ବିଦେଶରେ ଫସିଛନ୍ତି ଭାରତୀୟ, ଇରାନରୁ ଆଣିବା ପାଇଁ ଚାଲିଛି ପ୍ରସ୍ତୁତି, ସେପଟେ ଇରାନରେ ବଢୁଛି ରାଜନୈତିକ ଅସ୍ଥିରତା…

ଓଡିଶା ଭାସ୍କର: ଇରାନରେ ଫସିଥିବା ଭାରତୀୟଙ୍କୁ ଆଣିବା ପାଇଁ ଚାଲିଛି ଜୋରଦାର ପ୍ରସ୍ତୁତି। ଇରାନର ପରିବର୍ତ୍ତନଶୀଳ ରାଜନୈତିକ ପରିସ୍ଥିତି ମଧ୍ୟରେ, ଭାରତ ସେଠାରୁ ତାର ନାଗରିକମାନଙ୍କୁ ବାହାର କରିବାକୁ ପ୍ରସ୍ତୁତି ଆରମ୍ଭ କରିଛି। ଫେରିବାକୁ ଚାହୁଁଥିବା ଯେକୌଣସି ଭାରତୀୟଙ୍କୁ ବୈଦେଶିକ ବ୍ୟାପାର ମନ୍ତ୍ରଣାଳୟ ସହାୟତା କରିବ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଇରାନକୁ ଧମକ ପରେ ଭାରତୀୟ ଅଧିକାରୀମାନେ ପରିସ୍ଥିତିର ନିରନ୍ତର ସମୀକ୍ଷା କରୁଛନ୍ତି।

ଇରାନରେ ଥିବା ଭାରତୀୟ ଦୂତାବାସ ଦେଶର ବିଭିନ୍ନ ସ୍ଥାନରେ ଫସି ରହିଥିବା ଭାରତୀୟ ଛାତ୍ରମାନଙ୍କ ବିଷୟରେ ସୂଚନା ସଂଗ୍ରହ କରିବା ଆରମ୍ଭ କରିଛି। ଅନେକ ଅଞ୍ଚଳରେ ଇଣ୍ଟରନେଟ୍ ବିଭ୍ରାଟ ମଧ୍ୟ ସମସ୍ୟା ସୃଷ୍ଟି କରୁଛି। ଗତ 10 ଦିନରେ ଭାରତୀୟ ବୈଦେଶିକ ବ୍ୟାପାର ମନ୍ତ୍ରଣାଳୟ ଇରାନ ସମ୍ପର୍କରେ ଦୁଇଟି ପରାମର୍ଶ ଜାରି କରିଛି।

ଇରାନକୁ ଯାତ୍ରା ନ କରିବା ପାଇଁ ସରକାର ଦେଲେ ନିର୍ଦ୍ଦେଶ:

ଇରାନରେ ଚାଲିଛି ଭୟଙ୍କର ଦଙ୍ଗା, କୌଣସି ଭାରତୀୟ ମଧ୍ୟ ସେଠାକୁ ନଯିବା ପାଇଁ ସଫା ସଫା ମନା କରିଛନ୍ତି ଭାରତୀୟ ସରକାର। ଅନ୍ଯପଟେ ଇରାନରେ ରହିଥିବା ଭାରତୀୟଙ୍କୁ ମଧ୍ୟ ସେଠାରୁ ଆସିବାକୁ କୁହାଯାଇଛି। ଇରାନରେ ଥିବା ଭାରତୀୟ ଦୂତାବାସ ଏକ ନୂତନ ପରାମର୍ଶ ଜାରି କରିଛି, ଯେଉଁଥିରେ ଭାରତୀୟ ନାଗରିକ, ଛାତ୍ର, ତୀର୍ଥଯାତ୍ରୀ, ବ୍ୟବସାୟୀ ଏବଂ ପର୍ଯ୍ୟଟକଙ୍କୁ ପରିସ୍ଥିତିକୁ ଦୃଷ୍ଟିରେ ରଖି ବାଣିଜ୍ୟିକ ବିମାନ ସମେତ ଉପଲବ୍ଧ ପରିବହନ ପଦ୍ଧତି ବ୍ୟବହାର କରି ଦେଶ ଛାଡିବାକୁ ଅନୁରୋଧ କରାଯାଇଛି। ଏନେଇ ଭାରତର ବୈଦେଶିକ ମନ୍ତ୍ରୀ ଓ ଇରାନର ବୈଦେଶିକ ମନ୍ତ୍ରୀ ମଧ୍ୟ ଅନେକଲ ସମୟ ଧରି ଆଲୋଚନା କରୁଥିଲେ।

ଗତ ମାସରେ ଇରାନୀ ମୁଦ୍ରା, ରିଆଲ ରେକର୍ଡ ସର୍ବନିମ୍ନ ସ୍ତରରେ ଖସିବା ପରେ ତେହେରାନରେ ପ୍ରତିବାଦ ଆରମ୍ଭ ହୋଇଥିଲା। ସେବେଠାରୁ, ଏହି ପ୍ରତିବାଦ ସମସ୍ତ 31 ପ୍ରଦେଶକୁ ବ୍ୟାପିଛି, ଅର୍ଥନୈତିକ ସଙ୍କଟ ବିରୁଦ୍ଧରେ ଆନ୍ଦୋଳନରୁ ଆରମ୍ଭ ହୋଇ ରାଜନୈତିକ ପରିବର୍ତ୍ତନର ଦାବିରେ ପରିଣତ ହୋଇଛି।

ଜାନୁଆରୀ 5, 2026 ରେ ଜାରି କରାଯାଇଥିବା ଏହାର ପୂର୍ବ ପରାମର୍ଶରେ, ବୈଦେଶିକ ବ୍ୟାପାର ମନ୍ତ୍ରଣାଳୟ ଭାରତୀୟ ନାଗରିକମାନଙ୍କୁ ଇରାନକୁ ଅଣ-ଅତ୍ୟାବଶ୍ୟକୀୟ ଯାତ୍ରା ଏଡାଇବାକୁ ଅନୁରୋଧ କରିଥିଲା। ଏହା ବ୍ୟତୀତ, ଭାରତୀୟ ନାଗରିକ ଏବଂ ଇରାନରେ ରହୁଥିବା ଭାରତୀୟ ବଂଶୋଦ୍ଭବ ଲୋକଙ୍କୁ ସତର୍କତା ଅବଲମ୍ବନ କରିବାକୁ ଏବଂ ପ୍ରତିବାଦ ସ୍ଥାନ ପରିଦର୍ଶନ ଏଡାଇବାକୁ ପରାମର୍ଶ ଦିଆଯାଇଥିଲା।ଅନ୍ଯପଟେ ଇରାନ ମଧ୍ୟ ଏଥିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ହସ୍ତକ୍ଷେପ ନ କରିବା ପାଇଁ ସଫା ସଫା କହିଛି।