ପ୍ରଳୟଙ୍କାରୀ ବନ୍ୟାରେ ଭାସି ପାକିସ୍ତାନରେ ପହଞ୍ଚିଗଲେ ପଞ୍ଜାବର ୩ ଯୁବକ, ଜାଣନ୍ତୁ କେମିତି ଫେରିଲେ ସ୍ଵଦେଶ

Young Men Swept Away: ୨୦୨୩ ମସିହାରେ ପ୍ରବଳ ବର୍ଷା ଏବଂ ବନ୍ୟା ପଞ୍ଜାବର ଅନେକ ଅଞ୍ଚଳରେ ବିପର୍ଯ୍ୟୟ ସୃଷ୍ଟି କରିଥିଲା। ସତଲେଜ୍ ନଦୀରେ ବନ୍ୟା ଆସି ଚାଷୀଙ୍କ ଫସଲ ନଷ୍ଟ କରିବା ସହ ଅନେକଙ୍କୁ ଦୁଃଖ ଦେଇଯାଇଥିଲା । ଫିରୋଜପୁର ଜିଲ୍ଲାର କିଲଚେ ଗାଁରେ ମଧ୍ୟ ସମାନ ପରିସ୍ଥିତି ଥିଲା। ସେହି ପ୍ରଳୟଙ୍କାରୀ ବନ୍ୟା ତିନି ଭାଇ, ଯୋଗିନ୍ଦର ସିଂହ, ଗୁରମେଜ ସିଂହ ଏବଂ ଛିନ୍ଦର ସିଂହଙ୍କ ଜୀବନକୁ ସମ୍ପୂର୍ଣ୍ଣ ପରିବର୍ତ୍ତନ କରିଦେଇଥିଲା।

ସେମାନେ ବନ୍ୟା ପାଣିରୁ ରକ୍ଷା କରିବା ପାଇଁ ସେମାନଙ୍କ ଟ୍ରାକ୍ଟରକୁ ଉଚ୍ଚ ଭୂମିକୁ ସ୍ଥାନାନ୍ତର କରିବାକୁ ଚେଷ୍ଟା କରୁଥିଲେ, ସେତେବେଳେ ସତଲେଜ୍ ନଦୀର ପ୍ରବଳ ସ୍ରୋତ ହଠାତ୍ ସେମାନଙ୍କୁ ଭସାଇ ନେଇଗଲା । ଆଉ ଦେଖୁ ଦେଖୁ ସୀମା ପାର୍ କରିଦେଲା ସତଲେଜ୍ ନଦୀ । କିଛି ଦିନ ପର୍ଯନ୍ତ ସେମାନଙ୍କ ପରିବାର ଲୋକେ ଜାଣି ନଥିଲେ ଯେ ସେମାନେ କେଉଁଠି ଅଛନ୍ତି। ପରେ ସେମାନେ ପାକିସ୍ତାନରୁ ଖବର ପାଇଲେ ଯେ ତିନି ଭାଇ ସେଠାରେ ପହଞ୍ଚିଯାଇଛନ୍ତି।

ବନ୍ୟାରେ ଭାସି ପାକିସ୍ତାନରେ ପହଞ୍ଚିଥିଲେ

ଯୋଗିନ୍ଦର ସିଂହଙ୍କ କହିବା ଅନୁସାରେ, ତାଙ୍କ ଫାର୍ମ ସୀମା ନିକଟରେ ଥିଲା। ତାଙ୍କ ଟ୍ରାକ୍ଟର ପାଣିରେ ଫସି ଯାଇଥିଲା। ଯେତେବେଳେ ସେ ଏହାକୁ ଆଣିବାକୁ ଗଲେ, ନଦୀର ପ୍ରବଳ ସ୍ରୋତରେ ସେ ଭାସିଗଲେ ଏବଂ ପାକିସ୍ତାନରେ ପହଞ୍ଚିଗଲେ। ସେଠାରେ କିଛି ଲୋକ ଆମକୁ ଧରିନେଇ ବସିବାକୁ କହିଲେ ଏବଂ ପୋଲିସକୁ ଡାକିଲେ । ପୁଲିସ ପହଞ୍ଚି ଆମ ଆଖିରେ କଳା ପଟି ବାନ୍ଧି ନେଇଗଲା। ପ୍ରଥମ ଚାରି ପାଞ୍ଚ ଦିନ ଆମକୁ ପ୍ରବଳ ମାଡ଼ ଦିଆଗଲା ବୋଲି କହିଛନ୍ତି ଯୋଗିନ୍ଦର ।

ଯୋଗିନ୍ଦର ଆହୁରି କହିଛନ୍ତି, ସେ ପାକିସ୍ତାନ ଆସିବାକୁ ଚାହୁଁ ନଥିଲେ। ଏନେଇ ପୋଲିସ ନିଶ୍ଚିତ ହେବା ପରେ, ତାଙ୍କ ଉପରେ ଅତ୍ୟାଚାର ବନ୍ଦ କରାଯାଇଥିଲା। ତା’ପରେ ତାଙ୍କୁ ପ୍ରଥମେ କସୁର ଜେଲ୍ ଏବଂ ତା’ପରେ ଲାହୋର ଜେଲ୍ ପଠାଯାଇଥିଲା। ତାଙ୍କୁ ଏକୁଟିଆ ରଖାଯାଇଥିଲା ଏବଂ ଭାରତୀୟ କଏଦୀମାନଙ୍କ ସହିତ ସାକ୍ଷାତ କରିବାକୁ ଅନୁମତି ଦିଆ ଯାଇନଥିଲା। ଯୋଗିନ୍ଦର ଏହା ମଧ୍ୟ କହିଥିଲେ ଯେ, ପ୍ରାୟ ୧୫ ମାସ ପରେ ତାଙ୍କୁ ସପ୍ତାହରେ ଥରେ ତାଙ୍କ ପରିବାର ସହିତ କଥା ହେବାକୁ ଅନୁମତି ଦିଆ ଯାଇଥିଲା। ସେତେବେଳେ ସେ ଜାଣିବାକୁ ପାଇଲେ ଯେ ତାଙ୍କ ବାପାଙ୍କ ମୃତ୍ୟୁ ହୋଇଛି।

ପାରିବାରିକ ଯନ୍ତ୍ରଣା ଏବଂ କଷ୍ଟ

ଯୋଗିନ୍ଦରଙ୍କ ସ୍ତ୍ରୀ ସରୋଜ ରାଣୀଙ୍କ କହିବା ଅନୁସାରେ, ସେ ୨୫ ଦିନ ପରେ ଖବର ଚ୍ୟାନେଲ ଏବଂ ରିପୋର୍ଟ ମାଧ୍ୟମରେ ଜାଣିବାକୁ ପାଇଲେ ଯେ ତାଙ୍କ ସ୍ୱାମୀ ବନ୍ୟାରେ ଭାସି ଯାଇ ପାକିସ୍ତାନରେ ପହଞ୍ଚି ଯାଇଛନ୍ତି। ସେ ପୂର୍ବରୁ ଏକ ନିଖୋଜ ରିପୋର୍ଟ ଦାଖଲ କରିଥିଲେ।

ସେ ଆହୁରି କହିଥିଲେ ଯେ, ଯୋଗିନ୍ଦର ଅମଳ ମେସିନରେ ଫୋରମ୍ୟାନ୍ ଭାବରେ କାମ କରନ୍ତି, ଏବଂ ତିନି ଭାଇ ଆଠ ଏକର ଜମି ଚାଷ କରନ୍ତି। ବନ୍ୟା ଯୋଗୁଁ କ୍ଷେତର ଏକ ଅଂଶ ନଦୀରେ ଭାସି ଯାଇଥିଲା ଏବଂ ଚାରି ଏକର ଗହମ ଫସଲ ବୁଡ଼ି ଯାଇଥିଲା। ଏହି କଷ୍ଟ ମଧ୍ୟରେ, ସେମାନଙ୍କ ପରିବାର ମାନସିକ ଏବଂ ଆର୍ଥିକ ଉଭୟ କଷ୍ଟ ପାଉଥିଲେ।

ପାକିସ୍ତାନରୁ କିପରି ଫେରିଲେ 

ଗୁରମେଜ ସିଂହ କହିଛନ୍ତି ଯେ ପାକିସ୍ତାନ ପହଞ୍ଚିବା ପରେ ସ୍ଥାନୀୟ ଲୋକମାନେ ତାଙ୍କୁ ଧରି ପୋଲିସକୁ ହସ୍ତାନ୍ତର କରିଥିଲେ। ପ୍ରାରମ୍ଭରେ ଆମକୁ ମାଡ଼ ମରାଯାଇଥିଲା, କିନ୍ତୁ ପରେ ଆମକୁ ଅନ୍ୟ କଏଦୀମାନଙ୍କ ପରି ସମାନ ଖାଦ୍ୟ ଦିଆଯାଇଥିଲା । ପ୍ରଥମେ ତାଙ୍କର ଫେରିବାର କୌଣସି ଆଶା ନଥିଲା। ଯେତେବେଳେ ତାଙ୍କ ଫେରିବାର ଖବର ଆସିଲା, ସେ ଖୁସିରେ ଦୁଇ ଦିନ ଶୋଇପାରିଲେ ନାହିଁ। ଗୁରମେଜଙ୍କ ମାଆ ମନଜିତ କୌର କହିଛନ୍ତି, “ଆମେ ପ୍ରତିଦିନ ପ୍ରାର୍ଥନା କରୁଥିଲୁ। ଆମ ପୁଅ ବିନା ଆମର ଜୀବନ ଅସମ୍ପୂର୍ଣ୍ଣ ଥିଲା।”

ସରକାର ଏବଂ ଆଇନଗତ ପ୍ରକ୍ରିୟା

ଆଡଭୋକେଟ୍ ମେହେର ସିଂହ ମଲ୍ଲଙ୍କ କହିବା ଅନୁସାରେ, ଯେଉଁମାନେ ବନ୍ୟା କିମ୍ବା ଅନ୍ୟାନ୍ୟ କାରଣରୁ ଭୁଲବଶତଃ ପାକିସ୍ତାନରେ ପହଞ୍ଚିଯାଆନ୍ତି, ସେମାନଙ୍କୁ ସେଠାକାର ସୁରକ୍ଷା ଏଜେନ୍ସିଗୁଡ଼ିକ ଦ୍ୱାରା ତଦନ୍ତ କରାଯାଏ ଏବଂ ତା’ପରେ ଭାରତର ସୀମା ସୁରକ୍ଷା ବଳ (BSF) ସହିତ ଯୋଗାଯୋଗ କରାଯାଏ।

ଯେତେବେଳେ ପ୍ରମାଣିତ ହୁଏ ଯେ ବ୍ୟକ୍ତିଙ୍କ ଯାତ୍ରା ଉଦ୍ଦେଶ୍ୟମୂଳକ ନଥିଲା, ପାକିସ୍ତାନ ସେମାନଙ୍କୁ ଭାରତ ଫେରାଇ ଦିଏ। ସେମାନଙ୍କ ଫେରିବା ପାଇଁ କୌଣସି ନିର୍ଦ୍ଦିଷ୍ଟ ସମୟ ନାହିଁ; ଏହା ସମ୍ପୂର୍ଣ୍ଣ ତଦନ୍ତ ଉପରେ ନିର୍ଭର କରେ।