ଭିନେଶ ଫୋଗାଟ ଏବଂ ବଜରଙ୍ଗ ପୁନିଆଙ୍କୁ ଆଶ୍ୱସ୍ତି, ଇସ୍ତଫା ମଞ୍ଜୁର କଲା ରେଲୱେ
ନୂଆଦିଲ୍ଲୀ: ଭାରତୀୟ ରେଳ ସୋମବାର ଦିନ ଭିନେଶ ଫୋଗାଟ ଏବଂ ବଜରଙ୍ଗ ପୁନିଆଙ୍କ ଇସ୍ତଫା ଗ୍ରହଣ କରିଛି । ଶୁକ୍ରବାର ଦିନ କଂଗ୍ରେସରେ ଯୋଗଦେବା ପୂର୍ବରୁ ଉଭୟ କୁସ୍ତିଯୋଦ୍ଧା ସେମାନଙ୍କ ରେଲୱେ ଚାକିରିରୁ ଇସ୍ତଫା ଦେଇଥିଲେ ।
କଂଗ୍ରେସରେ ଯୋଗଦେବା ସଙ୍ଗେ ସଙ୍ଗେ ହରିୟାଣା ବିଧାନସଭା ନିର୍ବାଚନ ପାଇଁ ଜୁଲାନାରୁ ଭିନେଶଙ୍କୁ ଟିକେଟ୍ ଦେବା ସହ ବଜରଙ୍ଗ ପୁନିଆକୁ କୃଷକ ୱିଙ୍ଗରେ ସାମିଲ କରିଛି ଦଳ ।
ତାଙ୍କ ଇସ୍ତଫା ଗ୍ରହଣ ହେବା ପରେ ଭିନେଶ ଫୋଗାଟଙ୍କୁ ଏକ ବଡ଼ ଆରାମ ମିଳିଛି । ବର୍ତ୍ତମାନ ତାଙ୍କ ପାଇଁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାର ରାସ୍ତା ସମ୍ପୂର୍ଣ୍ଣ ସଫା ହୋଇଯାଇଛି । ଯଦି ତାଙ୍କ ଇସ୍ତଫା ଗ୍ରହଣ କରାଯାଇ ନଥାନ୍ତା ଓ ଭିନେଶ ନିିର୍ବାଚନ ରେସରେ ଓହ୍ଲାଇଥାନ୍ତେ, ତେବେ ଏକ ବଡ଼ ସଙ୍କଟ ଦେଖାଦେଇଥାନ୍ତା । କାରଣ ଆଇନ ଅନୁସାରେ, ଯଦି କୌଣସି ବ୍ୟକ୍ତି କୌଣସି ସରକାରୀ ପଦବୀରେ ଅଛନ୍ତି ଓ ସେ ନିର୍ବାଚନ ଲଢ଼ିବାକୁ ଚାହୁଁଛନ୍ତି, ତେବେ ତାଙ୍କୁ ପ୍ରଥମେ ଇସ୍ତଫା ଦେଇ ବିଭାଗରୁ ଏନଓସି ନେବାକୁ ପଡ଼ିବ ।
ନାମାଙ୍କନ ସମୟରେ ଏନଓସିକୁ ମଧ୍ୟ ଡକ୍ୟୁମେଣ୍ଟ ସହିତ ସଂଲଗ୍ନ କରିବାକୁ ପଡିବ, ସେବେଯାଇ ରିଟର୍ଣ୍ଣିଂ ଅଫିସର ଆବେଦନ ଗ୍ରହଣ କରିବେ । ଅକ୍ଟୋବର ୫ତାରିଖରେ ହରିୟାଣାରେ ବିଧାନସଭା ନିର୍ବାଚନ ଅନୁଷ୍ଠିତ ହେବ, ଯେଉଁଥିପାଇଁ ନାମାଙ୍କନପତ୍ର ଚାଲିଛି । ଏହାର ଶେଷ ତାରିଖ ହେଉଛି ୧୨ ସେପ୍ଟେମ୍ବର, ଠିକ୍ ଏହା ପୂର୍ବରୁ ଭିନେଶ ଫୋଗାଟଙ୍କ ପାଇଁ ଏହା ଏକ ଆରାମଦାୟକ ଖବର ।
ଭିନେଶ ଫୋଗାଟଙ୍କୁ ତାଙ୍କ ଶାଶୁଘର ଜୁଲାନାରୁ ଟିକେଟ୍ ଦେଇଛନ୍ତି କଂଗ୍ରେସ । ଦୀର୍ଘ ଦିନ ଧରି ଜୁଲାନା ଆସନରେ କଂଗ୍ରେସ ବିଜୟକୁ ଅପେକ୍ଷା କରିଛି । ୨୦୦୫ ମସିହାରେ କଂଗ୍ରେସ ଏହି ଆସନ ଜିତିଥିଲା । ଦଳର ପଳାଇଯାଇଥିବା ଖ୍ୟାତିକୁ ପୁଣି ଫେରାଇଆଣିବାକୁ ଦଳ ଭିନେଶ ଫୋଗାଟଙ୍କୁ ପ୍ରାର୍ଥୀ କରି ଏକ ବଡ଼ ଚାଲ୍ ଖେଳିଛି । ଭିନେଶ ବର୍ତ୍ତମାନର ଜନନାକ ଜନତା ପାର୍ଟି (ଜେଜେପି) ବିଧାୟକ ଅମରଜିତଙ୍କ ସହ ପ୍ରତିଦ୍ୱନ୍ଦିତା କରିବେ ।