ଶେଷ ହେଲା ଆମେରିକା-ଇରାନ ଶାନ୍ତି ଚୁକ୍ତି, ଟ୍ରମ୍ପଙ୍କ ବଡ଼ ବୟାନ, କହିଲେ ‘ଇରାନ ଉପରେ ହୋଇଛି ଶକ୍ତିଶାଳୀ ଆକ୍ରମଣ’

Iran-US War: ତୁର୍କୀର ରାଜଧାନୀ ଅଙ୍କାରାଠାରେ ଆୟୋଜିତ ନାଟୋ ଶିଖର ସମ୍ମିଳନୀରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ନେଇ ଏକ ବଡ଼ ବୟାନ ଦେଇଛନ୍ତି । ଗଣମାଧ୍ୟମ ପ୍ରତିନିଧିମାନଙ୍କ ସହ ଆଲୋଚନା ସମୟରେ ଟ୍ରମ୍ପ କହିଛନ୍ତି ଯେ, ଇରାନ ସହିତ ହୋଇଥିବା ବୁଝାମଣା ପତ୍ର ବା ମେମୋରେଣ୍ଡମ୍ ଅଫ୍ ଅଣ୍ଡରଷ୍ଟାଣ୍ଡିଂ (MoU) ଏବେ ସମ୍ପୂର୍ଣ୍ଣ ଭାବେ ଶେଷ ହୋଇଯାଇଛି । ସାମ୍ପ୍ରତିକ ଘଟଣାବଳୀ ପରେ ଉଭୟ ଦେଶ ମଧ୍ୟରେ ସ୍ୱାକ୍ଷରିତ ହୋଇଥିବା ଏହି ଚୁକ୍ତିର ଏବେ କୌଣସି ଗୁରୁତ୍ୱ ବା ମୂଲ୍ୟ ରହିନାହିଁ ବୋଲି ସେ ଦାବି କରିଛନ୍ତି ।

ମୋତେ ଲାଗୁଛି MoU ଏବେ ଶେଷ ହୋଇଯାଇଛି

ସାମ୍ବାଦିକମାନଙ୍କ ପ୍ରଶ୍ନର ଉତ୍ତର ଦେଇ ଟ୍ରମ୍ପ କହିଛନ୍ତି, ମୋତେ ଲାଗୁଛି ଇରାନ ସହ ହୋଇଥିବା ଚୁକ୍ତି ଏବେ ଶେଷ ପର୍ଯ୍ୟାୟରେ ପହଞ୍ଚିଛି । ଆମେରିକା ଏବଂ ଇରାନ ମଧ୍ୟରେ ପରିସ୍ଥିତି ଏଭଳି ସ୍ତରକୁ ଚାଲିଯାଇଛି ଯେ ଦୁଇ ଦେଶ ମଧ୍ୟରେ ହୋଇଥିବା ଆଲୋଚନାର ଭବିଷ୍ୟତ ଏବେ ସମାପ୍ତ ବୋଲି ଧରିବାକୁ ହେବ ବୋଲି ସେ ସଙ୍କେତ ଦେଇଛନ୍ତି ।

ଏହା ସହ ସାମରିକ କାର୍ଯ୍ୟାନୁଷ୍ଠାନ ସମ୍ପର୍କରେ ସୂଚନା ଦେଇ ସେ କହିଛନ୍ତି, ଆମେ ଗତ ରାତିରେ ଇରାନର ଅତ୍ୟନ୍ତ ବିପଜ୍ଜନକ ଲୋକଙ୍କ ଉପରେ ଏକ ଶକ୍ତିଶାଳୀ ଆକ୍ରମଣ କରିଛୁ । ଆମେରିକାର ସୁରକ୍ଷା ପାଇଁ ଏହି କାର୍ଯ୍ୟାନୁଷ୍ଠାନ ଜରୁରୀ ଥିଲା ଏବଂ ଏହି ଅପରେସନକୁ ସମ୍ପୂର୍ଣ୍ଣ ଶକ୍ତିର ସହ ସଫଳ କରାଯାଇଛି ବୋଲି ଟ୍ରମ୍ପ ପ୍ରକାଶ କରିଛନ୍ତି ।

ଇରାନ ନେତୃତ୍ୱକୁ କଡ଼ା ସମାଲୋଚନା

ଆମେରିକା ରାଷ୍ଟ୍ରପତି ଇରାନ ଶାସନ ଗାଦିରେ ଥିବା ନେତୃତ୍ୱକୁ ତୀବ୍ର ଭାଷାରେ ଆକ୍ରମଣ କରି କହିଛନ୍ତି, ସେମାନେ ମାନସିକ ସ୍ତରରେ ସୁସ୍ଥ ନୁହନ୍ତି, ସେମାନଙ୍କ ସହ କିଛି ଗଡ଼ବଡ଼ ରହିଛି । ଟ୍ରମ୍ପଙ୍କ ଏହି କଡ଼ା ଟିପ୍ପଣୀ ଏଭଳି ଏକ ସମୟରେ ଆସିଛି ଯେତେବେଳେ ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା ଚରମ ସୀମାରେ ପହଞ୍ଚିଛି । ଦୁଇ ଦେଶ ମଧ୍ୟରେ ଘଟିଥିବା ସାମ୍ପ୍ରତିକ ସାମରିକ ଟକ୍କର ଯୋଗୁଁ ଆଞ୍ଚଳିକ ପରିସ୍ଥିତି ଏବେ ଅତ୍ୟନ୍ତ ସମ୍ବେଦନଶୀଳ ହୋଇପଡ଼ିଛି ।