ପ୍ରଥମ ବୁଲେଟ୍ ଟ୍ରେନର ଟିକେଟ୍ ମୂଲ୍ୟ ଉପରୁ ଉଠିଲା ପରଦା, ଜାଣନ୍ତୁ କ’ଣ କହିଲେ ରେଳ ମନ୍ତ୍ରୀ
ସୁରଟ(ଓଡ଼ିଶା ଭାସ୍କର): ଦେଶରେ ଚାଲିବାକୁ ଥିବା ବୁଲେଟ ଟ୍ରେନ ପ୍ରୋଜେକ୍ଟ କାମ ତୀବ୍ର ଗତିରେ ଆଗେଇ ଚାଲିଛି। ଆଶା କରାଯାଉଛି ଯେ ୨୦୨୬ସୁଦ୍ଧା ଦେଶରେ ପ୍ରଥମ ବୁଲେଟ ଟ୍ରେନ ଚାଲିବ। ମୁମ୍ବାଇ ଏବଂ ଅହମ୍ମଦାବାଦ ମଧ୍ୟରେ ଚାଲିବାକୁଥିବା ଦେଶର ପ୍ରଥମ ବୁଲେଟ୍ ଟ୍ରେନ୍ କାର୍ଯ୍ୟ ଦୀର୍ଘ ଦିନ ଧରି ଚାଲି ରହିଛି। ନିକଟରେ ଏକ କାର୍ଯ୍ୟକ୍ରମ ସମୟରେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଥିଲେ ଯେ ବୁଲେଟ୍ ଟ୍ରେନ ସେବା ଦେଶରେ ୨୦୨୬ମସିହାରୁ ଆରମ୍ଭ ହେବ। ଯାତ୍ରୀଙ୍କ ସୁବିଧା ପାଇଁ ସରକାର ଦିନରାତି କାର୍ଯ୍ୟ କରୁଛନ୍ତି ବୋଲି ସେ କହିଛନ୍ତି। ସରକାର ଏହି ଦିଗରେ ଅନେକ ପଦକ୍ଷେପ ନେଇଛନ୍ତି, ଏହାର ଫଳାଫଳ ମଧ୍ୟ ଆସିବା ଆରମ୍ଭ କରିଛି।
ତେବେ ବୁଲେଟ ଟ୍ରେନ ଆସିବା ଆଗରୁ ଏଥିରେ ଯାତ୍ରା କରିବାକୁ କେତେ ଭଡା ଦେବାକୁ ପଡିବ ଏହି ବିଷୟରେ ସୂଚନା ଦେଇଛନ୍ତି ରେଳ ମନ୍ତ୍ରୀ। ସେ କହିଥିଲେ ଯେ ଏପର୍ଯ୍ୟନ୍ତ ଭଡା ନେଇ କୌଣସି ନିଷ୍ପତ୍ତି ନିଆଯାଇ ନାହିଁ। କିନ୍ତୁ ଏହା ଲୋକମାନଙ୍କ ସ୍ୱାର୍ଥରେ ରହିବ। ଏଥିପାଇଁ ପ୍ରଥମ ଏସିର ଆଧାର ତିଆରି କରାଯାଉଛି, ଯାହା ଅଧିକ ନୁହେଁ। ଏଥିରୁ ଏହା ସ୍ପଷ୍ଟ ହୋଇଛି ଯେ ବୁଲେଟ୍ ଟ୍ରେନର ଭଡା ପ୍ରଥମ ଶ୍ରେଣୀ ଏସି ସହିତ ସମାନ ହେବ।
ବିମାନ ଅପେକ୍ଷା ବୁଲେଟ୍ ଟ୍ରେନ୍ ଭଡା କମ୍ ହେବ: ରେଳ ମନ୍ତ୍ରୀ ଏହା ମଧ୍ୟ କହିଛନ୍ତି ଯେ ବୁଲେଟ୍ ଟ୍ରେନର ଭଡା ବିମାନଠାରୁ କମ୍ ହେବ ଏବଂ ଏଥିରେ ସୁବିଧା ମଧ୍ୟ ଭଲ ରହିବ। ତେବେ ପ୍ରକଳ୍ପ ଶେଷ ହେବା ପରେ ହିଁ ଭଡା ସ୍ଥିର କରାଯିବ ବୋଲି ସେ କହିଛନ୍ତି। ଦେଶର ବୁଲେଟ୍ ଟ୍ରେନ୍ ପ୍ରକଳ୍ପକୁ ନେଇ ସରକାର ଅତ୍ୟନ୍ତ ଗମ୍ଭୀର। ଦ୍ୱିତୀୟ ହାଇ ସ୍ପିଡ୍ ରେଳ ପ୍ରକଳ୍ପ କେବଳ ମୁମ୍ବାଇ-ଅହମ୍ମଦାବାଦ ହାଇ ସ୍ପିଡ୍ ରେଳ ପ୍ରକଳ୍ପ ଶେଷ ହେବା ପରେ ଆରମ୍ଭ ହେବ।
୨୦୨୬ରେ ପ୍ରଥମ ବୁଲେଟ୍ ଟ୍ରେନ୍ ଚଲାଇବାକୁ ଲକ୍ଷ୍ୟ: ସେ ଅହମ୍ମଦାବାଦ-ମୁମ୍ବାଇ ବୁଲେଟ୍ ଟ୍ରେନ୍ ପ୍ରକଳ୍ପର ଅଗ୍ରଗତି ବିଷୟରେ ଜାଣିବା ପାଇଁ ସୁରଟ ପରିଦର୍ଶନ କରିଥିଲେ। ସେ କହିଥିଲେ ଯେ ୨୦୨୬ ମସିହାରେ ସୁରଟ ଏବଂ ବିଲିମୋରା ମଧ୍ୟରେ ପ୍ରଥମ ବୁଲେଟ୍ ଟ୍ରେନ୍ ଚଳାଇବାକୁ ସରକାର ଲକ୍ଷ୍ୟ ରଖିଛନ୍ତି। ଏଥିରେ ଭଲ ଅଗ୍ରଗତି ହେଉଛି ଏବଂ ଆମେ ନିଶ୍ଚିତ ଯେ ସେତେବେଳକୁ ଆମେ ଟ୍ରେନ୍ ଚଳାଇବା କାର୍ୟ୍ୟ ସମାପ୍ତ କରିବୁ।
ମୁମ୍ବାଇ ଏବଂ ଅହମ୍ମଦାବାଦ ମଧ୍ୟରେ ୩୨୦ କିଲୋମିଟର ବେଗରେ ବୁଲେଟ୍ ଟ୍ରେନ୍ ଚଳାଇବାକୁ ପ୍ରସ୍ତାବ ଦିଆଯାଇଛି। ଦୁଇ ସହର ମଧ୍ୟରେ ସମୁଦାୟ ୫୦୮ କିଲୋମିଟର ଦୂରତା ଅଛି ଏବଂ ଏଥିରେ ୧୨ ଟି ଷ୍ଟେସନ୍ ରହିବ। ଏହି ଟ୍ରେନ୍ ଦୁଇ ସହର ମଧ୍ୟରେ ଯାତ୍ରା ସମୟକୁ ତିନି ଘଣ୍ଟାକୁ ହ୍ରାସ କରିବ। ବର୍ତ୍ତମାନ ଏହା ଛଅ ଘଣ୍ଟା ସମୟ ଲାଗୁଛି। ଏହି ପ୍ରକଳ୍ପର ସମୁଦାୟ ଆନୁମାନିକ ମୂଲ୍ୟ ୧.୧ ଲକ୍ଷ କୋଟି ଟଙ୍କା ଧାର୍ଯ୍ୟ କରାଯାଇଛି।
