ପ୍ରେମ ନେଲା ଉଗ୍ରଋପ; ପରିବାରର ୮ ଜଣଙ୍କୁ ଛୁରି ଭୁସିଲା ସଫ୍ଟୱେୟାର ଇଞ୍ଜିନିୟର

ବିହାର : ବିହାରର ସିୱାନରୁ ଏକ ଚାଞ୍ଚଲ୍ୟକର ଖବର ସାମନାକୁ ଆସିଛି । କାରଣ ଯେଉଁ ଘରେ ଶେହନାଇ ବାଜିଥାନ୍ତି ଆଜି ସେଠାରେ ଶୋକର ଛାୟା ଖେଳିଯାଇଛି । ବାଙ୍ଗାଲୋରରେ କାମ କରୁଥିବା ଜଣେ ହାଇପ୍ରୋଫାଇଲ ସଫ୍ଟୱେୟାର ଇଞ୍ଜିନିୟର ନିଜ ବାହା ଘରର ଠିକ ପୂର୍ବରୁ ପରିବାରର ୮ ଜଣ ସଦସ୍ୟଙ୍କୁ ଛୁରୀରେ ଆକ୍ରମଣ କରିଛନ୍ତି ।

ମିଳିଥିବା ସୂଚନା ମୁତାବକ ଅଭିଯୁକ୍ତ ଦୀପକ କୁମାର ବାଙ୍ଗାଲୋରର ଏକ ପ୍ରତିଷ୍ଠିତ କମ୍ପାନୀରେ ସଫ୍ଟୱେୟାର ଇଞ୍ଜିନିୟର ଭାବେ ବାର୍ଷିକ ୪୦ ଲକ୍ଷ ଟଙ୍କାର ପ୍ୟାକେଜରେ କାମ କରୁଥିଲେ । ଦୀପକ ନିଜର ଜଣେ ସହକର୍ମୀଙ୍କୁ ବିବାହ କରିବାକୁ ଚାହୁଁଥିଲେ କିନ୍ତୁ ପରିବାର ଲୋକେ ତାଙ୍କ ଇଚ୍ଛା ବିରୋଧରେ ଅନ୍ୟତ୍ର କେଉଁଠାରେ ବିବାହ ସ୍ଥିର କରିଦେଇଥିଲେ । ସେ ୧୭ ଏପ୍ରିଲରେ ବିବାହ ପାଇଁ ନିଜ ଗାଁ କୁ ଆସିଥିଲେ । ଗତ ସୋମବାର ଦୀପକଙ୍କ ବିବାହ ହୋଇଥାନ୍ତା କିନ୍ତୁ ଏହାର ଦୁଇ ଦିନ ପୂର୍ବରୁ ଗହଣା କିଣାକିଣିକୁ ନେଇ ଘରେ ବିବାହ ଆରମ୍ଭ ହୋଇଯାଇଥିଲା ।

ଝଗଡା ଏତେ ବଢିଯାଇଥିଲା ଯେ, ଦୀପକ ହଠାତ ନିଜ ନିୟନ୍ତ୍ରଣ ହରାଇ ବସିଥିଲେ ଏବଂ ସେଠାରେ ଥିବା ଛୁରିରେ ନିଜ ଆତ୍ମିୟ ଏବଂ ପରିବାର ସଦସ୍ୟଙ୍କ ଉପରେ ମରଣାତ୍ମକ ଆକ୍ରମଣ କରିଥିଲେ । ଏହି ଘଟଣାରେ ଦୀପକଙ୍କ ପିଇସିଙ୍କର ଘଟଣାସ୍ଥଳେ ମୃତ୍ୟୁ ହୋଇଥିବାବେଳେ ଅନ୍ୟମାନେ ଗମ୍ଭୀର ଭାବେ ଗୁରୁତର ଅଛନ୍ତି । ଘଟଣା ଘଟାଇ ସାରିବା ପରେ ଅଭିଯୁକ୍ତ ନିଜକୁ ନିଜେ ଛୁରୀରେ ଆଘାତ କରି ଆତ୍ମହତ୍ୟା କରିବାକୁ ଚେଷ୍ଟା କରିଥିଲା ।

ଯେତେବେଳେ ଗ୍ରାମବାସୀ ତାକୁ କାବୁ କରିବାକୁ ଚେଷ୍ଟା ସେତେବେଳେ ସେ ଫେରାର ହେବାକୁ ଚେଷ୍ଟା କରୁଥିବାବେଳେ ପୋଲିସ ନାକାବନ୍ଦୀ କରି ତାକୁ କାବୁ କରିଥିଲା । ବର୍ତ୍ତମାନ ପୋଲିସ ତଦନ୍ତ ଆରମ୍ଭ କରିଛି । ସୁରକ୍ଷା ଦୃଷ୍ଟିରୁ ପୋଲିସ ଘରକୁ ସିଲ କରିଛନ୍ତି ।