ଭାରତ ଆଗରେ ପାକିସ୍ତାନର ଗୁହାରି! ସିନ୍ଧୁ ଜଳ ଚୁକ୍ତି ନେଇ ପୁଣି ଆଲୋଚନା ପାଇଁ ଅନୁରୋଧ

ନୂଆଦିଲ୍ଲୀ: ଭାରତର କଡ଼ା ଆଭିମୁଖ୍ୟ ମଧ୍ୟରେ ଏବେ ପୁଣି ଆଲୋଚନା ପାଇଁ ଅନୁରୋଧ କରିଛି ପାକିସ୍ତାନ। ସିନ୍ଧୁ ଜଳ ଚୁକ୍ତିକୁ ନେଇ ଦୁଇ ଦେଶ ମଧ୍ୟରେ ବଢ଼ୁଥିବା ବିବାଦ ମଧ୍ୟରେ ପାକିସ୍ତାନ ଭାରତକୁ ଏହି ଅନୁରୋଧ କରିଛି। ୧୯୬୦ର ସିନ୍ଧୁ ଜଳ ଚୁକ୍ତି ଅନୁସାରେ ଜଳ ବଣ୍ଟନ ପ୍ରସଙ୍ଗରେ ରଚନାତ୍ମକ ଓ ସକାରାତ୍ମକ ଆଲୋଚନା କରିବାକୁ ପାକିସ୍ତାନ କହିଛି।

ପାକିସ୍ତାନ କହିଛି ଯେ, ଦୁଇ ଦେଶ ଗୁରୁତ୍ୱର ସହ ଗ୍ରହଣ କରିଥିବା ଏହି ଅନ୍ତର୍ଜାତୀୟ ଚୁକ୍ତିର ଦାୟରା ଭିତରେ ରହି ଭାରତ ଆଲୋଚନା କରିବା ଉଚିତ।

ପାକିସ୍ତାନର ପୁଣି ଗୁହାରି: ସମ୍ବାଦ ସରବରାହ ସଂସ୍ଥା PTI ଅନୁସାରେ, ପାକିସ୍ତାନ ବିଦେଶ ମନ୍ତ୍ରଣାଳୟର ପ୍ରବକ୍ତା ତାହିର ଅନ୍ଦ୍ରାବି କହିଛନ୍ତି ଯେ, Permanent Court of Arbitration (PCA) ନିଜ ରାୟରେ ସିନ୍ଧୁ ଜଳ ଚୁକ୍ତି ଏବେ ମଧ୍ୟ ସମ୍ପୂର୍ଣ୍ଣ ଭାବେ ଲାଗୁ ଓ ବାଧ୍ୟତାମୂଳକ ଥିବା କଥା ଦୋହରାଇଛି।

ତାଙ୍କ କହିବା ଅନୁସାରେ, ଏହି ରାୟକୁ ଲାଗୁ କରାଇବା ଏବଂ ଚୁକ୍ତିକୁ ସମ୍ମାନ ଦେବା ପାଇଁ ପାକିସ୍ତାନ ସମସ୍ତ ପ୍ରକାରର ଆଇନଗତ ଓ କୂଟନୈତିକ ପଦକ୍ଷେପ ନେବ।

କାହିଁକି ପୁଣି ଉଠିଲା ସିନ୍ଧୁ ଜଳ ଚୁକ୍ତି ପ୍ରସଙ୍ଗ: ଗତବର୍ଷ ଏପ୍ରିଲରେ ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ପାକିସ୍ତାନ ବିରୋଧରେ ଅନେକ କୂଟନୈତିକ ଓ ଆର୍ଥିକ ପଦକ୍ଷେପ ନେଇଥିଲା। ଏହି ପଦକ୍ଷେପର ଏକ ଅଂଶ ଭାବେ ଭାରତ ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲା।

ଏହାକୁ ଚ୍ୟାଲେଞ୍ଜ କରି ପାକିସ୍ତାନ ଚଳିତ ବର୍ଷ ମାର୍ଚ୍ଚରେ ହେଗ୍‌ସ୍ଥିତ Permanent Court of Arbitrationର ଦ୍ୱାରସ୍ଥ ହୋଇଥିଲା। ପାକିସ୍ତାନର ଯୁକ୍ତି ଥିଲା ଯେ, ସିନ୍ଧୁ ଜଳ ଚୁକ୍ତିକୁ ଏକତରଫା ଭାବେ ସ୍ଥଗିତ କରାଯାଇପାରିବ ନାହିଁ।

ନ୍ୟାୟାଳୟର ରାୟ ଉପରେ ଦୁଇ ଦେଶର ଭିନ୍ନ ମତ: ପାକିସ୍ତାନର ବିଦେଶ ମନ୍ତ୍ରଣାଳୟ କହିଛି ଯେ, PCAର ରାୟ ଅନୁସାରେ ସିନ୍ଧୁ ଜଳ ଚୁକ୍ତି ଏବେ ମଧ୍ୟ ପ୍ରଭାବୀ ଏବଂ ଦୁଇ ଦେଶ ପାଇଁ ଲାଗୁ ହେଉଛି। ତେଣୁ ଏହି ରାୟକୁ ଲାଗୁ କରାଇବା ପାଇଁ ପାକିସ୍ତାନ ଉପଲବ୍ଧ ସମସ୍ତ ଆଇନଗତ ଓ କୂଟନୈତିକ ବିକଳ୍ପର ବ୍ୟବହାର କରିବ ବୋଲି କହିଛି।

ଅନ୍ୟପଟେ ଭାରତ ନିଜ ଆଭିମୁଖ୍ୟରେ ଅଟଳ ରହିଛି। ଭାରତ ସ୍ପଷ୍ଟ କରିଛି ଯେ, ଏହି ମାମଲାରେ ଉକ୍ତ ନ୍ୟାୟାଧିକରଣର ଅଧିକାର କ୍ଷେତ୍ରକୁ ଭାରତ ଗ୍ରହଣ କରୁନାହିଁ ଏବଂ ଏହାର ରାୟ ଭାରତ ପାଇଁ ବାଧ୍ୟତାମୂଳକ ନୁହେଁ।

ଭାରତର ମତ ହେଉଛି, ଜାତୀୟ ସୁରକ୍ଷା ଓ ସୀମାପାର ଆତଙ୍କବାଦ ସହ ଜଡ଼ିତ ପ୍ରସଙ୍ଗରେ ଭାରତର ନିଷ୍ପତ୍ତିକୁ କୌଣସି ବାହ୍ୟ ମଞ୍ଚ ନିର୍ଦ୍ଦେଶ ଦେଇପାରିବ ନାହିଁ।

ଏପରି ସ୍ଥିତିରେ ସିନ୍ଧୁ ଜଳ ଚୁକ୍ତିକୁ ନେଇ ଭାରତ ଓ ପାକିସ୍ତାନ ମଧ୍ୟରେ କୂଟନୈତିକ ଓ ଆଇନଗତ ବିବାଦ ଆଗକୁ ମଧ୍ୟ ଜାରି ରହିବାର ସମ୍ଭାବନା ରହିଛି।