ବର୍ଷା ଦିନେ ଲାଇଟ୍ ଚାରିପାଖେ ବୁଲୁଥିବା ପୋକଙ୍କୁ ନେଇ ହଇରାଣ ହେଉଛନ୍ତି କି, ଆପଣାନ୍ତୁ ଏହି ସହଜ ଉପାୟ, ତୁରନ୍ତ ମିଳିବ ମୁକ୍ତି

Monsoon Insects: ବର୍ଷା ଋତୁ ଆରମ୍ଭ ହେବା ମାତ୍ରେ ହିଁ ଘରେ ପୋକମାଛିଙ୍କ ପ୍ରାଦୁର୍ଭାବ ବଢ଼ିଯାଇଥାଏ । କିଛି ପୋକ ଚଟାଣରେ ଚାଲୁଥିବା ବେଳେ ଆଉ କିଛି ଉଡ଼ନ୍ତା ପୋକ ଘର ସାରା ବୁଲିଥାନ୍ତି । ଏହି ଦିନରେ ବିଶେଷ କରି ‘ଲାଇଟ୍ ଚାରିପଟେ ବୁଲୁଥିବା ପୋକ’ ଅଧିକ ଦେଖାଯାନ୍ତି, ଯେଉଁମାନେ ଆଲୋକ ଦେଖି ସେଥିପ୍ରତି ଆକର୍ଷିତ ହୁଅନ୍ତି ଏବଂ ଘରର ଲାଇଟ୍ ଚାରିପାଖେ ଘୁରି ବୁଲନ୍ତି ।

ଏହି ପୋକଗୁଡ଼ିକ ଉଡ଼ି ଉଡ଼ି ଖାଦ୍ୟ ପଦାର୍ଥରେ ପଡ଼ନ୍ତି, ଶରୀରରେ ଲାଖି ଯାଆନ୍ତି ଏବଂ ପୂରା ଘରକୁ ଅପରିଷ୍କାର କରିଦିଅନ୍ତି । ଯଦି ଆପଣ ମଧ୍ୟ ଏହି ବର୍ଷା ପୋକଙ୍କ ଯୋଗୁଁ ଅତିଷ୍ଠ ହୋଇଗଲେଣି, ତେବେ କିଛି ସହଜ ଘରୋଇ ଉପାୟ ଆପଣାଇ ଏମାନଙ୍କଠାରୁ ସହଜରେ ମୁକ୍ତି ପାଇପାରିବେ ।

ଜାଣନ୍ତୁ କିଛି ସହଜ ଟିପ୍ସ

‘ଲାଇଟ୍ ଟ୍ରାପ୍’ର ବ୍ୟବହାର କରନ୍ତୁ

ଏହା ପୋକ ଭଗାଇବାର ଏକ ବହୁତ ପୁରୁଣା ଏବଂ ପ୍ରଭାବଶାଳୀ ଉପାୟ । ଏଥିପାଇଁ ଘରର ଯେକୌଣସି ଗୋଟିଏ ବାହାର ଅଂଶର (ଯେପରିକି ବାଲକୋନି କିମ୍ବା ବାରଣ୍ଡା) ଲାଇଟ୍ ଜଳାଇ ଦିଅନ୍ତୁ, ଯାହାଫଳରେ ଘର ଭିତରର ସବୁ ପୋକ ସେହି ଆଲୋକ ଆଡ଼କୁ ଚାଲିଯିବେ ।

ଏବେ ସେହି ଜଳୁଥିବା ଲାଇଟ୍‌ର ଠିକ୍ ତଳେ ଏକ ବାଲ୍ଟି କିମ୍ବା ଟବ୍‌ରେ ପାଣି ଭର୍ତ୍ତି କରି ରଖନ୍ତୁ ଏବଂ ସେଥିରେ ଅଳ୍ପ ଲିକ୍ୱିଡ୍ ସୋପ୍ ବା ସର୍ଫ ଗୁଣ୍ଡ ମିଶାଇ ଦିଅନ୍ତୁ । ଆଲୋକ ଚାରିପାଖେ ବୁଲୁଥିବା ପୋକଗୁଡ଼ିକ ପାଣିରେ ନିଜର ପ୍ରତିବିମ୍ବ ଦେଖି ସେଥିରେ ପଡ଼ିଯିବେ ଏବଂ ସାବୁନ ପାଣି ଯୋଗୁଁ ବାହାରକୁ ଆସି ନପାରି ମରିଯିବେ ।

ଲାଇଟ୍‌ର ରଙ୍ଗ ବଦଳାଇ ଦିଅନ୍ତୁ

ବର୍ଷା ଦିନର ପୋକଗୁଡ଼ିକ ସାଧାରଣତଃ ଧଳା କିମ୍ବା ନୀଳ ରଙ୍ଗର ଆଲୋକ ପ୍ରତି ଅଧିକ ଆକର୍ଷିତ ହୋଇଥାନ୍ତି । ତେଣୁ ଏହି ଦିନରେ ଘରର ମୁଖ୍ୟ ଦ୍ୱାର କିମ୍ବା ବାହାରେ ଥିବା ଧଳା ଲାଇଟ୍ ବଦଳରେ ହଳଦିଆ କିମ୍ବା ୱାର୍ମ ଅରେଞ୍ଜ ରଙ୍ଗର ଲାଇଟ୍ ବ୍ୟବହାର କରନ୍ତୁ । ଏହାଦ୍ୱାରା ପୋକମାନେ ଘର ଆଡ଼କୁ ଆସିବେ ନାହିଁ ।

ଲିମ୍ବ ଏବଂ କର୍ପୁର ସ୍ପ୍ରେ

ପୋକମାନଙ୍କୁ ଦୂରେଇ ରଖିବା ପାଇଁ ଆପଣ ଘରେ ଏକ ପ୍ରାକୃତିକ ସ୍ପ୍ରେ ପ୍ରସ୍ତୁତ କରିପାରିବେ । ପାଣିରେ ଅଳ୍ପ ଲିମ୍ବ ତେଲ କିମ୍ବା କର୍ପୁର ଗୁଣ୍ଡକୁ ଭଲ ଭାବେ ମିଶାଇ ଦିଅନ୍ତୁ । ଏହି ପାଣିକୁ ଘରର କବାଟ, ଝରକା ଏବଂ ଲାଇଟ୍ ଚାରିପାଖେ ସ୍ପ୍ରେ କରନ୍ତୁ । ଲିମ୍ବ ଓ କର୍ପୁରର ତୀବ୍ର ଗନ୍ଧ ଯୋଗୁଁ ପୋକମାନେ ତୁରନ୍ତ ସେହି ସ୍ଥାନ ଛାଡ଼ି ପଳାଇଥାନ୍ତି ।

ସଂନ୍ଧ୍ୟା ସମୟରେ ଲାଇଟ୍ ବନ୍ଦ ରଖନ୍ତୁ

ଯେତେବେଳେ ସନ୍ଧ୍ୟା ହେବ, ସେହି ସମୟରେ କିଛି ସମୟ ପାଇଁ ଘରର ଭିତର ଲାଇଟ୍‌ଗୁଡ଼ିକୁ ବନ୍ଦ କରିଦିଅନ୍ତୁ ଏବଂ ବାହାର ଲାଇଟ୍ ଜଳାଇ ରଖନ୍ତୁ । ଘର ଭିତରେ ଅନ୍ଧାର ହେବା ଯୋଗୁଁ ପୋକଗୁଡ଼ିକ ଆଲୋକ ସନ୍ଧାନରେ ଆପେ ଆପେ ବାହାରକୁ ଚାଲିଯିବେ । ପୋକ ବାହାରିଗଲା ପରେ ଆପଣ ଝରକା କବାଟ ବନ୍ଦ କରି ଭିତର ଲାଇଟ୍ ଜଳାଇ ପାରିବେ ।

ଘରେ ଓଦାଳିଆ ଭାବ ହେବାକୁ ଦିଅନ୍ତୁ ନାହିଁ

ବର୍ଷା ଦିନେ ଘରର କାନ୍ଥ କିମ୍ବା ଆସବାବପତ୍ର, ବିଶେଷ କରି କାଠ ଜିନିଷରେ ଓଦାଳିଆ ଭାବ ବା ସିଲନ୍ ରହିଲେ ପୋକମାନେ ସେଠାକୁ ଅଧିକ ଆସନ୍ତି । ତେଣୁ ଘରକୁ ସବୁବେଳେ ସଫା ଏବଂ ଶୁଖିଲା ରଖିବାକୁ ଚେଷ୍ଟା କରନ୍ତୁ । ଘରେ ଓଦାଳିଆ ଭାବ ନରହିଲେ ବର୍ଷା ପୋକଙ୍କ ସଂଖ୍ୟା ଆପେ ଆପେ କମିଯିବ ।