କମ ବର୍ଷର ମହିଳାଙ୍କ କ୍ଷେତ୍ରରେ କାହିଁକି ବଢୁଛି ସ୍ତନ କର୍କଟ? ଏହି ପ୍ରାଥମିକ ଲକ୍ଷଣଗୁଡ଼ିକୁ ପ୍ରାୟତଃ କରାଯାଏ ଅଣଦେଖା

Breast Cancer in Young Woman : ସ୍ତନ କର୍କଟକୁ ଦୀର୍ଘ ସମୟ ଧରି ଏପରି ଏକ ରୋଗ ଭାବେ ବିଚାର କରାଯାଉଥିଲା, ଯାହା ମୁଖ୍ୟତଃ ବୟସ୍କ ମହିଳାମାନଙ୍କୁ ପ୍ରଭାବିତ କରିଥାଏ। କିନ୍ତୁ ବର୍ତ୍ତମାନ ଏହି ଧାରଣା ବଦଳୁଛି। ସାମ୍ପ୍ରତିକ ବର୍ଷଗୁଡ଼ିକରେ ଯୁବବର୍ଗ, ବିଶେଷ କରି କମ୍ ବୟସର ମହିଳାମାନଙ୍କ କ୍ଷେତ୍ରରେ ମଧ୍ୟ ଏହି ରୋଗ ବୃଦ୍ଧି ପାଉଥିବା ଦେଖାଯାଉଛି। ପରିସଂଖ୍ୟାନ ଅନୁଯାୟୀ, ଯୁବତୀମାନଙ୍କ ମଧ୍ୟରେ ସ୍ତନ କର୍କଟ ମାମଲା ପ୍ରତିବର୍ଷ ବୃଦ୍ଧି ପାଉଛି, ଯାହା ଚିନ୍ତାର ବିଷୟ ପାଲଟିଛି। ତଥ୍ୟ ଅନୁସାରେ, ୨୦୧୨ ରୁ ୨୦୨୨ ମଧ୍ୟରେ ସ୍ତନ କର୍କଟର ହାର ବାର୍ଷିକ ପ୍ରାୟ ୧.୪ ପ୍ରତିଶତ ଥିଲା, ଯାହା ୫୦ ବର୍ଷରୁ ଅଧିକ ବୟସ୍କ ମହିଳାଙ୍କ ତୁଳନାରେ ଅଧିକ।

ଏଭଳି ପରିସ୍ଥିତିରେ, ଆସନ୍ତୁ ଜାଣିବା ଯୁବତୀମାନଙ୍କ କ୍ଷେତ୍ରରେ ସ୍ତନ କର୍କଟ ମାମଲା କାହିଁକି ବଢୁଛି ଏବଂ ଡାକ୍ତରମାନେ ଏହାର କେଉଁ ପ୍ରାଥମିକ ଲକ୍ଷଣଗୁଡ଼ିକ ବିଷୟରେ କହୁଛନ୍ତି, ଯାହାକୁ ପ୍ରାୟତଃ ଅଣଦେଖା କରାଯାଇଥାଏ।

ଯୁବତୀମାନଙ୍କ କ୍ଷେତ୍ରରେ ସ୍ତନ କର୍କଟ ବଢ଼ିବାର କାରଣ:

ଅତ୍ୟଧିକ ମଦ୍ୟପାନ: ବିଶେଷଜ୍ଞଙ୍କ ଅନୁସାରେ, ଭାରତରେ ଯୁବ ଜନସଂଖ୍ୟା ଅଧିକ ହୋଇଥିବାରୁ ଏହି ବୟସ ବର୍ଗରେ ରୋଗୀଙ୍କ ସଂଖ୍ୟା ମଧ୍ୟ ଅଧିକ ଦେଖାଯାଉଛି। ଏହା ବ୍ୟତୀତ ଜୀବନଶୈଳୀ ସହ ଜଡ଼ିତ ଅନେକ କାରଣ ମଧ୍ୟ ଏହି ବିପଦକୁ ବଢ଼ାଇଥାଏ। ମଦ୍ୟପାନକୁ ଏକ ବଡ଼ କାରଣ ଭାବେ ବିଚାର କରାଯାଉଛି, କାରଣ ଏହା ଶରୀରରେ ‘ଇଷ୍ଟ୍ରୋଜେନ’ ସ୍ତରକୁ ପ୍ରଭାବିତ କରିପାରେ ଏବଂ DNA କୁ କ୍ଷତି ପହଞ୍ଚାଇପାରେ।

ମେଦବହୁଳତା ବୃଦ୍ଧି: ମେଦବହୁଳତା ଏବଂ ନିଷ୍କ୍ରିୟ ଜୀବନଶୈଳୀ ମଧ୍ୟ ସ୍ତନ କର୍କଟର ବିପଦ ବଢ଼ାଇଥାଏ। ଏହାଦ୍ୱାରା ହରମୋନ୍ ଅସନ୍ତୁଳନ ଏବଂ ପ୍ରଦାହ  ଭଳି ସମସ୍ୟା ଦେଖାଦିଏ, ଯାହା କର୍କଟ ରୋଗ ସୃଷ୍ଟି କରିବାରେ ସହାୟକ ହୋଇଥାଏ।

ଜେନେଟିକ କାରଣ: କେତେକ କ୍ଷେତ୍ରରେ ଜେନେଟିକ ବା ବଂଶଗତ କାରଣ ମଧ୍ୟ ଏଥିରେ ଏକ ପ୍ରମୁଖ ଭୂମିକା ଗ୍ରହଣ କରିଥାଏ, ଯେପରିକି BRCA1 ଏବଂ BRCA2 ଜିନ୍‌ରେ ପରିବର୍ତ୍ତନ। ତେବେ ଅଧିକାଂଶ କ୍ଷେତ୍ରରେ ସ୍ତନ କର୍କଟ ଜେନେଟିକ ହୋଇନଥାଏ।

ପରିବେଶ ସମ୍ବନ୍ଧୀୟ କାରଣ: ପ୍ରଦୂଷଣ ଏବଂ ମାଇକ୍ରୋପ୍ଲାଷ୍ଟିକ ପରି ପରିବେଶ ସମ୍ବନ୍ଧୀୟ କାରଣଗୁଡ଼ିକ ମଧ୍ୟ ସ୍ତନ କର୍କଟ ବିପଦ ବଢ଼ାଉଥିବା କାରଣ ମଧ୍ୟରେ ସାମିଲ କରାଯାଉଛି। ତେବେ ଏହା ଉପରେ ଏବେ ମଧ୍ୟ ଅଧିକ ଗବେଷଣା ଜାରି ରହିଛି।

ସ୍କ୍ରିନିଂର ଅଭାବ ଏବଂ ବିଳମ୍ବରେ ଚିହ୍ନଟ: ବିଶେଷଜ୍ଞଙ୍କ କହିବା ଅନୁସାରେ, ଭାରତରେ ବ୍ୟାପକ ସ୍ତରରେ ସ୍କ୍ରିନିଂର ବ୍ୟବସ୍ଥା ନାହିଁ। ଏହା ସହିତ “ଯୁବତୀମାନଙ୍କୁ ଏହି ରୋଗ ହୁଏ ନାହିଁ” ବୋଲି ରହିଥିବା ଭୁଲ୍ ଧାରଣା ଯୋଗୁଁ ଅନେକ ସମୟରେ ଠିକ ସମୟରେ ପରୀକ୍ଷା କରାଯାଇ ପାରେ ନାହିଁ। ସଚେତନତାର ଅଭାବ ଏବଂ ସାମାଜିକ ସଂକୋଚ ମଧ୍ୟ ଏହାର ଅନ୍ୟତମ କାରଣ।

ସ୍ତନ କର୍କଟର ଲକ୍ଷଣ ଯାହାକୁ ଅଣଦେଖା କରାଯାଏ:

ଡାକ୍ତରଙ୍କ ଅନୁଯାୟୀ, ସ୍ତନ କର୍କଟର ପ୍ରାଥମିକ ସଙ୍କେତଗୁଡ଼ିକ ଅତି ସାମାନ୍ୟ ହୋଇଥାଏ, ଯାହା ଉପରେ ଲୋକମାନେ ଧ୍ୟାନ ଦିଅନ୍ତି ନାହିଁ। ଯେପରିକି:

ସ୍ତନରେ ଛୋଟ ଏବଂ ଯନ୍ତ୍ରଣାହୀନ ଗୋଲା ସୃଷ୍ଟି ହେବା।

ସାମାନ୍ୟ ଅସ୍ୱାଭାବିକ ଅନୁଭବ ହେବା।

ଚର୍ମରେ ପରିବର୍ତ୍ତନ କିମ୍ବା ଅତ୍ୟଧିକ କ୍ଲାନ୍ତି ଅନୁଭବ କରିବା।

ନିପଲ୍‌ରୁ ଅସ୍ୱାଭାବିକ ଭାବେ ରକ୍ତ ଶ୍ରାବ ହେବା।

ସ୍ତନର ଆକାର କିମ୍ବା ଗଠନରେ ପରିବର୍ତ୍ତନ ହେବା ଏବଂ କ୍ରମାଗତ ଭାବେ ସାମାନ୍ୟ କଷ୍ଟ ଅନୁଭବ ହେବା।

ବ୍ୟସ୍ତବହୁଳ ଜୀବନଶୈଳୀ କାରଣରୁ ଅନେକ ମହିଳା ଏହି ଲକ୍ଷଣଗୁଡ଼ିକୁ ଅଣଦେଖା କରିଦିଅନ୍ତି, ଯାହାଫଳରେ ରୋଗ ବିଷୟରେ ବହୁତ ବିଳମ୍ବରେ ଜଣାପଡ଼ିଥାଏ।

ଯୁବତୀମାନଙ୍କ କ୍ଷେତ୍ରରେ ରୋଗ ଚିହ୍ନଟ କରିବା କାହିଁକି କଷ୍ଟକର ହୋଇଥାଏ?

ବିଶେଷଜ୍ଞମାନେ କୁହନ୍ତି ଯେ, କମ ବୟସର ମହିଳାମାନଙ୍କ କ୍ଷେତ୍ରରେ ସ୍ତନର ଟିସୁ ଅଧିକ ଘନ ବା ଶକ୍ତ ହୋଇଥାଏ, ଯାହା ଫଳରେ ଯାଞ୍ଚ ସମୟରେ ଛୋଟ ଛୋଟ ପରିବର୍ତ୍ତନଗୁଡ଼ିକୁ ଧରିବା କଷ୍ଟକର ହୋଇପଡ଼େ। ଏହା ବ୍ୟତୀତ, ଅନେକ ସମୟରେ ଏହି ଲକ୍ଷଣଗୁଡ଼ିକୁ ସାଧାରଣ ସମସ୍ୟା ବୋଲି ଭାବି ନିଆଯାଏ, ଯେପରିକି ହରମୋନ୍‌ଜନିତ ପରିବର୍ତ୍ତନ କିମ୍ବା ‘ଫାଇବ୍ରୋଏଡେନୋମା’ (Fibroadenoma)। ସେହିଭଳି ସାମାଜିକ ସଂକୋଚ, ଭୟ ଏବଂ ସଚେତନତାର ଅଭାବ ମଧ୍ୟ ସଠିକ ସମୟରେ ଡାକ୍ତରଙ୍କ ପାଖକୁ ଯିବାରେ ବାଧା ସୃଷ୍ଟି କରିଥାଏ, ଯେଉଁଥିପାଇଁ ରୋଗ ଚିହ୍ନଟ କରିବାରେ ବିଳମ୍ବ ହୋଇପାରେ।