରେ ଘମାଘମ୍ ଟକ୍କର ଦେଖାଦେଇଛି। ତଥାପି, ଏହି ପରିସ୍ଥିତି ଭାରତକୁ ନିଜ ବ୍ୟବସାୟ ରଣନୀତି ପୁନଃଗଠନ କରିବାକୁ ବାଧ୍ୟ କରିଛି।

ସମ୍ପ୍ରତିକ ବ୍ୟବସାୟ ତଥ୍ୟ ଅନୁସାରେ, ଭାରତର ଅର୍ଥନୀତି ଆଶା ଅପେକ୍ଷା ଭଲ ପ୍ରଦର୍ଶନ କରୁଛି। ଡିସେମ୍ବରରେ ଚୀନକୁ ଭାରତର ରପ୍ତାନି ୬୭ ପ୍ରତିଶତ ବୃଦ୍ଧି ପାଇ ୨ ବିଲିୟନ ଡଲାରରେ ପହଞ୍ଚିଛି । ସେପଟେ କିନ୍ତୁ ଅମେରିକାକୁ ରପ୍ତାନି ୧.୮ ପ୍ରତିଶତ କମି ୬.୮ ବିଲିୟନ ଡଲାର ରହିଛି।

ଭାରତ ଏବେ UAE, ଅଷ୍ଟ୍ରେଲିଆ, ଓମାନ, UK ସହ ଫ୍ରି ଟ୍ରେଡ୍ ଏଗ୍ରିମେଣ୍ଟ ଓ ଆର୍ଥିକ ଭାଗୀଦାରୀ ସୁଦୃଢ଼ କରୁଛି। ଇଉରୋପିୟନ୍ ୟୁନିଅନ୍ ସହ ଟ୍ରେଡ୍ ଡିଲ୍ ମଧ୍ୟ ଶୀଘ୍ର ଫାଇନାଲ୍ ହେବାର ସମ୍ଭାବନା ରହିଛି। ଏହା ମାଧ୍ୟମରେ ଭାରତ ନିଜକୁ ଗ୍ଲୋବାଲ୍ ସପ୍ଲାଇ ଚେନ୍‌ରେ ଏକ ବିକଳ୍ପ ମାନୁଫ୍ୟାକ୍ଚରିଂ ହବ୍ ଭାବେ ପ୍ରତିଷ୍ଠା କରିବାକୁ ଚେଷ୍ଟା କରୁଛି।