ବାପାଙ୍କ ଉପରୁ ଭୁତ ଛଡ଼େଇବାକୁ ଡାକି ଝିଅର ଶୋଷଣ କଲା ତାନ୍ତ୍ରିକ

ମୟୂରଭଞ୍ଜ: ସମୟ ବଦଳିଛି, କିନ୍ତୁ ବଦଳିନି ଚିନ୍ତାଧାରା। ଆଧୁନିକତାର ବିକାଶ ସହ ଚିକିତ୍ସା ବିଜ୍ଞାନର ବିକାଶ ହୋଇଛି। ତଥାବି ଏମିଟି ଅନେକ ଲୋକ ଅଛନ୍ତି ଯେଉଁମାନେ ଆଜିବି ଗୁଣିଗାରେଡ଼ି ଉପରେ ବିଶ୍ୱାସ କରୁଛନ୍ତି। ଚିକିତ୍ସା ପାଇଁ ହସ୍ପିଟାଲ ନ ଯାଇ ତାନ୍ତ୍ରିକଙ୍କ ପାଖକୁ ଯାଉଛନ୍ତି। ତେବେ ଏମିତି ଏକ ଘଟଣା ସାମ୍ନାକୁ ଆସିଛି ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।

ଜଣେ ୧୯ ବର୍ଷୀୟା କଲେଜ ଛାତ୍ରୀଙ୍କୁ ଯୌନ ନିର୍ଯାତନା ଦେବା ଅଭିଯୋଗରେ ପୋଲିସ ମୟୂରଭଞ୍ଜ ଜିଲ୍ଲାର ତିରିଂ ଥାନା ସୀମା ଅନ୍ତର୍ଗତ ଦଳସରା ଗ୍ରାମର ୪୦ ବର୍ଷୀୟ ଆତ୍ମଘୋଷିତ ତାନ୍ତ୍ରିକ ରାଧୁ କିସ୍କୁଙ୍କୁ ଗିରଫ କରିଛି। ଭୂତ ଛଡ଼ାଇବା ଏବଂ ସୁସ୍ଥ କରିବାର ଆଳ ଦେଖାଇ ଏହି ଶୋଷଣ ଏବଂ ଅନ୍ଧବିଶ୍ୱାସପୂର୍ଣ୍ଣ କାର୍ଯ୍ୟ ଅଞ୍ଚଳରେ ଉତ୍ତେଜନା ସୃଷ୍ଟି କରିଛି।

ପୋଲିସର କହିବା ଅନୁଯାୟୀ, ପୀଡ଼ିତା ଛାତ୍ରୀଙ୍କ ବାପା ବହୁତ ଦିନ ଧରି ଅସୁସ୍ଥ ଥିଲେ। ଡାକ୍ତରୀ ଚିକିତ୍ସା ବିଫଳ ହେବା ପରେ ପରିବାର ରାଧୁ କିସ୍କୁ ନାମକ ଜଣେ ତାନ୍ତ୍ରିକଙ୍କ ସାହାଯ୍ୟ ଲୋଡ଼ିଥିଲେ। ଅଭିଯୁକ୍ତ ତାନ୍ତ୍ରିକ ଦାବି କରିଥିଲେ ଯେ ପିତାଙ୍କ ଅସୁସ୍ଥତା “ଅଲୌକିକ ଶକ୍ତି” ତଥା ତାଙ୍କ ଝିଅର ଶରୀରରେ ଥିବା ଦେବୀଙ୍କ ଛାୟା ଯୋଗୁଁ ହୋଇଛି। ଏହି ବାହାନାରେ, ସେ ଛାତ୍ରୀଙ୍କୁ ଏକ ନିର୍ଜନ ଘରକୁ ନେଇ ଯୌନ ନିର୍ଯାତନା ଦେଇଥିଲେ। ସେ ଏହା ମଧ୍ୟ ଧମକ ଦେଇଥିଲେ ଯେ ଯଦି ଛାତ୍ରୀ ଜଣଙ୍କ ଏ ବିଷୟରେ କାହାକୁ କୁହନ୍ତି, ତେବେ ତାଙ୍କ ବାପା କେବେ ସୁସ୍ଥ ହେବେ ନାହିଁ।

ପୀଡ଼ିତାଙ୍କ କହିବା ଅନୁଯାୟୀ, ଗୁଣିଆ ଜଣକ ପରେ ତାଙ୍କୁ ଅମାବାସ୍ୟା ରାତିରେ ପୁଣି ଥରେ ଡାକି ଏକ ଘରକୁ ନେଇ ଯୌନ ନିର୍ଯାତନା ଦେଇଥିଲେ। ଏହି ଭୟଙ୍କର ଘଟଣା ପରେ, ଅତ୍ୟଧିକ ଭୟଭୀତ ଛାତ୍ରୀ ଜଣକ ତିରିଂ ପୋଲିସ ଷ୍ଟେସନରେ ଅଭିଯୋଗ କରିଥିଲେ।

ପୋଲିସ ଏହି ଘଟଣାରେ ଏକ ଦୁଷ୍କର୍ମ ମାମଲା ରୁଜୁ କରିବା ସହ ଉଭୟ ପୀଡ଼ିତା ଏବଂ ଅଭିଯୁକ୍ତଙ୍କ ଡାକ୍ତରୀ ପରୀକ୍ଷା କରିଛି। ଅଭିଯୁକ୍ତ ରାଧୁ କିସ୍କୁଙ୍କୁ ପରେ କୋର୍ଟଚାଲାଣ କରାଯାଇଛି। ଏହି ଘଟଣା ପୁଣି ଥରେ ଗ୍ରାମାଞ୍ଚଳରେ ଅନ୍ଧବିଶ୍ୱାସର ଭୟଙ୍କର ରୂପ ଏବଂ ସଚେତନତା ବୃଦ୍ଧି କରିବାର ଜରୁରୀ ଆବଶ୍ୟକତାକୁ ସ୍ପଷ୍ଟ କରିଛି।