ପାତାଳ ମୁହାଁ ଟଙ୍କା: ପ୍ରଥମ ଥର ପାଇଁ ଡଲାର ତୁଳନାରେ ରେକର୍ଡ ୮୦.୦୫ ଛୁଇଁଲା, ଜାଣନ୍ତୁ ଆପଣଙ୍କ ଉପରେ କ’ଣ ପ୍ରଭାବ ପଡ଼ିବ?

ମୁମ୍ବାଇ: ଡଲାର ତୂଳନାରେ ସର୍ବକାଳିନ ନିମ୍ନ ସ୍ତରରେ ପହଞ୍ଚିଲା ଭାରତୀୟ ଟଙ୍କା। ମଙ୍ଗଳବାର ଦିନ ପ୍ରଥମ ଥର ପାଇଁ ଗୋଟିଏ ଡଲାର ତୁଳନାରେ ୮୦ ଟଙ୍କାରେ ପହଞ୍ଚିଛି। ଡଲାର ତୁଳନାରେ ୮୦ରେ ପହଞ୍ଚିଥିଲା ବେଳେ ବର୍ତ୍ତମାନ ପ୍ରକୃତ ଭୟ ହେଉଛି ଯେ, ଏହି ହ୍ରାସ ପ୍ରକ୍ରିୟା ଆହୁରି ଅଧିକ ହୋଇପାରେ। ବ୍ଲୁମବର୍ଗ ରିପୋର୍ଟ ଅନୁଯାୟୀ ଆଜି ବଜାର ୭୯.୯୯ ରେ ଖୋଲିବା ପରେ ଡଲାର ତୁଳନାରେ ଟଙ୍କା ୮୦.୦୨ ରେ ପହଞ୍ଚିଥିଲା। ସେହିପରି ପିଟିଆଇ ରିପୋର୍ଟ ମୁତାବକ ପ୍ରାରମ୍ଭିକ ବାଣିଜ୍ୟରେ ଆମେରିକୀୟ ଡଲାର ତୁଳନାରେ ଟଙ୍କା ୮୦.୦୫ ର ସର୍ବନିମ୍ନ ମୂଲ୍ୟକୁ ଛୁଇଁଛି। ରଏଟର୍ସ କହିଛି ଯେ ଘରୋଇ ସେୟାରରେ ଦୁର୍ବଳତା ହେତୁ ଭାରତୀୟ ଟଙ୍କା ମଙ୍ଗଳବାର ରେକର୍ଡ ସର୍ବନିମ୍ନ ସ୍ତରରେ ପହଞ୍ଚିଛି, କିନ୍ତୁ କେନ୍ଦ୍ରୀୟ ବ୍ୟାଙ୍କ ଦ୍ୱାରା ଡଲାର ବିକ୍ରୟ ହସ୍ତକ୍ଷେପ ଅଧିକ କ୍ଷତି ସୀମିତ କରିବାରେ ସାହାଯ୍ୟ କରିଛି।

ରିପୋର୍ଟ ଅନୁସାରେ ସକାଳ ୯.୧୦ ରେ ଟଙ୍କା ଡଲାର ତୁଳନାରେ ୮୦.୦୧ ଡଲାରରେ କାରବାର କରିଥିଲା, ଯାହା ପୂର୍ବ ତୁଳନାରେ ୦.୦୩% ହ୍ରାସ ପାଇଥିଲା। ଆଜି ସକାଳୁ ବଜାର ଆରମ୍ଭରେ ଟଙ୍କାର ୭୯.୯୯ ରେ ଖୋଲି ୮୦.୦୨ ର ଏକ ନୂତନ ରେକର୍ଡ ଛୁଇଁଥିଲା। ବିଶ୍ୱ ବଜାରରେ ତୈଳ ଦର ବୃଦ୍ଧି କାରଣରୁ ଏହାର ପ୍ରଭାବ ଭାରତୀୟ ବଜାରରେ ଦେଖିବାକୁ ମିଳିଛି। ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ଗସ୍ତ ଏବଂ କିଷ୍ଟୋନ୍ ପାଇପଲାଇନକୁ ଆମେରିକାର ରିଫାଇନର୍ସକୁ ପଠାଇବା ପରେ ସାଉଦି ଆରବ ଉତ୍ପାଦନ ବୃଦ୍ଧି କରିବାକୁ ପ୍ରତିଶ୍ରୁତି ଦେବା ପରେ ରାତାରାତି ଅଶୋଧିତ ତୈଳ ମୁଲ୍ୟ ୫% ରୁ ଅଧିକ ବୃଦ୍ଧି ପାଇଛି ବୋଲି ବ୍ଲୁମବର୍ଗ ରିପୋର୍ଟ କରିଛି।

‘ବୈଶ୍ୱିକ ପ୍ରତିକୂଳ ପରିବେଶ କାରଣରୁ ଟଙ୍କା ଆଗକୁ ଆହୁରି ହ୍ରାସ ପାଇବାର ସମ୍ଭାବନା ରହିଛି। ଚଳିତ ବର୍ଷ ଭାରତୀୟ ମୁଦ୍ରା ୭% ରୁ ଅଧିକ ହ୍ରାସ ପାଇଛି ଏବଂ ଗତ ସାତଟି ସ୍ୱିଜନ ମଧ୍ୟରୁ ୬ ଟିରେ ଏହା ରେକର୍ଡ କମ୍ ରହିଛି। ବିଦେଶୀ ପୁଞ୍ଜି ନିବେଶକାରୀ ଭାରତୀୟ ବଜାରରୁ ନିବେଶ ଅପସାରଣ କରିବା ଟଙ୍କାର ମୂଲ୍ୟ ହ୍ରାସ ପାଇବାର ଏକ ବଡ଼ କାରଣ। ଚଳିତ ବର୍ଷ ଦେଶରୁ ବୈଦେଶିକ ପାଣ୍ଠିର ପ୍ରବାହ ଗତ ଦୁଇ ବର୍ଷର ମିଳିତ ପ୍ରବାହଠାରୁ ଅଧିକ ରହିଛି, ବିଦେଶୀ ନିବେଶକମାନେ ମଧ୍ୟ ଚଳିତ ବର୍ଷ ଭାରତୀୟ ବଜାରରୁଏକ ରେକର୍ଡ ୨୯ ବିଲିୟନ ଡଲାର ଅପସାରଣ କରିଛନ୍ତି।