ଦେଶର ନୂଆ ଶିକ୍ଷାମନ୍ତ୍ରୀ ପ୍ରହ୍ଲାଦ ଯୋଶୀ କେତେ ପାଠ ପଢିଛନ୍ତି, ତାଙ୍କ ପାଖରେ କେଉଁସବୁ ଡିଗ୍ରୀ ରହିଛି
ପ୍ରହ୍ଲାଦ ଯୋଶୀଙ୍କ ଶିକ୍ଷାଗଚ ଯୋଗ୍ୟତା କ'ଣ?
ଓଡିଶାଭାସ୍କର: ଦେଶର ଶିକ୍ଷା ମନ୍ତ୍ରଣାଳୟର ଦାୟିତ୍ୱ ଏବେ ପ୍ରହ୍ଲାଦ ଯୋଶୀଙ୍କ ହାତକୁ ଯାଇଛି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ପ୍ରଧାନମନ୍ତ୍ରୀଙ୍କ ପରାମର୍ଶକ୍ରମେ କେନ୍ଦ୍ରୀୟ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫାକୁ ଗ୍ରହଣ କରିଛନ୍ତି।
ଏହା ସହ ପ୍ରହ୍ଲାଦ ଯୋଶୀଙ୍କୁ ତାଙ୍କ ବର୍ତ୍ତମାନର ମନ୍ତ୍ରଣାଳୟ ସହିତ ଶିକ୍ଷା ମନ୍ତ୍ରଣାଳୟର ଅତିରିକ୍ତ ଦାୟିତ୍ୱ ମଧ୍ୟ ପ୍ରଦାନ କରାଯାଇଛି। ଏବେ ସେ ଉପଭୋକ୍ତା ବ୍ୟାପାର, ଖାଦ୍ୟ ଓ ସାର୍ବଜନିକ ବଣ୍ଟନ ମନ୍ତ୍ରଣାଳୟ ସହିତ ଶିକ୍ଷା ମନ୍ତ୍ରଣାଳୟର ଦାୟିତ୍ୱ ମଧ୍ୟ ତୁଲାଇବେ।
ପ୍ରହ୍ଲାଦ ଯୋଶୀ ଏହା ପୂର୍ବରୁ ନବୀକରଣଯୋଗ୍ୟ ଶକ୍ତି, ସଂସଦୀୟ ବ୍ୟାପାର ସମେତ କେନ୍ଦ୍ର ସରକାରଙ୍କ ଅନେକ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟର ଦାୟିତ୍ୱ ସମ୍ଭାଳି ସାରିଛନ୍ତି।
ଏଭଳି ସ୍ଥିତିରେ ଦେଶର ନୂଆ ଶିକ୍ଷାମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ଶିକ୍ଷାଗତ ଯୋଗ୍ୟତା ଏବଂ ତାଙ୍କର ରାଜନୈତିକ ଯାତ୍ରାକୁ ନେଇ ଲୋକଙ୍କ ମନରେ ଆଗ୍ରହ ସୃଷ୍ଟି ହୋଇଛି।
ପ୍ରହ୍ଲାଦ ଯୋଶୀ କର୍ଣ୍ଣାଟକ ୟୁନିଭର୍ସିଟି, ଧାରୱାଡ଼ ଅଧୀନସ୍ଥ କେ.ଏସ୍. ଆର୍ଟ୍ସ କଲେଜ, ହୁବ୍ବଳୀରୁ ବି.ଏ. (Bachelor of Arts) ଡିଗ୍ରୀ ହାସଲ କରିଛନ୍ତି। ଏହା ପରେ ସେ ସକ୍ରିୟ ଭାବେ ରାଜନୀତିରେ ପ୍ରବେଶ କରି ଦୀର୍ଘ ରାଜନୈତିକ ଅନୁଭବ ହାସଲ କରିଛନ୍ତି।
ଦେଶର ନୂଆ ଶିକ୍ଷାମନ୍ତ୍ରୀଙ୍କ ଜନ୍ମସ୍ଥାନ:
ପ୍ରହ୍ଲାଦ ଯୋଶୀଙ୍କ ଜନ୍ମ ୨୭ ନଭେମ୍ବର ୧୯୬୨ରେ କର୍ଣ୍ଣାଟକର ବିଜୟପୁରାରେ ହୋଇଥିଲା। ତାଙ୍କ ପିତା ସ୍ୱର୍ଗତ ବେଙ୍କଟେଶ ଯୋଶୀ ଭାରତୀୟ ରେଳବାଇରେ କର୍ମଚାରୀ ଥିବାବେଳେ ମାତାଙ୍କ ନାମ ମାଲତୀବାଇ ଯୋଶୀ।
ସାଧାରଣ ପରିବାରରେ ବଢ଼ିଥିବା ପ୍ରହ୍ଲାଦ ଯୋଶୀ ଛାତ୍ରଜୀବନରୁ ହିଁ ସାମାଜିକ କାର୍ଯ୍ୟ ଓ ଜନକଲ୍ୟାଣମୂଳକ ପ୍ରସଙ୍ଗ ପ୍ରତି ଆଗ୍ରହୀ ଥିଲେ। ପରବର୍ତ୍ତୀ ସମୟରେ ସେ ସାମାଜିକ କାର୍ଯ୍ୟ ସହିତ ଏକ କ୍ଷୁଦ୍ର ଶିଳ୍ପ ପ୍ରତିଷ୍ଠା କରିଥିଲେ। ଏହାପରେ ସେ ସକ୍ରିୟ ରାଜନୀତିରେ ପ୍ରବେଶ କରି ଧୀରେ ଧୀରେ ଜାତୀୟ ସ୍ତରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ।
ନୂଆ ଶିକ୍ଷାମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ପାଖରେ କେଉଁ ଡିଗ୍ରୀ ଅଛି:
Uttarakhand Govt.
ପ୍ରହ୍ଲାଦ ଯୋଶୀଙ୍କ ପ୍ରାରମ୍ଭିକ ଶିକ୍ଷା ରେଳବାଇ ସ୍କୁଲ୍ରେ ହୋଇଥିଲା। ଏହା ପରେ ସେ ହୁବ୍ବଳୀର ନ୍ୟୁ ଇଂଲିଶ୍ ସ୍କୁଲ୍ରୁ ସ୍କୁଲ୍ ଶିକ୍ଷା ସମାପ୍ତ କରିଥିଲେ।
ଉଚ୍ଚଶିକ୍ଷା ପାଇଁ ସେ କର୍ଣ୍ଣାଟକ ବିଶ୍ୱବିଦ୍ୟାଳୟ, ଧାରୱାଡ଼ ଅଧୀନସ୍ଥ କେ.ଏସ୍. ଆର୍ଟ୍ସ କଲେଜ, ହୁବ୍ବଳୀରେ ନାମ ଲେଖାଇଥିଲେ। ସେଠାରୁ ସେ ବ୍ୟାଚେଲର ଅଫ୍ ଆର୍ଟ୍ସ (B.A.) ଡିଗ୍ରୀ ହାସଲ କରିଥିଲେ। ସଂସଦର ଆଧିକାରିକ ପ୍ରୋଫାଇଲ୍ ଅନୁଯାୟୀ, ସେ ୧୯୮୩ ମସିହାରେ B.A. ପଢ଼ା ଶେଷ କରିଥିଲେ।
କର୍ଣ୍ଣାଟକ ବିଶ୍ୱବିଦ୍ୟାଳୟ ୧୯୪୯ ମସିହାରେ ସ୍ଥାପିତ ହୋଇଥିଲା ଏବଂ ଉତ୍ତର କର୍ଣ୍ଣାଟକର ଅନ୍ୟତମ ପ୍ରମୁଖ ବିଶ୍ୱବିଦ୍ୟାଳୟ ଭାବେ ପରିଚିତ। ଏହି ବିଶ୍ୱବିଦ୍ୟାଳୟରୁ ଅନେକ ରାଜନେତା, ସରକାରୀ ଅଧିକାରୀ ଏବଂ ବିଭିନ୍ନ କ୍ଷେତ୍ରର ବିଶିଷ୍ଟ ବ୍ୟକ୍ତିତ୍ୱ ଶିକ୍ଷା ଗ୍ରହଣ କରିଛନ୍ତି।
ପ୍ରହ୍ଲାଦ ଯୋଶୀଙ୍କ ରାଜନୈତିକ ଯାତ୍ରା କିପରି ଆରମ୍ଭ ହୋଇଥିଲା:
ପ୍ରହ୍ଲାଦ ଯୋଶୀ ୨୦୦୪ ମସିହାରେ ପ୍ରଥମ ଥର ପାଇଁ କର୍ଣ୍ଣାଟକର ଧାରୱାଡ଼ ଲୋକସଭା ଆସନରୁ ସାଂସଦ ଭାବେ ନିର୍ବାଚିତ ହୋଇଥିଲେ। ଏହା ପରେ ସେ କ୍ରମାଗତ ଭାବେ ପ୍ରତ୍ୟେକ ଲୋକସଭା ନିର୍ବାଚନରେ ବିଜୟୀ ହୋଇଆସିଛନ୍ତି। ଏହି କାରଣରୁ ସେ କର୍ଣ୍ଣାଟକରେ ଭାରତୀୟ ଜନତା ପାର୍ଟି (BJP)ର ସବୁଠାରୁ ଦୀର୍ଘ ସମୟ ଧରି ସାଂସଦ ରହିଥିବା ନେତାମାନଙ୍କ ମଧ୍ୟରୁ ଜଣେ।
ରାଜନୀତିରେ ପ୍ରବେଶ କରିବା ପୂର୍ବରୁ ସେ ବ୍ୟବସାୟ ଓ ସାମାଜିକ କାର୍ଯ୍ୟକଳାପ ସହ ଜଡ଼ିତ ଥିଲେ। ସାମାଜିକ ସେବାରୁ ଆରମ୍ଭ ହୋଇଥିବା ତାଙ୍କର ଯାତ୍ରା ପରେ ସକ୍ରିୟ ରାଜନୀତିକୁ ପହଞ୍ଚିଥିଲା, ଯେଉଁଠାରେ ସେ ଜାତୀୟ ସ୍ତରରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି।
କେନ୍ଦ୍ର ସରକାରରେ ଅନେକ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟର ଦାୟିତ୍ୱ ସମ୍ଭାଳିଛନ୍ତି:
୩୦ ମେ ୨୦୧୯ରେ ପ୍ରହ୍ଲାଦ ଯୋଶୀ ପ୍ରଥମ ଥର ପାଇଁ କେନ୍ଦ୍ରମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ସେତେବେଳେ ତାଙ୍କୁ ସଂସଦୀୟ ବ୍ୟାପାର, କୋଇଲା ଏବଂ ଖଣି ମନ୍ତ୍ରଣାଳୟର ଦାୟିତ୍ୱ ଦିଆଯାଇଥିଲା।
ଏହା ପରେ କେନ୍ଦ୍ର ସରକାରରେ ସମୟକ୍ରମେ ସେ ଅନେକ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟର ଦାୟିତ୍ୱ ସମ୍ଭାଳିଛନ୍ତି। ସେ ନବୀକରଣଯୋଗ୍ୟ ଶକ୍ତି ମନ୍ତ୍ରଣାଳୟରେ ସୌର ଓ ପବନ ଶକ୍ତି ସମ୍ବନ୍ଧୀୟ କାର୍ଯ୍ୟର ନେତୃତ୍ୱ ନେଇଥିଲେ। ଏହା ସହିତ ସଂସଦୀୟ ବ୍ୟାପାର ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ମଧ୍ୟ ସଫଳତାର ସହ ନିର୍ବାହ କରିଛନ୍ତି।