ଶିକ୍ଷା ଓ ଗବେଷଣାରେ KISTର ବଡ଼ ପଦକ୍ଷେପ, CSIR-IMMT ସହ ସ୍ୱାକ୍ଷର ହେଲା MoU

ଭୁବନେଶ୍ୱର: ଶିକ୍ଷା ସହ ଗବେଷଣାକୁ ଆହୁରି ମଜବୁତ କରିବା ଦିଗରେ ଏକ ବଡ଼ ପଦକ୍ଷେପ ନେଇଛି ଜଟଣୀସ୍ଥିତ କୋଣାର୍କ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସ ଆଣ୍ଡ୍ ଟେକ୍ନୋଲୋଜି (KIST)।

ଦେଶର ପ୍ରତିଷ୍ଠିତ ଗବେଷଣା ପ୍ରତିଷ୍ଠାନ CSIR–ଇନଷ୍ଟିଚ୍ୟୁଟ୍ ଅଫ୍ ମିନେରାଲ୍ସ ଆଣ୍ଡ୍ ମ୍ୟାଟେରିଆଲ୍ସ ଟେକ୍ନୋଲୋଜି (CSIR-IMMT) ସହ KIST ଏକ ବୁଝାମଣା ପତ୍ର ସ୍ୱାକ୍ଷର କରିଛି।

CSIR-IMMTର ୮୫ତମ ପ୍ରତିଷ୍ଠା ଦିବସ ସମାରୋହ ଅବସରରେ ଏହି MoU ସ୍ୱାକ୍ଷରିତ ହୋଇଛି। ଶିକ୍ଷା, ପ୍ରଯୁକ୍ତିବିଦ୍ୟା ଓ ଉନ୍ନତ ଗବେଷଣା କ୍ଷେତ୍ରରେ ଉଭୟ ଅନୁଷ୍ଠାନ ମଧ୍ୟରେ ସହଯୋଗକୁ ବଢ଼ାଇବା ଏହି ବୁଝାମଣାର ମୁଖ୍ୟ ଲକ୍ଷ୍ୟ।

ଛାତ୍ରଛାତ୍ରୀଙ୍କୁ ମିଳିବ ଉନ୍ନତ ପ୍ରଶିକ୍ଷଣ: ଏହି ବୁଝାମଣା ଅନୁଯାୟୀ KIST ଓ CSIR-IMMT ମିଳିତ ଭାବେ ଅଧ୍ୟାପକ ବିକାଶ କାର୍ଯ୍ୟକ୍ରମ, ଛାତ୍ର ବିକାଶ କାର୍ଯ୍ୟକ୍ରମ, ଜାତୀୟ ଓ ଅନ୍ତର୍ଜାତୀୟ ସେମିନାର, ବୈଷୟିକ କର୍ମଶାଳା ଏବଂ ଗବେଷଣା ଓ ଉନ୍ନୟନ କାର୍ଯ୍ୟକ୍ରମ ଆୟୋଜନ କରିବେ।

ଏହାଦ୍ୱାରା KISTର ଛାତ୍ରଛାତ୍ରୀ ଓ ଅଧ୍ୟାପକମାନେ CSIR-IMMTର ବୈଜ୍ଞାନିକମାନଙ୍କ ଗବେଷଣା ଅଭିଜ୍ଞତାରୁ ସିଧାସଳଖ ଲାଭ ପାଇପାରିବେ। ଏଥିସହ ଉନ୍ନତ ବୈଷୟିକ ପ୍ରଶିକ୍ଷଣ ଓ ପ୍ରାୟୋଗିକ ଜ୍ଞାନ ହାସଲ କରିବାର ସୁଯୋଗ ମଧ୍ୟ ମିଳିବ।

ସ୍ୱାକ୍ଷର ସମାରୋହରେ କିଏ ଥିଲେ: ବୁଝାମଣା ପତ୍ର ସ୍ୱାକ୍ଷର ସମାରୋହରେ KIST ପକ୍ଷରୁ ଡିନ୍ ଡ. ସୂର୍ଯ୍ୟ ନାରାୟଣ ପଟ୍ଟନାୟକ ଏବଂ ମେକାନିକାଲ୍ ଇଞ୍ଜିନିୟରିଂ ବିଭାଗ ମୁଖ୍ୟ ଡ. ଚନ୍ଦ୍ରକାନ୍ତ ମିଶ୍ର ପ୍ରତିନିଧିତ୍ୱ କରିଥିଲେ।

ଉଭୟ ଅନୁଷ୍ଠାନର ଏହି ସହଯୋଗ ଦ୍ୱାରା ଶିକ୍ଷା ଓ ଶିଳ୍ପଭିତ୍ତିକ ଗବେଷଣା ମଧ୍ୟରେ ଥିବା ଦୂରତା କମିବା ସହ ନୂଆ ପ୍ରଯୁକ୍ତିର ବିକାଶ, ଉଦ୍ଭାବନ ଓ ଶିକ୍ଷାଗତ ଉତ୍କର୍ଷକୁ ନୂଆ ଦିଗ ମିଳିବ ବୋଲି ଆଶା ପ୍ରକାଶ କରାଯାଇଛି।

‘ଛାତ୍ରଛାତ୍ରୀ ଓ ଅଧ୍ୟାପକଙ୍କୁ ମିଳିବ ଅତ୍ୟାଧୁନିକ ଜ୍ଞାନ’: KISTର ପ୍ରତିଷ୍ଠାତା ଅଧ୍ୟକ୍ଷ ଡ. ତିରୁପତି ପାଣିଗ୍ରାହୀ କହିଛନ୍ତି ଯେ, ଏହି ଚୁକ୍ତି ଛାତ୍ରଛାତ୍ରୀ ଓ ଅଧ୍ୟାପକଙ୍କୁ ବୈଷୟିକ ଏବଂ ଅତ୍ୟାଧୁନିକ ଜ୍ଞାନକୌଶଳ ହାସଲ କରିବାରେ ସହାୟକ ହେବ।

ସେହିପରି ହାଇଟେକ୍ ଗ୍ରୁପ୍‌ର ମୁଖ୍ୟ ଟ୍ରଷ୍ଟି ତଥା ସିଇଓ ସୁରେଶ ପାଣିଗ୍ରାହୀ କହିଛନ୍ତି ଯେ, ଏହି ସହଯୋଗ ଦ୍ୱାରା KISTର ଛାତ୍ରଛାତ୍ରୀ ଓ ଅଧ୍ୟାପକମାନଙ୍କ ଜ୍ଞାନର ପରିସୀମା ଆହୁରି ବୃଦ୍ଧି ପାଇବ।

KISTର ନିର୍ଦ୍ଦେଶକ ଅନୀଲ ପାଣିଗ୍ରାହୀ ମଧ୍ୟ ଏହି ଚୁକ୍ତିକୁ ସ୍ୱାଗତ କରିଛନ୍ତି। ଏହି ସହଯୋଗ KISTକୁ ଶିକ୍ଷା ଓ ଗବେଷଣା କ୍ଷେତ୍ରରେ ଆହୁରି ଆଗକୁ ନେବାରେ ସହାୟକ ହେବ ବୋଲି ସେ ଆଶା ପ୍ରକାଶ କରିଛନ୍ତି।

KIST ଓ CSIR-IMMT ମଧ୍ୟରେ ଏହି ବୁଝାମଣା ଛାତ୍ରଛାତ୍ରୀ, ଅଧ୍ୟାପକ ଏବଂ ଗବେଷଣା କ୍ଷେତ୍ର ପାଇଁ ନୂଆ ସୁଯୋଗ ସୃଷ୍ଟି କରିବା ସହ ଶିକ୍ଷା ଓ ଗବେଷଣାର ମଧ୍ୟରେ ସହଯୋଗକୁ ଆହୁରି ମଜବୁତ କରିବ।