ଦୁଇ ଦିନିଆ ନ୍ୟୁଜିଲାଣ୍ଡ ଗସ୍ତରେ ପ୍ରଧାନମନ୍ତ୍ରୀ ମୋଦୀ !

ନ୍ୟୁଜିଲାଣ୍ଡ  : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନ୍ୟୁଜିଲାଣ୍ଡ ଗସ୍ତକୁ ନେଇ ଅକ୍ଲାଣ୍ଡ ସହରରେ ଏବେ ବେଶ୍ ଉତ୍ସାହ ଦେଖିବାକୁ ମିଳୁଛି। ଦୀର୍ଘ ପ୍ରାୟ ୪୦ ବର୍ଷ ପରେ ଜଣେ ଭାରତୀୟ ପ୍ରଧାନମନ୍ତ୍ରୀ ନ୍ୟୁଜିଲାଣ୍ଡ ଗସ୍ତ କରୁଥିବାରୁ ଭାରତୀୟ ସମ୍ପ୍ରଦାୟ ଏବଂ ନ୍ୟୁଜିଲାଣ୍ଡବାସୀ ଏହି ଐତିହାସିକ ମୁହୂର୍ତ୍ତକୁ ଅପେକ୍ଷା କରି ରହିଛନ୍ତି।

ଆକାଶବାଣୀର ସମ୍ବାଦଦାତାଙ୍କ ରିପୋର୍ଟ ଅନୁଯାୟୀ, ପ୍ରଧାନମନ୍ତ୍ରୀ ମୋଦୀଙ୍କୁ ସ୍ୱାଗତ କରିବା ପାଇଁ ଅକ୍ଲାଣ୍ଡରେ ପ୍ରସ୍ତୁତି ଜୋରସୋରରେ ଚାଲିଛି। ଭାରତୀୟ ବଂଶୋଦ୍ଭବଙ୍କ ସହିତ ଅନେକ ନ୍ୟୁଜିଲାଣ୍ଡବାସୀ ମଧ୍ୟ ତାଙ୍କୁ ପାରମ୍ପରିକ ମାଓରୀ ସ୍ୱାଗତ ସମ୍ଭାଷଣ “କିଆ ଓରା ମୋଦୀ” (Kia Ora Modi) କହି ସ୍ୱାଗତ କରିବା ପାଇଁ ବ୍ୟଗ୍ର ହୋଇପଡ଼ିଛନ୍ତି।

ମହିଳା, ଯୁବପିଢ଼ି, ବ୍ୟବସାୟୀ, ଶିକ୍ଷାବିତ୍ ଏବଂ ସାଧାରଣ ଲୋକେ ଏହି ଗସ୍ତକୁ ଭାରତ-ନ୍ୟୁଜିଲାଣ୍ଡ ସମ୍ପର୍କରେ ଏକ ନୂତନ ଅଧ୍ୟାୟର ଆରମ୍ଭ ବୋଲି ମନେ କରୁଛନ୍ତି। ସେମାନଙ୍କ ମତରେ ଏହି ଗସ୍ତ ଦ୍ୱାରା ବାଣିଜ୍ୟ, ଶିକ୍ଷା, ନିବେଶ, କ୍ରୀଡ଼ା ଏବଂ ସାଂସ୍କୃତିକ ଆଦାନପ୍ରଦାନ କ୍ଷେତ୍ରରେ ସହଯୋଗ ଆହୁରି ମଜବୁତ ହେବ।

ନ୍ୟୁଜିଲାଣ୍ଡରେ ରହୁଥିବା ଭାରତୀୟମାନେ କହିଛନ୍ତି ଯେ, ପ୍ରାୟ ୪୦ ବର୍ଷ ପରେ ଜଣେ ଭାରତୀୟ ପ୍ରଧାନମନ୍ତ୍ରୀଙ୍କ ଗସ୍ତ ସେମାନଙ୍କ ପାଇଁ ଗର୍ବ ଏବଂ ଭାବପ୍ରବଣତାର ମୁହୂର୍ତ୍ତ। ନ୍ୟୁଜିଲାଣ୍ଡବାସୀ ମଧ୍ୟ ଏହି ଗସ୍ତକୁ ଦୁଇ ଦେଶ ମଧ୍ୟରେ ବନ୍ଧୁତା ଓ ଭାଗିଦାରୀକୁ ସୁଦୃଢ଼ କରିବାର ଏକ ସୁଯୋଗ ବୋଲି ଭାବୁଛନ୍ତି। ଭାରତୀୟ ସମ୍ପ୍ରଦାୟ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଏକ ଜୀବନ୍ତ ସେତୁ ଭାବେ କାର୍ଯ୍ୟ କରୁଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତ ଦୁଇ ଦେଶର ଦ୍ୱିପାକ୍ଷିକ ସମ୍ପର୍କକୁ ନୂତନ ଗତି ଦେବା ସହିତ ଦୁଇ ଦେଶର ଲୋକଙ୍କ ମଧ୍ୟରେ ସମ୍ପର୍କକୁ ଅଧିକ ଦୃଢ଼ କରିବ ବୋଲି ଆଶା କରାଯାଉଛି।