ଜେଲ୍ ଯିବେ ନା ମିଳିବ ଜାମିନ୍, ସାମାନ୍ୟ ‘ଟାଇପିଂ ଭୁଲ୍‌’ ବଦଳେଇ ଦେବ କି ସୋନମଙ୍କ ଭାଗ୍ୟ, ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ଶୁଣାଣି

Raja Raghubanshi Death: ରାଜା ରଘୁବଂଶୀ ହତ୍ୟା ମାମଲାର ଅଭିଯୁକ୍ତ ପତ୍ନୀ ସୋନମ ରଘୁବଂଶୀଙ୍କୁ ପୁଣି ଥରେ ଜେଲ୍ ପଠାଇବା ପାଇଁ ମେଘାଳୟ ସରକାରଙ୍କ ପକ୍ଷରୁ ଦାୟର ଆବେଦନ ଉପରେ ଗୁରୁବାର ଦିନ ସୁପ୍ରିମକୋର୍ଟରେ ଶୁଣାଣି ହୋଇଛି । ଏହି ଶୁଣାଣି ସମୟରେ ସୁପ୍ରିମକୋର୍ଟ ଏକ ବଡ଼ ଆଇନଗତ ପ୍ରଶ୍ନ ଉଠାଇଛନ୍ତି ।

କୋର୍ଟ କହିଛନ୍ତି ଯେ, “ଗିରଫ ୱାରେଣ୍ଟରେ ଭୁଲ୍ ଧାରା ଲେଖାଯିବା କିମ୍ବା କୌଣସି ଟାଇପିଂ ଭୁଲ୍ ହେବା, କଣ ଗୋଟିଏ ଗିରଫଦାରୀକୁ ବେଆଇନ ଘୋଷଣା କରିବା ଏବଂ ଅଭିଯୁକ୍ତକୁ ଜାମିନ ଦେବା ପାଇଁ ଯଥେଷ୍ଟ କି?” ଏହି ଆଇନଗତ ପ୍ରଶ୍ନର ବିଚାର ପାଇଁ ମାମଲାକୁ ଏକ ବଡ଼ ବେଞ୍ଚ୍ କୁ ପଠାଯାଇପାରେ ବୋଲି ଅଦାଲତ ସଙ୍କେତ ଦେଇଛନ୍ତି ।

ଜଷ୍ଟିସ ମନୋଜ ମିଶ୍ର ଏବଂ ଜଷ୍ଟିସ ଶ୍ରୀ ଚନ୍ଦ୍ରଶେଖରଙ୍କ ବେଞ୍ଚ୍ ଏହି ମାମଲାର ଶୁଣାଣି କରି କହିଛନ୍ତି ଯେ, ଗିରଫ ଦସ୍ତାବିଜ୍‌ରେ ଥିବା ଟାଇପିଂ ଭୁଲ୍‌କୁ ଆଧାର କରି ସୋନମ ରଘୁବଂଶୀଙ୍କୁ ଜାମିନ ଦେବା ପାଇଁ ମେଘାଳୟ ହାଇକୋର୍ଟ ଯେଉଁ ନିଷ୍ପତ୍ତି ନେଇଥିଲେ, ତାହା କେତେଦୂର ଯୁକ୍ତିଯୁକ୍ତ, ତାହାର ସେମାନେ ତନ୍ନ ତନ୍ନ କରି ଯାଞ୍ଚ କରିବେ ।

ମେଘାଳୟ ସରକାରଙ୍କ ପକ୍ଷରୁ ସଲିସିଟର ଜେନେରାଲଙ୍କ ଯୁକ୍ତି

ରାଜ୍ୟ ସରକାରଙ୍କ ପକ୍ଷରୁ କୋର୍ଟରେ ହାଜର ହୋଇ ସଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ, ହତ୍ୟା ଭଳି ଏକ ସଂଗୀନ ମାମଲାରେ କେବଳ ଏକ ଟାଇପିଂ ଭୁଲ୍ ପାଇଁ ଗିରଫଦାରୀକୁ ବେଆଇନ କୁହାଯାଇପାରିବ ନାହିଁ । ହାଇକୋର୍ଟ ଏହି ଆଧାରରେ ଜାମିନ ଦେଇଥିଲେ ଯେ ଗିରଫ ସମୟରେ ଅଭିଯୁକ୍ତଙ୍କୁ ଗିରଫର ପ୍ରକୃତ କାରଣ କୁହାଯାଇ ନଥିଲା, ମାତ୍ର ବାସ୍ତବରେ ତାହା ନୁହେଁ ।

ସଲିସିଟର ଜେନେରାଲ ସ୍ପଷ୍ଟ କରିଛନ୍ତି ଯେ, ଗିରଫ ସମୟରେ ସମସ୍ତ ଆଇନଗତ ପ୍ରକ୍ରିୟା ପାଳନ କରାଯାଇଥିଲା, କେବଳ ଟାଇପ୍ କରିବା ସମୟରେ ଏକ ସାମାନ୍ୟ ଭୁଲ୍ ହୋଇଥିଲା । ନୂତନ ଆଇନ ଅନୁଯାୟୀ ସେକ୍ସନ ୧୦୩ ଲେଖାଯିବା ସ୍ଥାନରେ ଭୁଲ୍ ବଶତଃ ସେକ୍ସନ ୪୦୩ ଟାଇପ୍ ହୋଇଯାଇଥିଲା । ଏହା ଉପରେ ସୁପ୍ରିମକୋର୍ଟ କହିଛନ୍ତି, “ଏହି ବିଷୟରେ ବିସ୍ତୃତ ଭାବେ ବିଚାର କରାଯିବ ଏବଂ ଏହାକୁ ବଡ଼ ବେଞ୍ଚକୁ ପଠାଇବାର ଆବଶ୍ୟକତା ଅଛି କି ନାହିଁ, ତାହା ମଧ୍ୟ ଦେଖାଯିବ ।”

ପାହାଡ଼ରୁ ଠେଲି ସ୍ୱାମୀଙ୍କୁ ମାରିଥିଲେ

ମାମଲାର ଗମ୍ଭୀରତା ବିଷୟରେ ସୂଚନା ଦେଇ ତୁଷାର ମେହେଟ୍ଟା କହିଛନ୍ତି, “ଏହି ମାମଲାରେ ସ୍ୱାମୀ ଏବଂ ସ୍ତ୍ରୀ ଉଭୟ ମେଘାଳୟକୁ ହନିମୁନ୍ ପାଇଁ ଯାଇଥିଲେ । ଏହା ଏକ ପୂର୍ବ ନିୟୋଜିତ ହତ୍ୟାକାଣ୍ଡ ଥିଲା । ପତ୍ନୀ ସୋନମ ଏକ ପାହାଡ଼ ଉପରେ ସ୍ୱାମୀଙ୍କୁ ହତ୍ୟା କରି ଶବକୁ ଗଭୀର ଖାଇ ଭିତରକୁ ଫିଙ୍ଗି ଦେଇଥିଲେ । ଏହା ଅତ୍ୟନ୍ତ ସଂଗୀନ ଅପରାଧ ଅଟେ ।”

କୋର୍ଟ ମାଗିଲେ ଦସ୍ତାବିଜ୍‌ର ଫଟୋକପି

ସୁପ୍ରିମକୋର୍ଟ ମେଘାଳୟ ପୋଲିସକୁ ନିର୍ଦ୍ଦେଶ ଦେଇଛନ୍ତି ଯେ, ଗିରଫ ସମୟରେ ସୋନମ ରଘୁବଂଶୀଙ୍କୁ ଯେଉଁ ସବୁ କାଗଜପତ୍ର ଦିଆଯାଇଥିଲା, ତାହାର ଏକ ସ୍ପଷ୍ଟ ଏବଂ ପଢ଼ାଯାଇପାରୁଥିବା ଫଟୋକପି କୋର୍ଟରେ ଦାଖଲ କରାଯାଉ । ଏହାଦ୍ୱାରା ଜଣାପଡ଼ିବ ଯେ ଗିରଫ ସମୟରେ ତାଙ୍କୁ ପ୍ରକୃତରେ କଣ ସୂଚନା ଦିଆଯାଇଥିଲା ।

ଅଦାଲତଙ୍କ ଚେତାବନୀ

ଜଷ୍ଟିସ ମିଶ୍ର କହିଛନ୍ତି ଯେ, “ଯଦି ଏହି ବୈଷୟିକ ତ୍ରୁଟି ବା ଟେକ୍ନିକାଲ ଆଧାର କୋର୍ଟରେ ତିଷ୍ଠି ନପାରେ, ତେବେ ହାଇକୋର୍ଟ ଦେଇଥିବା ଜାମିନ ଆଦେଶକୁ ରଦ୍ଦ କରିଦିଆଯିବ ।” ଉଲ୍ଲେଖଯୋଗ୍ୟ ଯେ, ଏହା ପୂର୍ବରୁ ଜୁଲାଇ ୩ ତାରିଖରେ ଅନ୍ୟ ଏକ ବେଞ୍ଚ୍ ହାଇକୋର୍ଟଙ୍କ ଜାମିନ ଆଦେଶ ଉପରେ ରୋକ୍ ଲଗାଇବାକୁ ମନା କରିଦେଇଥିଲେ । କୋର୍ଟ ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ମଙ୍ଗଳବାର, ଜୁନ୍ ୧୪ରେ କରିବା ପାଇଁ ଧାର୍ଯ୍ୟ କରିଛନ୍ତି ।