ୱେଷ୍ଟଇଣ୍ଡିଜ୍ ବିପକ୍ଷ ଦିନିକିଆ ସିରିଜ୍ ଖେଳିବେନି ଶ୍ରେୟସ ଆୟର, ଏହି ଧୁରନ୍ଧର ବ୍ୟାଟର୍ ନେବେ ତାଙ୍କ ସ୍ଥାନ!
ସେପ୍ଟେମ୍ବର ୨୭ରୁ ଆରମ୍ଭ ହେବ ଦିନିକିଆ ସିରିଜ୍, ନମ୍ବର-୪ ପାଇଁ ନୂଆ ମୁହଁକୁ ସୁଯୋଗ।
ନୂଆଦିଲ୍ଲୀ: ୱେଷ୍ଟଇଣ୍ଡିଜ୍ ବିପକ୍ଷ ଆଗାମୀ ଦିନିକିଆ ସିରିଜରେ ଟିମ୍ ଇଣ୍ଡିଆର ବ୍ୟାଟିଂ ଅର୍ଡରରେ ବଡ଼ ପରିବର୍ତ୍ତନ ଦେଖିବାକୁ ମିଳିପାରେ। ନମ୍ବର-୪ରେ ନିୟମିତ ଭାବେ ଖେଳୁଥିବା ଶ୍ରେୟସ ଆୟର ଏହି ସିରିଜ୍ରୁ ବାଦ୍ ପଡିପାରନ୍ତି। ତାଙ୍କ ସ୍ଥାନରେ ଜଣେ ଯୁବ ବ୍ୟାଟରଙ୍କୁ ସୁଯୋଗ ମିଳିବାର ସମ୍ଭାବନା ଥିବା ଚର୍ଚ୍ଚା ହେଉଛି।
ଭାରତ ଆସନ୍ତା ସେପ୍ଟେମ୍ବର ୨୭ ତାରିଖରୁ ୱେଷ୍ଟଇଣ୍ଡିଜ୍ ବିପକ୍ଷରେ ୩ଟି ମ୍ୟାଚ୍ର ଦିନିକିଆ ସିରିଜ୍ ଖେଳିବ। ଏହି ସିରିଜ୍ରେ ଶ୍ରେୟସ ଆୟରଙ୍କ ଅନୁପସ୍ଥିତି ହେଲେ ଟିମ୍ ଇଣ୍ଡିଆକୁ ନମ୍ବର-୪ ପାଇଁ ନୂଆ ବିକଳ୍ପ ଖୋଜିବାକୁ ପଡ଼ିପାରେ।
କାହିଁକି ଖେଳି ନପାରନ୍ତି ଶ୍ରେୟସ: ଆସନ୍ତା ୧୯ ସେପ୍ଟେମ୍ବରରୁ ଜାପାନରେ ଏସିଆନ୍ ଗେମ୍ସ ଆୟୋଜିତ ହେବ। ଏଥିରେ ଶ୍ରେୟସ ଆୟର ଭାରତୀୟ କ୍ରିକେଟ୍ ଟିମ୍ର ଅଧିନାୟକ ଭାବେ ଦାୟିତ୍ୱ ନେଇପାରନ୍ତି। ଏହି କାରଣରୁ ୱେଷ୍ଟଇଣ୍ଡିଜ୍ ବିପକ୍ଷ ଦିନିକିଆ ସିରିଜ୍ରେ ତାଙ୍କ ଖେଳିବା ସମ୍ଭାବନା କମ୍ ରହିଛି।
ଶ୍ରେୟସ ଦୀର୍ଘ ସମୟ ଧରି ଦିନିକିଆରେ ଭାରତର ନିୟମିତ ନମ୍ବର-୪ ବ୍ୟାଟର୍ ରହିଆସିଛନ୍ତି। ତେଣୁ ତାଙ୍କ ଅନୁପସ୍ଥିତିରେ ଏହି ସ୍ଥାନରେ କାହାକୁ ଖେଳାଇବା ଦଳ ପାଇଁ ହିତକର ହେବ ତାହା ଏବେ ଚୟନକର୍ତ୍ତାଙ୍କ ପାଇଁ ବଡ଼ ପ୍ରଶ୍ନ ହୋଇପାରେ।
ନମ୍ବର-୪ରେ ଖେଳିପାରନ୍ତି ତିଲକ ବର୍ମା: ଶ୍ରେୟସଙ୍କ ସ୍ଥାନ ପାଇଁ ଯୁବ ବ୍ୟାଟର୍ ତିଲକ ବର୍ମାଙ୍କ ଦାବି ମଜବୁତ ଥିବା କୁହାଯାଉଛି। ତିଲକ ଜଣେ ବାମହାତୀ ବ୍ୟାଟର୍ ଏବଂ ମଧ୍ୟକ୍ରମରେ ବ୍ୟାଟିଂ କରିବାର ଅଭିଜ୍ଞତା ମଧ୍ୟ ରହିଛି।
ଯଦି ୱେଷ୍ଟଇଣ୍ଡିଜ୍ ସିରିଜ୍ ପାଇଁ ରୋହିତ ଶର୍ମାଙ୍କୁ ଦଳରେ ଚୟନ କରାଯାଏ, ତେବେ ଭାରତର ଟପ୍ ଅର୍ଡର ପ୍ରାୟତଃ ନିଶ୍ଚିତ ରହିପାରେ। ରୋହିତ ଶର୍ମା ଓ ଶୁଭମନ୍ ଗିଲ୍ ଓପନିଂ କରିପାରନ୍ତି, ଯେତେବେଳେ ବିରାଟ କୋହଲି ନମ୍ବର-୩ରେ ବ୍ୟାଟିଂ କରିପାରନ୍ତି।
ଏହି ତିନିଜଣ ଡାହାଣହାତୀ ବ୍ୟାଟର୍ ହୋଇଥିବାରୁ ନମ୍ବର-୪ରେ ବାମହାତୀ ତିଲକ ବର୍ମାଙ୍କୁ ସୁଯୋଗ ଦେଲେ ଭାରତୀୟ ବ୍ୟାଟିଂ ଲାଇନ୍ଅପ୍ରେ ଲେଫ୍ଟ-ରାଇଟ୍ କମ୍ବିନେସନ୍ ତିଆରି ହୋଇପାରିବ। ଏହାପରେ ନମ୍ବର-୫ରେ କେଏଲ୍ ରାହୁଲ ରହିଲେ ଭାରତର ମିଡିଲ୍ ଅର୍ଡର ଆହୁରି ମଜବୁତ ହୋଇପାରେ।
ପ୍ରାୟ ଏକ ବର୍ଷ ପରେ ଫେରିବେ ତିଲକ: ତିଲକ ବର୍ମା ଭାରତ ପାଇଁ ଏପର୍ଯ୍ୟନ୍ତ ୫ଟି ଦିନିକିଆ ମ୍ୟାଚ୍ ଖେଳିଛନ୍ତି ଏବଂ ଏଥିରେ ୬୮ ରନ୍ କରିଛନ୍ତି। ସେ ଶେଷ ଥର ପାଇଁ ୬ ଡିସେମ୍ବର ୨୦୨୫ରେ ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ଖେଳିଥିଲେ। ତେବେ ସେହି ମ୍ୟାଚ୍ରେ ତାଙ୍କୁ ବ୍ୟାଟିଂ କରିବାର ସୁଯୋଗ ମିଳିନଥିଲା।
ଦୌଡ଼ରେ ରହିଛନ୍ତି ଋତୁରାଜ ଗାଏକୱାଡ୍: ତେବେ ଶ୍ରେୟସ ଆୟରଙ୍କ ସ୍ଥାନ ପାଇଁ କେବଳ ତିଳକ ବର୍ମା ନୁହେଁ, ଋତୁରାଜ ଗାଏକୱାଡ୍ଙଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି। ତେଣୁ ଚୟନକର୍ତ୍ତାମାନେ ଅଭିଜ୍ଞତା ଓ ବର୍ତ୍ତମାନର ଫର୍ମକୁ ଦେଖି କାହାକୁ ସୁଯୋଗ ଦେବେ, ତାହା ଉପରେ ନଜର ରହିବ।
ବର୍ତ୍ତମାନ ତିଲକ ବର୍ମା ଦଲୀପ ଟ୍ରଫିରେ ସାଉଥ୍ ଜୋନ୍ର ଅଧିନାୟକ ଭାବେ ଖେଳୁଛନ୍ତି। ଘରୋଇ କ୍ରିକେଟ୍ରେ ତାଙ୍କ ପ୍ରଦର୍ଶନ ମଧ୍ୟ ଚୟନକର୍ତ୍ତାଙ୍କ ନଜରରେ ରହିବ। ଏଠାରେ ଭଲ ପ୍ରଦର୍ଶନ କରିପାରିଲେ ୱେଷ୍ଟଇଣ୍ଡିଜ୍ ବିପକ୍ଷ ଦିନିକିଆ ଦଳରେ ସ୍ଥାନ ପାଇବା ତାଙ୍କ ଦାବି ଆହୁରି ମଜବୁତ ହୋଇପାରେ।
ବାମହାତୀ ବ୍ୟାଟର୍ ହେବା ତିଲକଙ୍କ ପ୍ଲସ୍ ପଏଣ୍ଟ: ଶ୍ରେୟସ ଆୟର ନଥିଲେ ନମ୍ବର-୪ ପାଇଁ ଭାରତ କାହା ଉପରେ ଭରସା କରିବ, ତାହା ଦଳ ଘୋଷଣା ହେବା ପରେ ସ୍ପଷ୍ଟ ହେବ। ତେବେ ବର୍ତ୍ତମାନ ତିଲକ ବର୍ମା ଏହି ସ୍ଥାନ ପାଇଁ ଜଣେ ମଜବୁତ ଦାବିଦାର ଭାବେ ଉଭା ହୋଇଛନ୍ତି।
ବିଶେଷକରି ତାଙ୍କର ବାମହାତୀ ବ୍ୟାଟିଂ ଭାରତୀୟ ଦଳ ପାଇଁ ଏକ ବଡ଼ ପ୍ଲସ୍ ପଏଣ୍ଟ ହୋଇପାରେ। ଯଦି ତାଙ୍କୁ ନମ୍ବର-୪ରେ ସୁଯୋଗ ମିଳେ, ତେବେ ୱେଷ୍ଟଇଣ୍ଡିଜ୍ ବିପକ୍ଷ ସିରିଜ୍ରେ ତାଙ୍କ ପାଇଁ ଏହା ଏକ ବଡ଼ ପରୀକ୍ଷା ହେବ।