ସିଜାରିଆନ୍ ଡେଲିଭରି ପରେ ହେଉଛି କିଡନୀ ଫେଲ୍, ବଢ଼ୁଛି ମୃତ୍ୟୁ ସଂଖ୍ୟା, ଜାଣନ୍ତୁ ସି-ସେକସନ ସଂକ୍ରମଣ କେତେ ସାଂଘାତିକ

Cesarean Delivery: ରାଜସ୍ଥାନର କୋଟା ସ୍ଥିତ ମେଡିକାଲ କଲେଜ ହସ୍ପିଟାଲରୁ ଆସିଥିବା ଏକ ଦୁଃଖଦ ଖବର ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି। ସିଜେରିଆନ ଡେଲିଭରି ବା ସି-ସେକସନ (C-Section) ପରେ ମହିଳାଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ିବା ସହ କିଡନୀ ଫେଲ୍ ହେବା ଏବଂ ମୃତ୍ୟୁ ହେବା ଘଟଣା ସାଧାରଣ ଲୋକଙ୍କୁ ଭୟଭୀତ କରିଛି। କୋଟାର ନ୍ୟୁ ମେଡିକାଲ କଲେଜ ଏବଂ ଜେକେ ଲୋନ୍ ହସ୍ପିଟାଲରେ ଏବେ ସୁଦ୍ଧା ୪ ଜଣ ପ୍ରସୂତିଙ୍କ ମୃତ୍ୟୁ ହୋଇଥିବା ବେଳେ ଅନେକ ମହିଳା ଆଇସିୟୁ ଓ ଡାୟାଲିସିସରେ ଅଛନ୍ତି।

କିଡନୀ ଫେଲ୍ ହେବାର ମୁଖ୍ୟ କାରଣ

ଡାକ୍ତରଙ୍କ ଅନୁସାରେ, ସିଜେରିଆନ ପରେ କିଡନୀ ଫେଲ୍ ହେବା ପଛରେ ସେପ୍ସିସ୍ ବା ମାରାତ୍ମକ ସଂକ୍ରମଣ ସବୁଠାରୁ ବଡ଼ କାରଣ । ଯଦି ଅପରେସନ ପରେ ଶରୀରରେ ବ୍ୟାକ୍ଟେରିଆ ବ୍ୟାପିଯାଏ, ତେବେ ଏହା ରକ୍ତ ମାଧ୍ୟମରେ ସାରା ଶରୀରକୁ ସଂକ୍ରମିତ କରେ। ସଂକ୍ରମଣ ଫଳରେ ରକ୍ତଚାପ ବା ବ୍ଲଡ୍ ପ୍ରେସର ହଠାତ୍ କମିଯାଏ। ଫଳରେ କିଡନୀକୁ ପର୍ଯ୍ୟାପ୍ତ ପରିମାଣର ରକ୍ତ ପହଞ୍ଚି ପାରେନାହିଁ ଏବଂ ଏହା କାମ କରିବା ବନ୍ଦ କରିଦିଏ। ଗର୍ଭାବସ୍ଥା ଏବଂ ବଡ଼ ଅପରେସନ ଯୋଗୁଁ ମହିଳାଙ୍କ ରୋଗ ପ୍ରତିରୋଧକ ଶକ୍ତି କମିଯାଇଥାଏ, ଯାହା ସଂକ୍ରମଣକୁ ଦ୍ରୁତଗତିରେ ବଢ଼ାଇବାରେ ସାହାଯ୍ୟ କରେ।

ସି-ସେକସନ କାହିଁକି ସମ୍ବେଦନଶୀଳ?

ଡାକ୍ତରୀ ବିଜ୍ଞାନ ଅନୁସାରେ, ସିଜେରିଆନ ଏକ ସାଧାରଣ ପ୍ରକ୍ରିୟା ନୁହେଁ, ବରଂ ଏହା ଏକ ଜଟିଳ ସର୍ଜରୀ। ସାଧାରଣ ଡେଲିଭରି ତୁଳନାରେ ଏଥିରେ ଅଧିକ ରକ୍ତସ୍ରାବ ହେବାର ଆଶଙ୍କା ଥାଏ। ପେଟ ଏବଂ ଜରାୟୁର ଅନେକ ପରସ୍ତ କଟାଯାଉଥିବାରୁ ଏଥିରେ ସଂକ୍ରମଣ ବ୍ୟାପିବା ସହଜ ହୋଇଥାଏ। ଜରୁରୀକାଳୀନ ପରିସ୍ଥିତିରେ କରାଯାଉଥିବା ସିଜେରିଆନରେ ବିପଦ ସବୁଠାରୁ ଅଧିକ ରହିଥାଏ। ଡାଇବେଟିସ୍, ମୋଟାପଣ କିମ୍ବା ରକ୍ତହୀନତା ଥିବା ମହିଳାମାନଙ୍କ ପାଇଁ ଏହା ଅଧିକ ବିପଜ୍ଜନକ।

କୋଟା ଘଟଣାର ତଦନ୍ତ ଜାରି

ଏହି ଘଟଣାର ଗୁରୁତ୍ୱକୁ ଦେଖି ଜୟପୁରରୁ ଏକ ବିଶେଷଜ୍ଞ ଡାକ୍ତରୀ ଦଳ କୋଟାରେ ପହଞ୍ଚିଛନ୍ତି। ହସ୍ପିଟାଲରେ ବ୍ୟବହୃତ ହେଉଥିବା ଔଷଧ, ସଂକ୍ରମଣ ରୋକିବା ପାଇଁ ବ୍ୟବହୃତ ଉପକରଣ ଏବଂ ଅପରେସନ ଥିଏଟରର ପରିମଳ ବ୍ୟବସ୍ଥାର ଯାଞ୍ଚ କରାଯାଉଛି। ସିଜେରିଆନ ପରେ ଯଦି ଜ୍ୱର, ମୁଣ୍ଡ ବୁଲାଇବା କିମ୍ବା ପରିସ୍ରାର ପରିମାଣ କମିଯାଏ, ତେବେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରିବା ଉଚିତ୍।