ସାଙ୍ଗ ସହ ଭିଡିଓ କଲରେ ଚାଲିଥିଲା କଥା: ଅଚାନକ୍ ଫ୍ୟାନରେ ଝୁଲିପଡ଼ିଲେ ଏହି ଅଭିନେତ୍ରୀ

ନୂଆଦିଲ୍ଲୀ: ନିକଟରେ ଅନେକ କଳାକାରଙ୍କ ମୃତ୍ୟୁ ଖବର ସାମ୍ନାକୁ ଆସିଛି । ନିକଟରେ ଜଣେ କନ୍ନଡ଼ ଅଭିନେତ୍ରୀ ଚେତନା ରାଜଙ୍କର ସର୍ଜରୀ ସମୟରେ ମୃତ୍ୟୁ ହୋଇଥିଲା । ଏବେ ଖବର ମିଳିଛି କି ଆଉ ଜଣେ ସାଉଥ ଇଣ୍ଡିଆନ୍ ସିନେମା ଅଭିନେତ୍ରୀଙ୍କର ମୃତ୍ୟୁ ହୋଇଛି । କେରଳର ଏର୍ନାକୁଲମ ଜିଲ୍ଲାର କୋଚ୍ଚି ଅଞ୍ଚଳରେ ରହୁଥିବା ଟ୍ରାନ୍ସୱିମ୍ୟାନ୍ ମଡେଲ ମୃତଦେହ ଭଡ଼ାଘରୁ ଉଦ୍ଧାର ହୋଇଛି ।

ରିପୋର୍ଟ ଅନୁସାରେ, ମାଲାୟାଲମ୍ ଅଭିନେତ୍ରୀ ଶେରିନ୍ ସେଲିନ୍ ମୈଥ୍ୟୁ ତାଙ୍କ ସାଙ୍କ ସହ ଏକ ଭିଡିଓ କଲରେ କଥା ହେଉଥିଲେ । ୨୬ ବର୍ଷୀୟା ଅଭିନେତ୍ରୀ ଯେଉଁ ବ୍ୟକ୍ତିଙ୍କ ସହ ଭିଡିଓ ଚାଟ୍ କରୁଥିଲେ, ସେହି ବ୍ୟକ୍ତିଜଣକ ପୋଲିସଙ୍କୁ ଶେରିନଙ୍କ ଏପରି କାର୍ଯ୍ୟ ବିଷୟରେ ଅବଗତ କରାଇଥିଲେ । କିନ୍ତୁ ଅଭିନେତ୍ରୀଙ୍କୁ ପୋଲିସ ଅଧିକାରୀମାନେ ବଞ୍ଚାଇ ପାରିନଥିଲେ, କାରଣ ସେ ଘରେ ପହଞ୍ଚିବା ବେଳକୁ ଶେରିନ ଫ୍ୟାନରେ ଝୁଲି ଆତ୍ମହତ୍ୟା କରିସାରିଥିଲେ ।

ଶେରିନଙ୍କ ମୃତ୍ୟୁ ପରେ ପୋଲିସ ଅଧିକାରୀମାନେ ତାଙ୍କ ସମ୍ପର୍କୀୟଙ୍କୁ କହିଛନ୍ତି ଯେ, ଅଭିନେତ୍ରୀ ଜଣକ ଡିପ୍ରେସନର ଶିକାର ଥିଲେ । ସେ ଗତ କିଛି ଦିନ ହେବ ବହୁତ ଉଦାସ ଅନୁଭବ କରୁଥିଲେ । ଏହି ଘଟଣାରେ ଶେରିନଙ୍କ ଘନିଷ୍ଠ ବନ୍ଧୁଙ୍କ ବୟାନ୍ ରେକର୍ଡ କରିଛି ପୋଲିସ । ଯାଞ୍ଚ ପ୍ରକ୍ରିୟା ଶେଷ ହେବା ପରେ ଅଭିନେତ୍ରୀଙ୍କ ମୃତଶରୀରକୁ କଲାମାସେରି ମେଡିକାଲ କଲେଜକୁ ଟ୍ରାନ୍ସଫର କରାଯିବ ।

ତେବେ ଶେରିନ୍ କିଛି ମାଲାୟାଲମ୍ ଚଳଚ୍ଚିତ୍ରରେ ଅଭିନୟ କରିଥିଲେ ଏବଂ ମଡେଲିଂ ଦୁନିଆରେ ବେଶ୍ ସକ୍ରିୟ ଥିଲେ । କୋଚ୍ଚିରେ ଗତ ଏକ ବର୍ଷ ମଧ୍ୟରେ ଟ୍ରାନ୍ସଜେଣ୍ଡରଙ୍କ ଦ୍ୱାରା ଆତ୍ମହତ୍ୟାର ଏହା ହେଉଛି ୫ମ ମାମଲା । ପୂର୍ବରୁ ଡିପ୍ରେସନର ଶିକାର ହୋଇ ବଲିଉଡ ଅଭିନେତା ସୁଶାନ୍ତ ସିଂ ରାଜପୁତ ଆତ୍ମହତ୍ୟା କରିଥିଲେ ।