WhatsApp ଆଣିଲା ବୋବାଲ୍ ଫିଚର୍, ଫେସବୁକ୍ ପରି ଏବେ ଲଗେଇପାରିବେ କଭର୍ ଫଟୋ, କରନ୍ତୁ ଏହି କାମ..

WhatsApp Update: ହ୍ୱାଟ୍ସଆପ୍ ଏବେ ଆଇଫୋନ୍ ବ୍ୟବହାରକାରୀଙ୍କ ପ୍ରୋଫାଇଲ୍ ଅଭିଜ୍ଞତାକୁ ଅଧିକ ବ୍ୟକ୍ତିଗତ କରିବାକୁ ପ୍ରସ୍ତୁତ ହେଉଛି। ମେସେଜିଂ ଆପ୍ ପ୍ରୋଫାଇଲ୍ କଭର ଫଟୋ ନାମକ ଏକ ନୂତନ ଫିଚର ଉପରେ କାମ କରୁଛି। ଏହି ଫିଚର ବ୍ୟବହାରକାରୀମାନଙ୍କୁ ସେମାନଙ୍କର ହ୍ୱାଟ୍ସଆପ୍ ପ୍ରୋଫାଇଲଗୁଡ଼ିକୁ ଫେସବୁକ୍ କିମ୍ବା ଲିଙ୍କଡିନ୍ ପରି ଅଧିକ ଷ୍ଟାଇଲିସ୍ କରିବାକୁ ଅନୁମତି ଦେବ।

ସଦ୍ୟତମ ରିପୋର୍ଟ ଅନୁସାରେ, ଏହି ନୂତନ ବିକଳ୍ପ ହ୍ୱାଟ୍ସଆପ୍ ର iOS ବିଟା ସଂସ୍କରଣରେ ଦେଖାଯାଇଛି, ଯାହା ବର୍ତ୍ତମାନ ଆପଲର ଟେଷ୍ଟଫ୍ଲାଇଟ୍ ପ୍ଲାଟଫର୍ମରେ ଉପଲବ୍ଧ। ପୂର୍ବରୁ ଆଣ୍ଡ୍ରଏଡ୍ ବିଟାରେ ମଧ୍ୟ ଏହି ସଙ୍କେତ ମିଳିସାରିଛି, ଯାହା ସ୍ପଷ୍ଟ ଭାବରେ ସୂଚିତ କରୁଛି ଯେ କମ୍ପାନୀ ଏହାକୁ ସମସ୍ତ ବ୍ୟବହାରକାରୀଙ୍କ ପାଇଁ ଆଣିବାକୁ ଯୋଜନା କରୁଛି।

ପ୍ରୋଫାଇଲ୍ କଭର ଫଟୋ: ଏହି ଫିଚର୍ ବ୍ୟବହାର କରିବା ବହୁତ ସହଜ ବୋଲି କୁହାଯାଉଛି। ଆପଣଙ୍କର WhatsApp ପ୍ରୋଫାଇଲ୍‌ରେ ଆପଣଙ୍କର ବର୍ତ୍ତମାନର ପ୍ରୋଫାଇଲ୍‌ ଫଟୋ ଉପରେ ଏକ ସ୍ୱତନ୍ତ୍ର ସ୍ଥାନ ରହିବ, ଯାହା ଦ୍ଵାରା ଆପଣ ଏକ କଭର୍ ଫଟୋ ଯୋଡିପାରିବେ।

ବ୍ୟବହାରକାରୀମାନେ ସେମାନଙ୍କ ଫୋନ୍‌ର ଗ୍ୟାଲେରୀରୁ ଏକ ଫଟୋ ବାଛିପାରିବେ, ସେହି ସ୍ଥାନରେ ଏକ ନୂତନ ଫଟୋ କ୍ଲିକ୍‌ କରିପାରିବେ, କିମ୍ବା ଯେତେବେଳେ ଇଚ୍ଛା କରିବେ କଭର୍‌ ଫଟୋ ପରିବର୍ତ୍ତନ ମଧ୍ୟ କରିପାରିବେ। ସେଟ୍ ହେବା ପରେ, ଏହି କଭର୍ ଫଟୋ ଅନ୍ୟମାନେ ଆପଣଙ୍କ ପ୍ରୋଫାଇଲ୍‌ ଦେଖିବା ସମୟରେ ଏବଂ ଆପଣ ନିଜର ପ୍ରୋଫାଇଲ୍‌ ସେଟିଂସକୁ ଯିବା ସମୟରେ ଦୃଶ୍ୟମାନ ହେବ।

WhatsApp Businessରୁ ପ୍ରେରଣା: ତେବେ କହିରଖୁଛୁ ଯେ, ଏହି ଫିଚର୍ WhatsApp Business ବ୍ୟବହାରକାରୀଙ୍କ ପାଇଁ ପୂର୍ବରୁ ଅଛି। ବ୍ୟବସାୟ ଆକାଉଣ୍ଟଗୁଡ଼ିକ ଦୀର୍ଘ ସମୟ ଧରି କଭର ଫଟୋ ମାଧ୍ୟମରେ ସେମାନଙ୍କର ବ୍ରାଣ୍ଡ ପରିଚୟ ପ୍ରଦର୍ଶନ କରିଆସୁଛନ୍ତି। ଏବେ WhatsApp ନିଷ୍ପତ୍ତି ନେଇଛି ଯେ, ନିୟମିତ ବ୍ୟବହାରକାରୀଙ୍କ ପାଖରେ ମଧ୍ୟ ସେମାନଙ୍କର ପ୍ରୋଫାଇଲକୁ ଅଧିକ ଆକର୍ଷଣୀୟ କରିବା ପାଇଁ ସମାନ କଷ୍ଟମାଇଜେସନ୍ ସ୍ୱାଧୀନତା ରହିବା ଉଚିତ।

ଅନ୍ୟାନ୍ୟ ଫିଚର୍: ଏହି ଫିଚର୍ ବର୍ତ୍ତମାନ iOS ବିଟା ପର୍ଯ୍ୟାୟରେ ଅଛି, ତେଣୁ ସମସ୍ତ ଉପଭୋକ୍ତାଙ୍କ ପାଇଁ ଏହାର ପ୍ରଚଳନ ତାରିଖ ଜଣା ନାହିଁ। WhatsApp ସାଧାରଣତଃ ଧୀରେ ଧୀରେ ନୂତନ ଫିଚର୍ ପ୍ରଦାନ କରେ, ତେଣୁ କିଛି ଉପଭୋକ୍ତାଙ୍କ ପାଇଁ ଟିକିଏ ଅଧିକ ସମୟ ଅପେକ୍ଷା କରିବାକୁ ପଡ଼ିପାରେ।