ଲଘୁଚାପ ନେଉଛି ଭୟଙ୍କର ରୂପ, ଆକାଶ ଢାଳୁଛି ବର୍ଷା, ୩ ଜିଲ୍ଲାକୁ ୟେଲୋ ଆଲର୍ଟ!

ଭୁବନେଶ୍ୱର: ସମଗ୍ର ରାଜ୍ୟରେ ବର୍ଷାର ଏକ ଭୟଙ୍କର ରୂପ ଦେଖିବାକୁ ମିଳୁଛି। ବଙ୍ଗୋପସାଗରରେ ସୃଷ୍ଟି ହୋଇଥିବା ସକ୍ରିୟ ଲଘୁଚାପ କ୍ଷେତ୍ର ଯୋଗୁଁ ଆକାଶ ଅଶାନ୍ତ ହୋଇପଡ଼ିଛି, ଆକାଶରୁ ନିରନ୍ତର ଢାଳୁଛି ବର୍ଷା। ମୟୂରଭଞ୍ଜରୁ ସୁନ୍ଦରଗଡ଼ ପର୍ଯ୍ୟନ୍ତ, ଚାରିଆଡ଼େ କେବଳ ଘଡ଼ଘଡ଼ି ଏବଂ ବର୍ଷା ହେଉଛି।

ମଙ୍ଗଳବାର ସକାଳେ ପର୍ଯ୍ୟନ୍ତ ଗାଙ୍ଗେୟ ପଶ୍ଚିମବଙ୍ଗ, ଉତ୍ତର ଉପକୂଳ ଓଡ଼ିଶା, ଝାଡ଼ଖଣ୍ଡ ଏବଂ ଉତ୍ତର-ପଶ୍ଚିମ ବଙ୍ଗୋପସାଗରର ସଂଲଗ୍ନ ଅଞ୍ଚଳ ଉପରେ ଶକ୍ତିଶାଳୀ ହୋଇଥିବା ଏହି ଲଘୁଚାପ କ୍ଷେତ୍ର ଆଜି ତଥା ବୁଧବାର ଅଧିକ ଭୟଙ୍କର ରୂପ ନେଉଛି।

ପାଣିପାଗ ବିଭାଗର ଆକଳନ ଅନୁଯାୟୀ, ଏହି ପ୍ରଣାଳୀ ଉତ୍ତର ଓଡ଼ିଶା ଏବଂ ଝାଡ଼ଖଣ୍ଡର ପଶ୍ଚିମ-ଉତ୍ତରପଶ୍ଚିମ ଆଡକୁ ଗତି କରୁଛି। ଏହାର ସିଧାସଳଖ ପ୍ରଭାବରେ, ରାଜ୍ୟର ଅଧିକାଂଶ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି, ଅନେକ ସ୍ଥାନରେ ବର୍ଷା ହେବା ଜାରି ମଧ୍ୟ ରହିଛି, ଯାହା ସାଧାରଣ ଜୀବନକୁ ସମ୍ପୂର୍ଣ୍ଣ ଭାବରେ ବିପର୍ଯ୍ୟସ୍ତ କରୁଛି।

କେଉଁ ଜିଲ୍ଲା ଗୁଡିକୁ ମିଳିଛି ସତର୍କତା: ପ୍ରବଳରୁ ଅତି ପ୍ରବଳ ବର୍ଷାର ଆଶଙ୍କାକୁ ଦୃଷ୍ଟିରେ ରଖି, ଆଞ୍ଚଳିକ ପାଣିପାଗ କେନ୍ଦ୍ର ଏକ ବ୍ୟାପକ ସତର୍କତା ଜାରି କରିଛି। ଯାହା ଅନୁଯାୟୀ, ସୁନ୍ଦରଗଡ଼, ଝାରସୁଗୁଡ଼ା ଏବଂ ବରଗଡ଼ ପାଇଁ ଏକ ହଳଦିଆ ସତର୍କ ସୂଚନା ଜାରି କରାଯାଇଛି, ଯାହା ପ୍ରବଳ ବର୍ଷାକୁ ସୂଚିତ କରୁଛି।

ଏହା ସହ ପାଣିପାଗ କେନ୍ଦ୍ର, ୧୩ ଜିଲ୍ଲାକୁ ପ୍ରବଳ ବର୍ଷା ସହ ବଜ୍ରପାତର ସତର୍କତା ଜାରିକରିଛି। ଯେମିତିକି, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂପୁର, କଟକ, କେଉଁଝର, ମୟୂରଭଞ୍ଜ, ଗଜପତି, ଗଞ୍ଜାମ, ପୁରୀ, ଖୋର୍ଦ୍ଧା ଏବଂ ନୟାଗଡ।

ରାଜ୍ୟରେ ୫ ତାରିଖ ପର୍ଯ୍ୟନ୍ତ ପ୍ରବଳ ବର୍ଷା ଜାରି ରହିବ ବୋଲି ଆଶା କରାଯାଉଛି। ବର୍ଷା ଏବଂ ବଜ୍ରପାତର ସମ୍ଭାବନା ଥିବାରୁ ସାଧାରଣ ଲୋକଙ୍କୁ ସୁରକ୍ଷିତ ସ୍ଥାନରେ ରହିବାକୁ ପରାମର୍ଶ ଦିଆଯାଇଛି। ତେବେ ଗୋଟେ ପଟେ ବର୍ଷା ଥମିବାର ନାଁ ନେଉନାହିଁ ତ ଅନ୍ୟ ପଟେ ଉତ୍ତର ଓଡ଼ିଶାରେ ହୋଇଥିବା ବନ୍ୟାର ସ୍ଥିତି ନିରନ୍ତର ବର୍ଷା ଯୋଗୁ ଅଧିକ ସଂଗୀନ ହେଉଛି।