ଓଡିଶାରେ ମାଗଣା ଓ ଉନ୍ନତ ଚିକିତ୍ସା ପାଇ ବାଃ ବାଃ କଲେ ଆମେରିକୀୟ

ଉମରକୋଟ : ଓଡ଼ିଶାର ମାଗଣା ସରକାରୀ ସ୍ୱାସ୍ଥ୍ୟସେବାକୁ ପ୍ରଶଂସା କରିଛନ୍ତି ଜଣେ ଆମେରିକୀୟ ଫିଲ୍ମ ନିର୍ମାତା। ନବରଙ୍ଗପୁର ଜିଲ୍ଲାର ଏକ ସରକାରୀ ହସ୍ପିଟାଲରେ ଚିକିତ୍ସା ପାଇବା ପରେ ସେ କହିଛନ୍ତି ଯେ, ଆମେରିକାରେ ଏଭଳି ଚିକିତ୍ସା ପାଇଁ ତାଙ୍କୁ ହଜାର ହଜାର ଡଲାର ଖର୍ଚ୍ଚ କରିବାକୁ ପଡ଼ିଥାନ୍ତା।

୨୮ ବର୍ଷୀୟ ଏହି ପର୍ଯ୍ୟଟକଙ୍କ ନାମ ମାଇକ୍‌ ବୋଲି ଜଣାପଡ଼ିଛି। ଉମରକୋଟରେ ରହିବା ସମୟରେ ହଠାତ୍‌ ଅସୁସ୍ଥ ହୋଇପଡ଼ିବା ପରେ ସୁସ୍ଥ ହୋଇ ସେ ଏକ ଭିଡିଓ ମେସେଜ୍‌ ମାଧ୍ୟମରେ ନିଜ ଅନୁଭୂତି ସେୟାର କରିଛନ୍ତି। ତାଙ୍କ ଏହି ଅନୁଭୂତି ଓଡ଼ିଶାର ସ୍ୱାସ୍ଥ୍ୟସେବା ଏବଂ ସ୍ଥାନୀୟ ଲୋକଙ୍କ ଆତିଥ୍ୟ ଉପରେ ଚର୍ଚ୍ଚା ସୃଷ୍ଟି କରିଛି।

ମାଇକ୍‌ ପ୍ରାୟ ଏକ ସପ୍ତାହ ଧରି ଜାମୁରଣ୍ଡା ଅଞ୍ଚଳର ମମତା ସରକାରଙ୍କ ପରିବାର ସହ ରହୁଥିଲେ। ଏହି ସମୟରେ ସେ ଗାଁ ବୁଲିବା ସହ ସ୍ଥାନୀୟ ଲୋକଙ୍କ ସହ ମିଶିଥିଲେ ଏବଂ ଓଡ଼ିଶାର ଗ୍ରାମୀଣ ଜୀବନକୁ ନିକଟରୁ ଅନୁଭବ କରିଥିଲେ।

ତେବେ ଅଗଷ୍ଟ ୧୭ ତାରିଖ ସକାଳେ ତାଙ୍କର ହଠାତ୍‌ ଗ୍ୟାଷ୍ଟ୍ରିକ୍‌ ସମସ୍ୟା ଦେଖାଦେଇଥିଲା। ଛାତିରେ ଜ୍ୱଳନ, ବାନ୍ତି ଏବଂ ଡିହାଇଡ୍ରେସନ୍‌ ଭଳି ସମସ୍ୟା ହୋଇଥିଲା। ଏହା ଦେଖି ପରିବାରର ଲୋକମାନେ ତୁରନ୍ତ ତାଙ୍କୁ ନିକଟସ୍ଥ ସରକାରୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ।

ସେଠାରେ ଡାକ୍ତରମାନେ ତାଙ୍କର ପରୀକ୍ଷା କରିବା ସହ ଇଞ୍ଜେକ୍ସନ୍‌ ଏବଂ ଔଷଧ ଦେଇଥିଲେ। ତାଙ୍କ ସ୍ୱାସ୍ଥ୍ୟରେ ସୁଧାର ନ ଆସିବା ପର୍ଯ୍ୟନ୍ତ ତାଙ୍କୁ ନିରୀକ୍ଷଣରେ ରଖାଯାଇଥିଲା। ମାଇକ୍‌ଙ୍କ କହିବା ଅନୁସାରେ, ତାଙ୍କର ସମ୍ପୂର୍ଣ୍ଣ ଚିକିତ୍ସା ମାଗଣାରେ କରାଯାଇଥିଲା।

ଭିଡିଓ ମେସେଜ୍‌ରେ ଆମେରିକୀୟ ପର୍ଯ୍ୟଟକ ମାଇକ୍‌ କହିଛନ୍ତି ଯେ, ଚିକିତ୍ସା ପାଇଁ ତାଙ୍କୁ କୌଣସି ଟଙ୍କା ଦେବାକୁ ପଡ଼ିନଥିବା ଦେଖି ସେ ଆଶ୍ଚର୍ଯ୍ୟ ହୋଇଥିଲେ। ସେ କହିଛନ୍ତି ଯେ, ଆମେରିକାରେ ସମାନ ଚିକିତ୍ସା ପାଇଁ ତାଙ୍କୁ ହଜାର ହଜାର ଡଲାର ଖର୍ଚ୍ଚ କରିବାକୁ ପଡ଼ିପାରିଥାନ୍ତା।

କେବଳ ଚିକିତ୍ସା ନୁହେଁ, ଅସୁସ୍ଥ ଥିବା ସମୟରେ ତାଙ୍କର ଯତ୍ନ ନେଇଥିବା ସ୍ଥାନୀୟ ପରିବାର ଏବଂ ଗାଁ ଲୋକଙ୍କ ଆତିଥ୍ୟକୁ ମଧ୍ୟ ମାଇକ୍‌ ପ୍ରଶଂସା କରିଛନ୍ତି। ସେ ପାଇଥିବା ସହଯୋଗ, ଭଲପାଇବା ଏବଂ ମାନବିକତା ତାଙ୍କ ଓଡ଼ିଶା ଗସ୍ତର ସବୁଠାରୁ ସ୍ମରଣୀୟ ଅନୁଭୂତି ମଧ୍ୟରୁ ଗୋଟିଏ ବୋଲି କହିଛନ୍ତି।

ଘରକୁ ଫେରିବା ପରେ ମାଇକ୍‌ ନିଜର ଏହି ଅନୁଭୂତିକୁ ସୋସିଆଲ ମିଡିଆରେ ସେୟାର କରିଛନ୍ତି। ଗ୍ରାମୀଣ ଓଡ଼ିଶାରେ ମାଗଣା ସ୍ୱାସ୍ଥ୍ୟସେବା ସହଜରେ ଉପଲବ୍ଧ ହେଉଥିବାରୁ ସେ ଖୁସି ବ୍ୟକ୍ତ କରିବା ସହ ଡାକ୍ତର, ସ୍ୱାସ୍ଥ୍ୟକର୍ମୀ ଏବଂ ତାଙ୍କର ଯତ୍ନ ନେଇଥିବା ପରିବାରକୁ ଧନ୍ୟବାଦ ଜଣାଇଛନ୍ତି।

ମାଇକ୍‌ଙ୍କ ଏହି ଅନୁଭୂତିକୁ ନେଇ ସୋସିଆଲ ମିଡିଆରେ ମଧ୍ୟ ଚର୍ଚ୍ଚା ହେଉଛି। ଅନେକ ଲୋକ ଏହାକୁ ଓଡ଼ିଶାର ‘ଅତିଥି ଦେବୋ ଭବଃ’ ପରମ୍ପରାର ଏକ ଉଦାହରଣ ବୋଲି କହୁଛନ୍ତି। ଅତିଥିଙ୍କୁ ସର୍ବୋଚ୍ଚ ସମ୍ମାନ ଦେବାର ଏହି ପରମ୍ପରା ସହ ଗ୍ରାମୀଣ ଅଞ୍ଚଳରେ ସରକାରୀ ସ୍ୱାସ୍ଥ୍ୟସେବାର ପହଞ୍ଚକୁ ମଧ୍ୟ ଏହି ଘଟଣା ଦର୍ଶାଉଛି।