IPL ୨୦୨୭ ପୂର୍ବରୁ RCB ଏହି ୩ ଖେଳାଳିଙ୍କୁ କରିପାରେ ରିଲିଜ୍, ଦେଖନ୍ତୁ ପୁରା ଲିଷ୍ଟ

ଓଡିଶାଭାସ୍କର: ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) କ୍ରମାଗତ ଦୁଇଟି ସିଜନରେ ଚମତ୍କାର ପ୍ରଦର୍ଶନ କରି IPL ଟ୍ରଫି ଜିତିଛି। ତେବେ ଚାମ୍ପିଅନ୍ ହେବା ସତ୍ତ୍ୱେ ମଧ୍ୟ ପ୍ରତ୍ୟେକ ଦଳ ପରବର୍ତ୍ତୀ ସିଜନ୍ ପୂର୍ବରୁ ନିଜ ସ୍କ୍ୱାଡ୍‌ର ସମୀକ୍ଷା କରିଥାଏ।

ଏହି କ୍ରମରେ RCB ମଧ୍ୟ IPL ୨୦୨୭ ପୂର୍ବରୁ କିଛି ଖେଳାଳିଙ୍କୁ ରିଲିଜ୍ କରିପାରେ। ଏଥିରେ ସେହି ଖେଳାଳିମାନେ ସାମିଲ ଅଛନ୍ତି, ଯେଉଁମାନେ ସମଗ୍ର ସିଜନ୍‌ରେ ଆଶାନୁରୂପ ପ୍ରଦର୍ଶନ କରିପାରିନଥିଲେ।

୧. ଜିତେଶ ଶର୍ମା:

RCB IPL ୨୦୨୬ ମେଗା ନିଲାମରେ ଜିତେଶ ଶର୍ମାଙ୍କୁ ୧୧ କୋଟି ଟଙ୍କାରେ କିଣିଥିଲା। କିନ୍ତୁ ଉଇକେଟକିପର୍-ବ୍ୟାଟର ଭାବେ ସେ ଦଳର ଭରସା ରକ୍ଷା କରିପାରିନଥିଲେ।

ସେ ସମଗ୍ର ସିଜନରେ ୧୬ଟି ମ୍ୟାଚ୍ ଖେଳି ମାତ୍ର ୧୧୬ ରନ୍ କରିଥିଲେ। ତାଙ୍କର ସର୍ବାଧିକ ସ୍କୋର ୨୩ ରନ୍ ରହିଥିବାବେଳେ ଅନେକ ମ୍ୟାଚ୍‌ରେ ବଡ଼ ଇନିଂସ ଖେଳିବାରେ ସେ ବିଫଳ ହୋଇଥିଲେ।

ଜଣେ ଫିନିଶର୍ ଓ ଆକ୍ରମଣାତ୍ମକ ବ୍ୟାଟର ଭାବେ ତାଙ୍କଠାରୁ ବହୁତ ଆଶା ରଖାଯାଇଥିଲା। କିନ୍ତୁ ନିରାଶାଜନକ ପ୍ରଦର୍ଶନ ଯୋଗୁଁ IPL ୨୦୨୭ ପୂର୍ବରୁ RCB ତାଙ୍କୁ ରିଲିଜ୍ କରିପାରେ।

୨. ରୋମାରିଓ ଶେଫାର୍ଡ:

ୱେଷ୍ଟଇଣ୍ଡିଜ୍‌ର ଅଲରାଉଣ୍ଡର ରୋମାରିଓ ଶେଫାର୍ଡ ଗତ ଦୁଇଟି ଚାମ୍ପିଅନ୍ ସିଜନରେ RCBର ଅଂଶ ଥିଲେ, କିନ୍ତୁ ଦଳ ପାଇଁ ତାଙ୍କର ଅବଦାନ ସୀମିତ ରହିଥିଲା।

IPL ୨୦୨୬ରେ ସେ ୧୫ଟି ମ୍ୟାଚ୍‌ରେ ୮୩ ରନ୍ କରିବା ସହ ୭ଟି ୱିକେଟ୍ ନେଇଥିଲେ। ନିମ୍ନକ୍ରମରେ ଦ୍ରୁତ ବ୍ୟାଟିଂ କରିବା ଏବଂ ଗୁରୁତ୍ୱପୂର୍ଣ୍ଣ ସମୟରେ ୱିକେଟ୍ ନେବାକୁ ତାଙ୍କଠାରୁ ଆଶା କରାଯାଉଥିଲା, କିନ୍ତୁ ସେ ନିୟମିତ ଭାବେ ପ୍ରଭାବ ପକାଇପାରିନଥିଲେ।

IPL ୨୦୨୫ରେ ମଧ୍ୟ ତାଙ୍କର ପ୍ରଦର୍ଶନ ବିଶେଷ ପ୍ରଭାବଶାଳୀ ନଥିଲା। ତେଣୁ IPL ୨୦୨୭ ପୂର୍ବରୁ RCB ତାଙ୍କୁ ରିଲିଜ୍ କରି କୌଣସି ଅଧିକ ପ୍ରଭାବଶାଳୀ ବିଦେଶୀ ଅଲରାଉଣ୍ଡରଙ୍କ ଉପରେ ଦାଉ ଲଗାଇପାରେ।

୩. ୟଶ ଦୟାଲ:

ବାମହାତୀ ଦ୍ରୁତ ବୋଲର ଯଶ ଦୟାଲ ବ୍ୟକ୍ତିଗତ କାରଣରୁ IPL ୨୦୨୬ରେ ଗୋଟିଏ ମଧ୍ୟ ମ୍ୟାଚ୍ ଖେଳିପାରିନଥିଲେ।

ତାଙ୍କ ଅନୁପସ୍ଥିତିରେ RCB ରସିଖ ଦାରଙ୍କୁ ସୁଯୋଗ ଦେଇଥିଲା। ସେ ଚମତ୍କାର ପ୍ରଦର୍ଶନ କରି ୨୦ଟି ୱିକେଟ୍ ହାସଲ କରି ଦଳର ଭରସା ଜିତିଥିଲେ।

ଦଳକୁ ନୂଆ ବିକଳ୍ପ ମିଳିଯାଇଥିବାରୁ ଯଶ ଦୟାଲଙ୍କ ପାଇଁ ପୁଣି ଚୂଡ଼ାନ୍ତ ଏକାଦଶକୁ ଫେରିବା ସହଜ ଦେଖାଯାଉନାହିଁ। ଏହା ସହ ସେ ଆଇନଗତ ମାମଲାକୁ ନେଇ ମଧ୍ୟ ଚର୍ଚ୍ଚାରେ ରହିଛନ୍ତି।

ଏପରି ପରିସ୍ଥିତିରେ ୫ କୋଟି ଟଙ୍କାରୁ ଅଧିକ ବେତନ ପାଉଥିବା ଏହି ଦ୍ରୁତ ବୋଲରଙ୍କୁ ରିଲିଜ୍ କରିବା RCB ପାଇଁ ଏକ ବ୍ୟବହାରିକ ନିଷ୍ପତ୍ତି ହୋଇପାରେ।

IPL ୨୦୨୭ ନିଲାମ ପୂର୍ବରୁ RCB ନିଜ ସ୍କ୍ୱାଡ୍‌କୁ ଆହୁରି ଶକ୍ତିଶାଳୀ କରିବାକୁ ଚେଷ୍ଟା କରିବ। ଏଭଳି ପରିସ୍ଥିତିରେ ଜିତେଶ ଶର୍ମା, ରୋମାରିଓ ଶେଫାର୍ଡ ଏବଂ ଯଶ ଦୟାଲଙ୍କ ଉପରେ ରିଲିଜ୍‌ର ଖଡ୍ଗ ଝୁଲୁଥିବା ଦେଖାଯାଉଛି।

ତେବେ ଶେଷ ନିଷ୍ପତ୍ତି ଫ୍ରାଞ୍ଚାଇଜିର ରଣନୀତି, ରିଟେନ୍ସନ୍ ନୀତି ଏବଂ ଦଳର ଆବଶ୍ୟକତା ଉପରେ ନିର୍ଭର କରିବ।