ଡାହାଣୀ ମାଆ, ଅବୈଧ ପ୍ରେମ ସମ୍ପର୍କରେ ବାଧକ ସାଜିଲେ କୁନି ପୁଅ-ଝିଅ, ମୂଷା ବିଷ ଦେଇ ମାରିଦେଲା ଜନ୍ମକଲା ମା’

ଓଡିଶାଭାସ୍କର: ଗୋଟିଏ ସପ୍ତାହ ମଧ୍ୟରେ ଦୁଇ ଭାଇ ଭଉଣୀଙ୍କ ସନ୍ଦେହଜନକ ମୃତ୍ୟୁ। କାରଣ ଏବଂ ହତ୍ୟାକାରୀ ବିଷୟରେ ଜାଣିଲେ ଆପଣଙ୍କ ପାଦ ତଳୁ ମାଟି ଖସିଯିବ। କାହିଁକି ନା ହତ୍ୟାକାରୀ ଆଉ କେହି ନୁହେଁ ବରଂ ନିଜ ଜନ୍ମକଲା ମା’।

ହଁ ଆଜ୍ଞା ଏପରି ଏକ ହୃଦୟବିଦାରକ ଘଟଣା ଘଟିଛି ପଞ୍ଜାବର ବଥିଣ୍ଡାରେ। ପୋଲିସ ପିଲାମାନଙ୍କ ମାଆଙ୍କ ବିରୋଧରେ ମାମଲା ରୁଜୁ କରିଛି। ଅଭିଯୋଗ ହୋଇଛି ଯେ ସେ ପିଲାମାନଙ୍କୁ ମୂଷା ବିଷ ଦେଇ ହତ୍ୟା କରିଥିଲେ କାରଣ ପିଲାମାନେ ତାଙ୍କ ପ୍ରେମ ସମ୍ପର୍କରେ ବାଧା ସୃଷ୍ଟି କରୁଥିଲେ।

ରିପୋର୍ଟ ଅନୁଯାୟୀ, ପ୍ରାୟ ୧୫ ଦିନ ପୂର୍ବେ ଜଣେ ୧୨ ବର୍ଷୀୟ ଝିଅର ସନ୍ଦେହଜନକ ପରିସ୍ଥିତିରେ ମୃତ୍ୟୁ ହୋଇଥିଲା ଏବଂ ତାଙ୍କ ପରିବାର ତାଙ୍କର ଶେଷକୃତ୍ୟ କରିଥିଲେ।

ଆଉ ପରେ ଶୁକ୍ରବାର ରାତିରେ ତାଙ୍କ ସାତ ବର୍ଷୀୟ ସାନ ଭାଇ ଫତେହବୀରର ମଧ୍ୟ ମୃତ୍ୟୁ ହୋଇଥିଲା। ଏହା ପରେ ଗାଁ ଲୋକେ ମୃତ ପିଲାମାନଙ୍କ ମାଆଙ୍କୁ ସନ୍ଦେହ କରିଥିଲେ।

ମାଆ ଉପରେ ଆସିଲା ସନ୍ଦେହ:

ଶନିବାର ସକାଳେ ଗାଁ ମୁଖିଆ ଏବଂ ଅନ୍ୟ ଗ୍ରାମବାସୀ ଫୁଲ ପୋଲିସ ଷ୍ଟେସନକୁ ଯାଇଥିଲେ। ସେମାନେ ଭାଇଭଉଣୀଙ୍କ ମୃତ୍ୟୁରେ ତାଙ୍କ ମାଆଙ୍କୁ ସନ୍ଦେହ କରୁଥିବା କହି ପୋଲିସ ଉଭୟ ଘଟଣାର ନିରପେକ୍ଷ ତଦନ୍ତ କରିବାକୁ ଦାବି କରିଥିଲେ।

ଗାଁର ଜଣେ ଲୋକ ଭରପୁର ସିଂହ କହିଛନ୍ତି ଯେ ସେ ଏବଂ ଅନ୍ୟ ଗ୍ରାମବାସୀ ପୋଲିସ ସହିତ ଯୋଗାଯୋଗ କରିଥିଲେ ଏବଂ ବୁଝାଇଥିଲେ ଯେ ପୁରା ଗାଁ ପିଲାମାନଙ୍କ ମୃତ୍ୟୁକୁ ନେଇ ସନ୍ଦେହ କରୁଛି।

ରାମପୁରା ଫୁଲ ଡିଏସ୍ପି ମନୋଜ କୁମାର କହିଛନ୍ତି ଯେ ପୋଲିସ ଏବେ ମୃତ ପିଲାମାନଙ୍କର ପୋଷ୍ଟମର୍ଟମ୍ ପରୀକ୍ଷା କରିବ। ପୋଷ୍ଟମର୍ଟମ୍ ରିପୋର୍ଟ ଆସିବା ପରେ ହିଁ ମୃତ୍ୟୁର ପ୍ରକୃତ କାରଣ ଜଣାପଡିବ। ପୋଲିସ ମାମଲାର ତଦନ୍ତ କରୁଛି।

ମୂଷା ବିଷ ଦେଇ ହତ୍ୟା:

ବଠିଣ୍ଡା ପୋଲିସ ଅଧୀକ୍ଷକ (ଡି) ଜସମିତ ସିଂହ କହିଛନ୍ତି ଯେ ଗତକାଲି, ଏକ ୮ ବର୍ଷର ବାଳକର ମୃତ୍ୟୁ ହୋଇଥିଲା। ଗାଁ ଲୋକେ ଏବଂ ପରିବାର ସନ୍ଦେହ କରୁଛନ୍ତି ଯେ ପିଲାଟିର ମାଆ ତାଙ୍କ ମୃତ୍ୟୁ ପାଇଁ ଦାୟୀ।

ତଦନ୍ତରୁ ଜଣାପଡିଛି ଯେ ମାଆ ଜସ୍ସି କୌର ମହାରାଜ ୧୫ ଦିନ ପୂର୍ବରୁ ଗାଁର ଜଣେ ବ୍ୟକ୍ତିଙ୍କ ସହିତ ସମ୍ପର୍କରେ ଥିଲେ। ପିଲାମାନେ ସେମାନଙ୍କ ସମ୍ପର୍କରେ ବାଧା ସୃଷ୍ଟି କରୁଥିଲେ।

୧୫ ଦିନ ପୂର୍ବେ ଜଣେ ୧୨ ବର୍ଷୀୟା ଝିଅକୁ ମୂଷା ବିଷ ଔଷଧ ଦେଇ ହତ୍ୟା କରାଯାଇଥିଲା ଏବଂ ଗତକାଲି ଜଣେ ୮ ବର୍ଷର ପୁଅକୁ ମଧ୍ୟ ମୂଷା ବିଷ ଔଷଧ ଦେଇ ହତ୍ୟା କରାଯାଇଛି।

ସେ କହିଛନ୍ତି ଯେ ପୋଲିସ ଦୋଷୀ ମାଆ ବିରୁଦ୍ଧରେ ମାମଲା ରୁଜୁ କରିଛି। ଘଟଣାର ତଦନ୍ତ କରାଯାଉଛି ଏବଂ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।