ଭାରତରେ କଫ୍ ସିରଫ୍ ପିଇ କାହିଁକି ମରୁଛନ୍ତି ପିଲା, ସବୁ ସତ ସାମ୍ନାକୁ ଆଣିଲା WHO

ନୂଆଦିଲ୍ଲୀ: ଭାରତରେ କଫ୍ ସିରଫ୍ ପିଇ ୫ ବର୍ଷରୁ କମ୍ ବୟସର ୧୭ ଜଣ ପିଲାଙ୍କ ମୃତ୍ୟୁ ଘଟିଥିବା ଖବର ପୁରା ଦେଶରେ ଚହଳ ସୃଷ୍ଟି କରିଛି। ମୃତ୍ୟୁର କାରଣ ହେଉଛି କଫ ସିରପରେ ବିଷାକ୍ତ ରାସାୟନିକ ଡାଇଥାଇଲିନ୍ ଗ୍ଲାଇକଲ୍ (DEG) ର ଉପସ୍ଥିତି ଯାହା ସୁପାରିଶ କରାଯାଇଥିବା ସୀମାଠାରୁ ପ୍ରାୟ ୫୦୦ ଗୁଣ ଅଧିକ ଥିଲା।

ଏହି ବିଷାକ୍ତ ରାସାୟନିକ ପଦାର୍ଥ ପ୍ରଥମେ କୋଲଡ୍ରିଫ୍ ସିରପ୍‌ରେ ମିଳିଥିଲା, ଯାହା ପରେ ଏହାକୁ ନିଷିଦ୍ଧ କରାଯାଇଥିଲା। ତଥାପି ସମାନ ରାସାୟନିକ ପଦାର୍ଥ ଏବେ ରେସ୍ପିଫ୍ରେସ୍ ଏବଂ ରିଲାଇଫ୍ ସିରପ୍‌ରେ ମଧ୍ୟ ମିଳିଛି। ବିଶ୍ୱ ସ୍ୱାସ୍ଥ୍ୟ ସଂଗଠନ ଏବେ ବ୍ୟାଖ୍ୟା କରିଛି ଯେ କାହିଁକି ଭାରତରେ କଫ୍ ସିରପ୍ ମୃତ୍ୟୁର କାରଣ ହୋଇଛି।

କ’ଣ କ୍ଷତି କରିପାରେ: ସ୍ୱାସ୍ଥ୍ୟ ବିଭାଗ ଚେତାବନୀ ଦେଇଛି ଯେ ଏହା ଏକ ଗମ୍ଭୀର ବିଷ ଯାହା କିଡନୀ ଫେଲ୍ୟୁଅର, ସ୍ନାୟୁଗତ ସମସ୍ୟା ଏବଂ ମୃତ୍ୟୁର କାରଣ ମଧ୍ୟ ହୋଇପାରେ।

ଡବ୍ଲୁଏଚ୍ଓ କହିଛି ଯେ ଏହି ତିନୋଟି ସିରପ୍ କେବଳ ଭାରତରେ ବିକ୍ରି ହେଉଥିଲା, ଏବଂ ଏପର୍ଯ୍ୟନ୍ତ କୌଣସି ରପ୍ତାନି ହୋଇନାହିଁ। ତଥାପି, ଡବ୍ଲୁଏଚ୍ଓ ସତର୍କ କରାଇ ଦେଇଛି ଯେ କିଛି ସିରପ୍ ଅଣଆନୁଷ୍ଠାନିକ ଭାବରେ ବିଦେଶକୁ ଚାଲାଣ ହେଉଥାଇପାରେ ଏବଂ ବିଷାକ୍ତତାର ଉତ୍ସ ଏପର୍ଯ୍ୟନ୍ତ ଜଣା ପଡ଼ିନାହିଁ।

ଭାରତରେ କାହିଁକି ମୃତ୍ୟୁ: ଡବ୍ଲୁଏଚ୍ଓ କହିଛି ଯେ ଭାରତରେ ଔଷଧ ପାଇଁ ଆବଶ୍ୟକୀୟ ପରୀକ୍ଷାର ଅଭାବ ଅଛି। ଆଇନ ଅନୁଯାୟୀ ପ୍ରତ୍ୟେକ ବ୍ୟାଚ୍ ପରୀକ୍ଷା କରିବା ଆବଶ୍ୟକ, କିନ୍ତୁ ସାମ୍ପ୍ରତିକ କାରଖାନା ଯାଞ୍ଚରେ ଗୁରୁତର ତ୍ରୁଟି ପ୍ରକାଶ ପାଇଛି।

ସ୍ରେସାନ୍ ଫାର୍ମାସ୍ୟୁଟିକାଲର କୋଲଡ୍ରିଫ୍ ସିରପ୍ କେବଳ ସ୍ଥାନୀୟ ଭାବରେ ବିକ୍ରି ହେଉଥିଲା। କାରଖାନା ବନ୍ଦ ଅଛି, ଏବଂ ପୋଲିସ ହତ୍ୟା ଘଟଣାର ତଦନ୍ତ କରୁଛି।

କେବଳ ରାଜ୍ୟ ମଧ୍ୟରେ ବିକ୍ରି ହେଉଥିବା ସେପ୍ ଫାର୍ମା ଏବଂ ରେଡନେକ୍ସ ଫାର୍ମାସ୍ୟୁଟିକାଲର ସିରପ୍ ମଧ୍ୟ ନିମ୍ନମାନର ବୋଲି ଜଣାପଡିଥିଲା। ଉଭୟ କମ୍ପାନୀକୁ ଉତ୍ପାଦନ ଏବଂ ବିକ୍ରୟ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା।

ଭାରତ ପାଇଁ କାହିଁକି ବିପର୍ଯ୍ୟୟ: ଭାରତର ଔଷଧ ଶିଳ୍ପରେ ଏହି ଘଟଣା ଘରୋଇ ଏବଂ ଆନ୍ତର୍ଜାତୀୟ ସ୍ତରରେ ଚିନ୍ତାର ବିଷୟ ପାଲଟିଛି। ଔଷଧ ଉତ୍ପାଦନରେ ଭାରତ ବିଶ୍ୱରେ ତୃତୀୟ ସ୍ଥାନରେ ଅଛି ଏବଂ ଏହାର ଏକ ଗୁରୁତ୍ୱପୂର୍ଣ୍ଣ ଔଷଧ ରପ୍ତାନି ସମ୍ଭାବନା ଅଛି।

ଆମେରିକାରେ ବ୍ୟବହୃତ ୪୦% ଜେନେରିକ୍ ଔଷଧ ଭାରତରୁ ଆସିଥାଏ, ଏବଂ ଅନେକ ଆଫ୍ରିକୀୟ ଦେଶ ପାଇଁ ୯୦% ଔଷଧ ମଧ୍ୟ ଭାରତରୁ ଆସିଥାଏ।

WHO ଏବଂ ଭାରତର ସ୍ୱାସ୍ଥ୍ୟ ମନ୍ତ୍ରଣାଳୟ ସମସ୍ତ ପିଲାଙ୍କ ପାଇଁ କାଶ ଏବଂ ଥଣ୍ଡା ଔଷଧ ବ୍ୟବହାର ନକରିବାକୁ କଡ଼ା ପରାମର୍ଶ ଦେଇଛନ୍ତି।