ଷ୍ଟେଟ ବ୍ୟାଙ୍କର ଗ୍ରାହକଙ୍କୁ ବଡ଼ ଝଟକା: ସୁଧ ହାର ବୃଦ୍ଧି କଲା ବ୍ୟାଙ୍କ, ଦେବାକୁ ପଡିବ ଅଧିକ EMI
ନୂଆଦିଲ୍ଲୀ: ଦେଶର ସବୁଠୁ ବଡ଼ ସରକାରୀ ବ୍ୟାଙ୍କ ଭାରତୀୟ ଷ୍ଟେଟ୍ ବ୍ୟାଙ୍କ୍ର ସମସ୍ତ ଗ୍ରାହକଙ୍କ ପାଇଁ ଆସିଛି ବଡ଼ ଖବର। ଏସବିଆଇ ଏହାର ଗ୍ରାହକଙ୍କୁ ଏକ ବଡ଼ ଝଟକା ଦେଇଛି। କାରଣ ବ୍ୟାଙ୍କ ଏହାର ଗ୍ରାହକମାନଙ୍କର ଲୋନ୍ ଇଏମଆଇ’କୁ ବଢାଇ ଦେଇଛି। ଏସବିଆଇ ଋଣ ଆଧାରରେ ପାଣ୍ଠିର ମାର୍ଜିନାଲ୍ କଷ୍ଟ ଅଫ୍ ଋଣ ଅର୍ଥାତ୍ MCLR କୁ ୧୫ ବେସିସ ପଏଣ୍ଟ ଅର୍ଥାତ୍ ବିଭିନ୍ନ ଅବଧି ପାଇଁ ୦.୧୫ ପ୍ରତିଶତ ବୃଦ୍ଧି କରିଛି। ବ୍ୟାଙ୍କର ଏହି ନିଷ୍ପତି ପରେ ବର୍ତ୍ତମାନ ବ୍ୟାଙ୍କରୁ ଋଣ ନେବା ମହଙ୍ଗା ହେବ। ବ୍ୟାଙ୍କର ନୂତନ ହାର ନଭେମ୍ବର ୧୫, ୨୦୨୨ ରୁ କାର୍ଯ୍ୟକାରୀ ହୋଇଛି।
ସେହିପରି ଏସବିଆଇ ଏକ ବର୍ଷର MCLR କୁ ୦.୧୦ ପ୍ରତିଶତ ବୃଦ୍ଧି କରି ୮.୦୫ ପ୍ରତିଶତକୁ ବୃଦ୍ଧି କରିଛି। ବର୍ତ୍ତମାନ ପର୍ଯ୍ୟନ୍ତ ଏହା ୭.୯୫ ପ୍ରତିଶତ ଥିଲା। ଗୃହ ଋଣ, ଗାଡି ଋଣ ଏବଂ ବ୍ୟକ୍ତିଗତ ଋଣ ହାର ଏକ ବର୍ଷର MCLR ଆଧାରରେ ସ୍ଥିର ହୋଇଛି। ନଭେମ୍ବର ୧୫ ଅର୍ଥାତ୍ ଆଜି ଠାରୁ ନୂତନ ହାର କାର୍ଯ୍ୟକାରୀ ହୋଇଛି। ଏସବିଆଇର ୱେବସାଇଟରେ ପୋଷ୍ଟ କରାଯାଇଥିବା ବିଜ୍ଞପ୍ତି ଅନୁଯାୟୀ ଦୁଇ ବର୍ଷ ଏବଂ ତିନି ବର୍ଷିଆ MCLR କୁ ମଧ୍ୟ ଯଥାକ୍ରମେ ୦.୧୦ ପ୍ରତିଶତ ବୃଦ୍ଧି କରି ୮.୨୫ ଏବଂ ୮.୩୫ ପ୍ରତିଶତକୁ ବୃଦ୍ଧି କରାଯାଇଛି।
ବ୍ୟାଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଏକ ମାସ ଏବଂ ତିନିମାସ MCLR କୁ ୦.୧୫ ପ୍ରତିଶତ ବୃଦ୍ଧି କରି ୭.୭୫ ପ୍ରତିଶତକୁ ବୃଦ୍ଧି କରିଛି। ଛଅ ମାସର MCLR କୁ ମଧ୍ୟ ୦.୧୫ ପ୍ରତିଶତ ବୃଦ୍ଧି କରି ୮.୦୫ ପ୍ରତିଶତକୁ ବୃଦ୍ଧି କରାଯାଇଛି। ଏହା ବ୍ୟତୀତ ଏକ ଦିନିଆ MCLR କୁ ୦.୧୦ ପ୍ରତିଶତ ବୃଦ୍ଧି କରି ୭.୬୦ ପ୍ରତିଶତକୁ ବୃଦ୍ଧି କରାଯାଇଛି। ତେବେ ଗୃହ ଋଣ, ଗାଡି ଋଣ ଏବଂ ବ୍ୟକ୍ତିଗତ ଋଣ MCLR ସହିତ ସଂଯୁକ୍ତ ହୋଇଥିବାରୁ ଗ୍ରାହକଙ୍କୁ ଏବେ ଋଣ ମହଙ୍ଗା ହେବ।
